"ဧရာဝတီဘဏ်မှ မိတ်ဆက်လာသော အိမ်ရာချေးငွေ"

"ဧရာဝတီဘဏ်မှ မိတ်ဆက်လာသော အိမ်ရာချေးငွေ"

၁။ "အိမ်ဝယ်နိုင်ရေး ဧရာဝတီဘဏ်က အိမ်ရာချေးငွေ
ထုတ်ပေးတော့မည်"

တလ၀င်ငွေ နှစ်သိန်း ဝန်းကျင်ရှိရုံနဲ့ အိမ်တန်ဖိုးရဲ့
၃၀ ရာခိုင်နှုန်းပေးသွင်းပြီး အိမ်ဝယ်နိုင်ဖို့အတွက် ဧရာဝတီ
ဘဏ်က အိမ်ရာချေးငွေ စတင် ထုတ်ပေးတော့မယ်လို့ 
ဆိုပါတယ်။

ဧရာဝတီဘဏ်ရဲ့ အိမ်ယာချေးငွေချထားပေးမယ့် အစီအစဉ်
ကို မတ်လ ၃၁ ရက်နေ့က ရန်ကုန်မြို့ နိုဗိုတယ်ဟိုတယ်မှာ
စတင် မိတ်ဆက်လိုက်တာပါ။

ဒါဟာ အိမ်ပိုင်ဆိုင်ဖို့ ခက်ခဲနေတဲ့  အခြေခံလူတန်းစား
ဝန်ထမ်းတွေ အတွက် ရည်ရွယ်ပြီး အိမ်ခြံမြေဈေးကွက်
ပြန်လည်ဦးမော့လာနိုင်ဖို့ကိုလည်း အထောက်အကူပြုတယ်
လို့ ဆိုပါတယ်။

ဘဏ်ရဲ့ လက်ထောက်ဥက္ကဋ္ဌ ဦးဇာနည်လင်းက
“ကျနော်တို့က အနည်းဆုံး သိန်း ၂၀၀ တန် အိမ်ခန်းအတွက်
စပြီးချေးငွေ ချထားပေးမှာဆိုတော့ အဲဒီအိမ်အတွက်
၃၀ ရာခိုင်နှုန်းဖြစ်တဲ့ သိန်းခြောက်ဆယ်ကို ကနဦး ပေးသွင်း
ရပါမယ်။ ပြီးရင် ဝင်ငွေပေါ်မူတည်ပြီး ဆပ်ရမှာ ဆိုတော့
လူတယောက်အနေနဲ့ အနည်းဆုံး နှစ်သိန်းခွဲ ဒါမှမဟုတ်
မိသားစုဝင်ထဲက ဝန်ထမ်း ၂ ယောက်ရဲ့ ဝင်ငွေပေါင်း
နှစ်သိန်းခွဲရှိဖို့ လိုပါတယ်။ ဒါက ဝယ်ယူလိုတဲ့ အိမ်ပေါ်
မူတည်ပြီး ဆပ်သွားရမှာပါ” လို့ ပြောပါတယ်။

ဒီအိမ်ရာချေးငွေအတွက် အနည်းဆုံး ငွေကျပ် သိန်းနှစ်ရာ
တန်ဖိုးရှိတဲ့ အိမ်ကနေ သိန်းသောင်းချီတဲ့ အိမ်ယာတွေ
အတွက်ပါ  ချေးငွေ ချထားပေးမှာဖြစ်ပြီး ပြန်ဆပ်ကာလ
အနည်းဆုံး ၈ နှစ်ကနေ ၁၅ နှစ် အထိ ဆပ်နိုင်မှာ
ဖြစ်ပါတယ်။

