“ယနေ့ အိမ်ခြံမြေအပေါင်ဈေးကွက် အခြေအနေ”

“ယနေ့ အိမ်ခြံမြေအပေါင်ဈေးကွက် အခြေအနေ”

၁။ "အပေါင်ဈေးကွက်များပြားလာတဲ့ အိမ်ခြံမြေ"

အိမ်ခြံမြေဈေးကွက်အတွင်း အပေါင်ဈေးကွက် များပြား
လာတယ်လို့ သိရပါတယ်။

အိမ်ခြံမြေအပေါင်ဈေးကွက်ရဲ့သဘောသဘာဝကတော့
အခန်းတန်ဖိုးရဲ့ ၄၀ ရာခိုင်နှုန်းပေးချေတဲ့စာချုပ်တွေမှာ
အပေါင်ထားတဲ့မြေရှင်ဘက်က အရောင်းအဝယ်စာချုပ်ပုံစံ
စာချုပ်ချုပ်ပေးရသလို နေထိုင်တဲ့အိမ်ကလည်း
ဖယ်ပေးရပါတယ်။ 

သည်လိုအဖြစ် အပျက်တွေမှာ မြေပိုင်ရှင်ဘက်က အချို့
ကိစ္စတွေမှာ ဂျီပီ၊ အက်စ်ပီ လွှဲစာတွေနဲ့ပေးရတာတွေလည်း
ရှိပါတယ်။ တချို့တိုက်ခန်းအပေါင်မှာတော့ သတင်းစာမှာ
တရားဝင် ကြော်ငြာစာထည့်ပြီး
အပေါင်ခံတာတွေလည်း ရှိနေပါတယ်။

လူဖယ်ပေးရတဲ့အပေါင် အတိုးနှုန်းထားကတော့ ပုံမှန်ကို
လေးရာခိုင်နှုန်းလောက်ယူကြပြီး အတိုးသက်တမ်းကို
ခြောက်လအတွင်းသာ ချုပ်ကြပါတယ်။

မြေရှင်ဘက်ကလစဉ် အတိုးပေးဖို့ ခြောက်လပျက်ကွက်တာ
မျိုးဆိုရင် မြေရှင်က အပေါင်ယူထားတဲ့သူနဲ့ သဘောတူ
ထားတဲ့ ငွေကိုယူပြီး အပေါင်အဆုံးခံရတာဖြစ်ပါတယ်။

တချို့ ကတော့ အိမ်ခြံမြေကို ဝယ်ယူတာမျိုးမလုပ်တော့ဘဲ
အထောက်အထားမှန်ကန်တဲ့  အပေါင်မြေကွက်တွေကို
လက်ခံပြီး ငွေလှည့်ကစားတာတွေ ရှိနေပါတယ်။

အပေါင်ဈေးကွက်မှာတော့ လုံးချင်းတိုက်တွေကို
သိန်း ၁၅၀ လောက်နဲ့ ဖြတ်ပြီး တိုက်ခန်းတွေကိုတော့
သိန်း ၅၀ လောက်နဲ့ ဈေးဖြတ်တာများပါတယ်။

"အပေါင်လက်ခံကတည်းက အဲဒီအိမ်ကို နောက်ထပ်
အိမ်ငှားထားခွင့်ပေးရတယ်၊ အိမ်ကရတဲ့ အတိုးကိုလဲရတော့
အစစ်အမှန် ဂရန်သေချာတဲ့အိမ်တွေကို စိတ်ဝင်စားကြတယ်”
လို့  သုခအိမ်ခြံ မြေ အကျိုးဆောင်လုပ်ငန်းက ကိုနန္ဒက
ပြောပါတယ်။

- အပေါင်အတိုးနှုန်းတွေကတော့ လူဆင်းတဲ့ အိမ်တွေကို
လေးရာခိုင်နှုန်းနဲ့
- လူမဆင်း အ ပေါင်ခံထားမှုမှာတော့ ခြောက်ကျပ်နှုန်း
ဖြစ်ပါတယ်။
- မြေတန်ဖိုးရဲ့ ၂၀ ရာခိုင်နှုန်းကနေ ၄၀ ရာခိုင်နှုန်းလောက်
အထိသာ တန်ဖိုးဖြတ်ကြပြီး အပေါင်ထားမယ့်အိမ်ရဲ့
စာချုပ်စာတမ်းနဲ့ အချက်အလက်တွေကို သက်ဆိုင်ရာ
ဝန်ကြီးဌာနတွေမှာ စစ်ဆေးပြီးမှ လက်ခံကြတာများပါတယ်။