“အတိုး ၁၃ ရာခိုင်နှုန်းဆိုတာ အရပ်ထဲမှာပြောသလို
၁၃ ကျပ်တိုး မဟုတ်ပါဘူး။ လစဉ်ပေးရမယ့်ငွေက တသိန်း
ဆိုပါစို့။ အဲဒီ တသိန်းက အရင်းက ရှစ်သောင်းဆို အတိုး
က နစ်သောင်းပါတယ်။ အဲဒီတော့ အရင်းက တဖြေးဖြေး
လျော့သွားမှာဆိုတော့ အတိုးက နည်းနည်းသွားမှာ။
တနှစ်လုံးကို အတိုးတွက်မယ်ဆိုရင် ၇ ရာခိုင်နှုန်းပါ။
တနှစ်ကို ၇ ကျပ်တိုးဆိုတာ မြန်မာနိုင်ငံအတွက် တော်တော်
အဆင်ပြေတဲ့နှုန်းထားပါ” လို့ ဦးဇာနည်လင်းက
ဆက်ပြောပါတယ်။

အိမ်ရာချေးငွေလျှောက်ထားဖို့အတွက် အိမ်ထောင်စုစာရင်း၊
ရပ်ကွက်ထောက်ခံချက်၊ လစာဝင်ငွေ ထောက်ခံချက်နဲ့ အတူ
မိမိဝယ်ယူလိုတဲ့ အိမ်အတွက် ဧရာဝတီဘဏ်နဲ့ ချိတ်ဆက်
ဆောင်ရွက်ရမှာ ဖြစ်ပါတယ်။

အခုပြုလုပ်တဲ့ အိမ်ရာချေးငွေပြပွဲမှာလည်း ဆောက်လုပ်ရေး
လုပ်ငန်းပေါင်း ၅၀ နဲ့ တိုက်ခန်း ၂၀၀၀ ကျော် ပါဝင်
ပြသနေပါတယ်။

(အိမမမွန်)

*****

၂။ "အိမ်ဝယ်ဖို့ ငွေချေးပေးတဲ့စနစ် စတင်လိုက်တဲ့
ဧရာဘဏ်"

ဧရာဝတီဘဏ်က အသက် ၂ဝ နှင့်အထက် ပုံမှန်ဝင်ငွေ
ရှိသော မြန်မာနိုင်ငံသား မည်သူမဆို အိမ်ဝယ်ရန် ချေးငွေ
ယူနိုင်သောအစီအစဉ်ကို မကြာသေးမီက စတင်
မိတ်ဆက်ခဲ့သည်။

ယင်းအစီအစဉ်ဖြင့် အိမ်ရာ အရစ်ကျဝယ်ယူရာတွင် ကနဦး
အိမ်တန်ဖိုး၏ ငွေ  ၃ဝ ရာခိုင်နှုန်း ပေးသွင်းရမည်ဖြစ်ပြီး
ကျန်ငွေအတွက် အတိုးနှုန်း ၁၃ ရာခိုင်နှုန်းရှိမည်ဖြစ်သည်။
ငွေကို အကြာဆုံး ၁၅ နှစ်အထိ အရစ်ကျပေးချေနိုင်သည်။

ထိုအိမ်ဝယ်ရန် ချေးငွေ အစီအစဉ် အသေးစိတ်ကို
ဧရာဝတီဘဏ်၏ အုပ်ချုပ်မှု ဒါရိုက်တာ ဦးမြင့်ဇော်ကို
မြန်မာတိုင်း(မ်)က မေးမြန်းထားပါတယ်။

- အိမ်ချေးငွေစနစ်ရဲ့ ပိုက်ဆံချေးတဲ့ ပုံစံကို ရှင်းပြပေးပါ။

အိမ်ချေးငွေစနစ် စလုပ်တဲ့အခါမှာ အိမ်ငှားတဲ့ဟာလေး
လုပ်ရအောင်။ ဘယ်သူ့ကို ငှားမလဲ။ ကျွန်တော်တို့ရယ်၊
ကျွန်တော်တို့ လူငယ်တွေရယ်၊ ဥက္ကဠ (ဦးဇော်ဇော်) ရယ်
ဆွေးနွေးဖြစ်ကြတဲ့အခါမှာ တန်ဖိုးသင့်တဲ့ ဟာကို
စဉ်းစားတယ်။

တန်ဖိုးသင့်တယ်ဆိုတာ ဘာကိုပြောတာလဲ။
ဘယ်အချိန်မှာ တန်ဖိုးသင့်တာလဲ။ ပိုက်ဆံချေးတဲ့ စနစ်လေး
ကို ပြောချင်တယ်။

သာမန်အားဖြင့် Cash Down ချရတာရှိတယ်။
ဥပမာ သိန်း ၃ဝဝ တန် တိုက်ခန်းတစ်ခုကို ၃ဝ ရာခိုင်နှုန်း
ဆိုရင် သိန်း ၁ဝဝ ပေးရတာပေါ့။
သိန်း ၂ဝဝ  ကျန်တယ်။ မူလကတော့ သိန်း ၂ဝဝ ကို
ငါးနှစ်လောက်ပဲရှိတယ်။ လ ၆ဝ ဖြစ်သွားမှာပေါ့။ အတိုးနဲ့
သူတို့ရဲ့ရတဲ့ဝင်ငွေနဲ့ဆိုရင် လောက်ပါ့မလား တွေးတာပေါ့။
၁၅ နှစ်ပေးနိုင်ရင် သူ ဘယ်လောက်ပေးရမလဲ စဉ်းစားတဲ့
အခါမှာ အကယ်လို့ သိန်း ၃ဝဝ တန်ကို ရှိစုမဲ့စု ထုခွဲပြီးတော့
ပေးထားတယ်။ ကျန်တဲ့ ၂ဝဝ ကို ၁၅ နှစ် ပေးရမယ်ဆိုရင်
ဝန်ထုပ်ဝန်ပိုး မရှိတော့ဘူး။

- ဧရာဝတီဘဏ်နှင့် ဘဏ်က မိတ်ဖက်လုပ်ထားတဲ့ အိမ်ခန်း
အရေအတွက် ဘယ်လောက်ရှိပါလဲ။

သိန်း ၂ဝဝ ကစတာ သိန်း ၁,ဝဝဝ အတွင်းကို တိုက်ခန်းပေါင်း
၁,၄၁၅ ခန်းလောက် ရှိမယ်။ သိန်း ၁,၂ဝဝ ကနေ သိန်း
၂,ဝဝဝ လောက် တိုက်ခန်းပေါင်း ၉၅ဝ လောက်ရှိပါတယ်။
ကျန်တဲ့ဟာကတော့ ကွန်ဒိုတွေပေါ့။
ဝယ်တဲ့သူလည်း ဝယ်ပေါ့။

- ဒီလိုငွေချေးတာနဲ့ပတ်သက်ပြီး ဆုံးရှုံးနိုင်ခြေ ဘယ်လောက်
လောက် ရှိပါလဲ။

ကျွန်တော်တို့ လုပ်ငန်းတွေက risk (ဆုံးရှုံးနိုင်ခြေ)ရှိတဲ့
လုပ်ငန်းတွေပါ။ ဒါပေမဲ့အိမ်တစ်အိမ် ပိုင်ဆိုင်ချင်တဲ့လူအတွက်
ကတော့ ကျွန်တော်တို့အနေနဲ့ လိုချင်လိမ့်မယ် လို့တော့
ယူဆပါတယ်။ ထိုက်သင့်တဲ့ risk ကတော့ ရှိပြီးသားပါ။
ထိုက်သင့်တဲ့ စိန်ခေါ်မှုလည်း ရှိပြီးသားဖြစ်ပါတယ်။

- ဒီချေးငွေစနစ်နဲ့ပတ်သက်ပြီး ကုမ္ပဏီတွေနဲ့ ညှိုနှိုင်းခဲ့တာ
ရှိတယ်လို့ သိရပါတယ်။ အဲဒီအကြောင်း ရှင်းပြပေးပါ။

ကုမ္ပဏီတွေကို သွားတဲ့အခါမှာ ကျွန်တော်တို့ပစ္စည်းရောင်း
တာထက်စာရင် ခင်ဗျားဒုက္ခလေးကို ရှင်းပေးချင်တယ်။
ဘာလဲဆိုတော့ ခင်ဗျားတို့မှာ အင်မတန်တော်တဲ့ ဝန်ထမ်း
၁ဝဝ မှာ ဒီ ၁ဝ ယောက်ကတော့ ငါရဲ့ကုမ္ပဏီကို၊
လုပ်ငန်းကို ဆက်ပြီးတော့ တာဝန်ယူတဲ့ လူတွေဆိုရင်
သူတို့ကို ဘာတစ်ခု လုပ်ပေးနိုင်မလဲ။