(ပြည့်ဖြိုးမြင့်မွန်)

***

၂။ "အိမ်ခြံမြေ အပေါင်ဆုံးသည့် ဖြစ်ရပ်များ ဈေးကွက်
အတွင်း ပိုမိုများလာ"

အိမ်ခြံမြေဈေးကွက်အတွင်း၌ အရောင်းအ၀ယ်ထက်
အိမ်ခြံမြေပေါင်နှံမှုများ ပိုမို များပြားလာနေပြီး ပေါင်နှံထားသည့်
အိမ်ခြံ မြေများကို ပြန်လည်ရွေးယူနိုင်ခြင်းမရှိသည့် ဖြစ်ရပ်များ
တစ်နေ့တခြား ပိုမိုများပြားလာနေကြောင်း မြန်မာနိုင်ငံ
အိမ်ခြံမြေ၀န်ဆောင်မှုအသင်း (ဗဟို) ဒုတိယဥက္ကဋ္ဌ
ဦးသန်းဦးက မြန်မာတိုင်း(မ်)ကို ပြောသည်။

"အိမ်ခြံမြေဈေးကွက်ထဲကို သာမန်ပြည်သူတွေ၊
လူလတ်တန်းစားတွေက ရှိစုမဲ့စုနဲ့ ၀င်လာကြတဲ့ လူတွေ
ရှိသလို တချို့ဆို မြတ်မလား ဆိုပြီး ပေါင်နှံချေးငှားပြီးမှ
ဝင်လာကြတဲ့လူ တွေလည်း ရှိတယ်။
ဒီလူတွေက ဈေးကွက် အေးတာကြာတော့
စရိတ်တက်တဲ့ဒဏ်၊ အတိုးတက်တဲ့ဒဏ်ကို မခံနိုင်ကြတော့
ဝယ်ထားတာတွေကို ပြန်ရောင်းချင်ကြတယ်။
အိမ်ခြံမြေဈေးကွက်ကြီး အရမ်းထိုင်းမှိုင်းလာတော့
ဝယ်လက်တွေက ရှားသွားတယ်။
ရှိတဲ့ဝယ်လက်တွေကလည်း အောက်ဈေးနဲ့ပဲ ၀ယ်ကြတော့
ပေါင်နှံတဲ့ကိစ္စတွေ ဖြစ်လာတယ်။
မျှော်လင့်ချက်နဲ့ တခြားစီးပွားရေးကနေ ငွေပြန်ဝင်လာ
ကြမယ်ထင်ပြီး အိမ်တွေ မြေတွေ ပေါင်ကြတာများတယ်။
အိမ်ပေါင်ပြီး ရတဲ့ငွေနဲ့လုပ်တဲ့ တခြားစီးပွားရေးတွေကလည်း
အဆင်မပြေကြတော့ ပေါင်ထားတဲ့ အိမ်တွေအတွက် လစဉ်
အတိုးတွေတက်၊ အချိန်တွေကြာလာပြီး ပေါင်ထားတဲ့
အိမ်ခြံမြေပါ ပြန်မရွေးနိုင်တော့လို့ ဆုံးကုန်တာ
အခုနောက်ပိုင်းမှာတော်တော်များလာတယ်" ဟု
၎င်းက ပြောသည်။

ကာလရှည်ကြာ အရောင်းအ၀ယ်အေး စက်နေသည့်
အိမ်ခြံမြေဈေးကွက်အတွင်း၌ငွေကြေးလိုအပ်သူများက
မိမိတို့ပိုင်ဆိုင်သည့် အိမ်ခြံမြေများကို ပေါင်နှံလာကြသည့်
အတွက် အပေါင်ဈေးကွက် တွင်ကျယ်လျက်ရှိသည်။

အိမ်ခြံမြေ၊ ကွန်ဒိုတိုက်ခန်းများကို အရောင်းအ၀ယ်
ပြုလုပ်ရာတွင် ရောင်းချသည့်တန်ဖိုး၏ငွေကျပ် ၁၀၀ လျှင်
နှစ်ကျပ်အတိုးနှုန်းဖြင့် အကျိုးဆောင်ခ ရယူလုပ်ကိုင်ကြခြင်း
ဖြစ်ပြီး၊
အပေါင်ဈေးကွက်တွင်မူ ပေါင်နှံသူက ငွေရှင်ထံသို့
လစဉ်ပေးရမည့် အတိုးနှုန်း၏ တစ်လစာကိုအကျိုးဆောင်ခ
အဖြစ် ရယူလုပ်ကိုင် လျက်ရှိသည်။