ခုနက ကျွန်တော်ပြောခဲ့တဲ့အတိုင်း ကနဦးပေးသွင်းငွေ
Down Payment က ၃ဝ ရာခိုင်နှုန်းရှိတာကို။
အဲဒီထဲက ၁ဝ ရာခိုင်နှုန်းလောက်ဖြစ်ဖြစ် ကနဦးကျခံပေး
လိုက်တယ်ဆိုရင် ရေရှည်လုပ်ဖို့အတွက် တစ်ခုလုပ်ပါဆိုရင်
ဝန်ထမ်းအတွက်လည်း ငွေရေးကြေးရေးဝန်ထုပ်ဝန်ပိုးကြီး
မရှိတော့တဲ့အပြင် ကုမ္ပဏီအတွက်ကလည်း ဝန်ထမ်း
အရွှေ့အပြောင်း အလားအလာ မရှိနိုင်တော့တဲ့အတွက်
ကြောင့် ကုမ္ပဏီ ၁၂ ခုလောက်အထိ သွားပြောတယ်။
သုံးခုလောက်က စိတ်ဝင်စားဟန်ပြတယ်။
ဒါကို ကျွန်တော်တို့က ဆက်လုပ်နေမှာပါ။

- ဒီချေးငွေစနစ် မတိုင်ခင်က ဘယ်လိုစနစ်တွေလုပ်ဆောင်
ခဲ့တာ ရှိသလဲ။

ဒီလိုဟာမျိုးမတိုင်ခင်က Auto Loan ဆိုပြီး ကားရောင်းတာ
လုပ်ခဲ့ပါတယ်။ တော်တော်လည်း အောင်မြင်ခဲ့ပါတယ်။

နောက်တစ်ခုက မြန်မာနိုင်ငံရဲ့ လူလတ်တန်းစားကို ခွဲခြားမှု
က တော်တော်လေးကို စိတ်ဝင်စားဖို့ ကောင်းပါတယ်။

ဒေါ်လာ ၁၅ဝ ကနေ ၁,ဝဝဝ အထိ ခွဲလိုက်မယ်ဆိုရင်
ဒီဈေးကွက်ကြီးက အကြီးကြီးပဲ။ တစ်ခါတလေကျရင် အဲဒီလိုမျိုး
လူလတ်တန်းစားလို့ ခေါ်မခေါ်ကို နည်းနည်းစဉ်းစားရတယ်။
မည်သို့ပင်ဖြစ်စေ ဒီဟာ အောင်မြင်သွားပြီဆိုရင် ဒီထက်
ကျွန်တော်တို့ ဆက်သွားလို့ ရတယ်။

- ဒီစနစ်ကြောင့် ဘယ်လိုအကျိုးရှိနိုင်မလဲ။

ကျွန်တော်တို့ ဧရာဝတီဘဏ်အနေနဲ့  Risk  ရှိပေမဲ့လည်း
ဒီဟာကို လုပ်ခဲ့တယ်။

လုပ်ခဲ့တဲ့အတွက် ဒါကြီးက အလေ့အထတစ်ခုအနေနဲ့
ဖြစ်သွားပြီးတော့ မြန်မာနိုင်ငံမှာရှိတဲ့ နိုင်ငံသားတိုင်းအတွက်
ကို သတ်မှတ်တဲ့ ဝင်ငွေလေးရှိပြီး လုံလောက်တဲ့
ပိုင်ဆိုင်မှုလေး၊ ငွေကြေးလေး ရှိတယ်ဆိုရင် အိမ်ပိုင်နိုင်တယ်။

၁၅ နှစ်တန်သည် နောင်နှစ် ၂ဝ၊ ၂၅ နှစ်တန်သည် ဘယ်သူ
ပြောနိုင်မလဲ။ ဒီစနစ်လေး တစ်ခုတည်ဆောက်နိုင်မယ် ဆိုရင်
ကျွန်တော်တို့ လူတွေအတွက် ကောင်းလာမယ်။ အိမ်ရာ
ဆောက်တဲ့သူတွေအတွက် အများကြီး အလားအလာ
ရှိသွားလိမ့်မယ်။

- အတိုးနှုန်းကို ဘယ်လိုသတ်မှတ်ခဲ့လဲ။

အတိုးနှုန်းကျတော့ ကျွန်တော်တို့သတ်မှတ်လို့မရဘူး။
နိုင်ငံတော်က သတ်မှတ်တဲ့ အတိုးနှုန်းကိုပဲ လိုက်ရတာပေါ့။
Flexible နည်းနည်း ရှိကောင်းရှိမယ်။ ဒါပဲ သတ်မှတ်လို့
ရမယ်။

- ရန်ကုန်မြို့ကို ဘာကြောင့်ရွေးချယ်တာပါလဲ။

ကျွန်တော် ရန်ကုန်မှာ အားဖြစ်ရင် မန္တလေး သွားမယ်။
မန္တလေးမှာ အားဖြစ်ရင် မော်လမြိုင် သွားရင် သွားမယ်။
ကျွန်တော်မြို့ကြီးတွေ သွားခြင်အားဖြင့် စားဝတ်နေရေး
ပြေလည် လာရင် တခြားဘာလုပ်ပေးလို့ရမလဲ စဉ်းစားလို့
ရတယ်။ ဘာလို့ ရန်ကုန်မှာစလဲဆိုတော့ ရန်ကုန်မှာ
အားစယူချင်လို့ပါ။

- ရှေ့ဆက် ဘာတွေလုပ်ဆောင်သွားမှာ ပါလဲ။

အလုပ်လုပ်တဲ့အခါကျတော့ ကျွန်တော်တို့က အားလိုတယ်။
ကျွန်တော်တို့ဆီကိုလာ တယ်။ လုပ်ငန်းဖြစ်တယ်။
လုပ်ငန်းဖြစ်တဲ့အခါမှာက သူတို့အတွက်က ဘဝတည်
ဆောက်ရေး ရသွားမယ်။

ဒီအားက အခုက အရင်ဆုံးအနေနဲ့ (ငွေချေးကာလ) ၁ဝ နှစ်
လုပ်တယ်။ အခု ၁၅ နှစ်လုပ်တယ်။ ကျွန်တော်တို့ ဘဏ်
အနေနဲ့ Risk  ရှိပါတယ်။ နိုင်ငံတကာမှာ ချေးနေတာက
နှစ် ၂ဝ တို့၊ ၂၅ တို့ ချေးနေတာပါ။ ကျွန်တော်တို့အနေနဲ့
၁၅ နှစ်၊ ၁ဝ နှစ် မယုံကြည်ဘူးဆိုရင် ကျွန်တော်တို့က
ဘာအားလိုလဲဆိုတော့ တကယ်လိုအပ်လို့ လုပ်တဲ့သူတွေ
ဒီအားလေးက နောက်လူတွေအတွက် အားဖြစ်ပါတယ်။

အရင့်အရင်တုန်းက ကျွန်တော်တို့ ဘာလို့ နှောင့်နှေး
ကြန့်ကြာလဲ ဆိုတော့ မပေးရင် ဘာလုပ်မလဲ။ မဖြစ်ရင်
ဘာလုပ်မလဲဆိုတော့ ဒါလေးကို ဖြတ်ကျော်ကြည့်တာပါ။
တကယ်လုပ်တဲ့သူအားနဲ့ စနစ်တကျ ဖြစ်လာပြီဆိုတဲ့အခါ
ကျမှ ကားလုပ်တာ ရှိတယ်။ အိမ်မှာ တီဗီဝယ်မယ်။
ဘာဝယ်မယ်တို့ ၊ ဆင့်ကဲဆင့်ကဲ လုပ်သွားဖို့ ရှိပါတယ်။

(ထက်ရှိုင်း)

credit - DVB & The Myanmar Times

***********

“အိမ်ခြံမြေ လမ်းဆုံ” မိတ်ဆွေများခင်ဗျာ -
------------------------------------------------

အိမ်ခြံမြေနဲ့ပတ်သက်တဲ့ ကြော်ငြာများအား
အောက်ပါ link ကိုနှိပ်၍ လေ့လာနိူင်ပါတယ်။

https://www.facebook.com/permalink.php?story_fbid=1183546585087612&id=726764717432470&substory_index=0