"ဈေးကွက်ပေါက်ဈေးရဲ့ တစ်ဝက်ဈေးနဲ့ အရောင်းအ၀ယ်
စာချုပ်ချုပ်ပြီး အပေါင်ခံတာများတယ်။
နှစ်အချက်က လက်ရောက် ရယူမှုကိုငွေရှင်ဘက်ကို
အပြည့်ပေးရတယ်။
ရှင်းရှင်းလင်းလင်းပြောရရင် အိမ်ပေါ်ကနေ လူဆင်းပေးရတဲ့
အပြင် တံခါးပိတ်ပြီး ငွေရှင်ကိုသော့ပါအပ်လိုက်ရတယ်။
အခုအပေါင် ဆုံးတဲ့ ပြဿနာတွေက အိမ်ခြံမြေဈေးကွက်
ကလည်း ပြန်တက်မလာတဲ့အပြင် တခြားစီးပွားရေးကလည်း
မကောင်းတော့ ပြန်မရွေး နိုင်တော့ဘဲ ဆုံးရှုံးကုန်တာ
ဖြစ်တယ်။ လူမဆင်းရင်တော့ ငွေရှင်ကအပေါင်မခံဘူး" ဟု
၎င်းက ပြောသည်။

၂၀၁၅ ခုနှစ် နှစ်ဆန်းပိုင်းမှစတင်ကာ အိမ်ခြံမြေဈေးကွက်
အတွင်း ၀ယ်လက်များမရှိသလောက် နည်းပါးသွားသည့်
အတွက် ယနေ့အချိန်ထိဆိုလျှင် အိမ်ခြံမြေဈေးကွက်
ကျဆင်းလျက်ရှိသည်မှာ တစ်နှစ်ခွဲကျော်၊ နှစ်နှစ်နီးပါး ကာလ
အတွင်းသို့ ရောက်ရှိလာပြီဖြစ်သည်။

ကွန်ဒိုမီနီယမ်တိုက်ခန်းများ၊ လူနေတိုက်ခန်းများထက်
လုံးချင်းအိမ်များ၊ မြေကွက်များကိုပိုမိုပေါင်နှံမှု များပြားကြောင်း
အိမ်ခြံမြေအကျိုးဆောင်များထံမှ သိရသည်။

အိမ်ခြံမြေပေါင်နှံသူအများစုမှာ ငွေကြေးလည်ပတ်ရန် မိမိပိုင်
အိမ်ခြံမြေများကို ပေါင်နှံကာ အခြားစီးပွားရေးလုပ်ငန်းများတွင်
ထည့်သွင်းရင်းနှီးမြှုပ်နှံမှုပြုပြီး ပြန်လည် မြတ်စွန်းသည့်
အမြတ်ဖြင့် ပေါင်နှံထားသည့် အိမ်ခြံမြေများကို ပြန်လည်
ရွေးယူနိုင်သည့် စိတ်ကူးများဖြင့် ပေါင်နှံကြခြင်းရှိသလို
ငွေကြေးလိုအပ်သည့်အတွက် ပေါင်နှံသူများလည်း
အများအပြားရှိနေဆဲဖြစ်သည်။

အိမ်ခြံမြေဈေးကွက်ကျဆင်းမှု ကာလတာရှည်လာခြင်း၊
ပြန်လည်ရောင်းချရာတွင်လည်းဝယ်ယူသူအများစုက
နိမ့်ပါးသည့် ဈေးနှုန်းများဖြင့်သာ ၀ယ်ယူလိုခြင်းကြောင့်
မိမိတို့ပိုင်ဆိုင်သည့် အိမ်ခြံမြေများကိုငွေကြေးလည်ပတ်စေရန်
ပေါင်နှံကြခြင်းဖြစ်သည်။

ပေါင်နှံသည့်အချိန်တွင် ငွေရှင်ဘက်က ပေါင်နှံလိုသည့်
အိမ်ခြံမြေကို ဈေးကွက်ပေါက်ဈေး၏ထက်ဝက် ပမာဏ
ရှိနိုင်သည့် ငွေကြေးကိုသာ အများဆုံး ငွေထုတ် ချေးပေးသည့်
ငွေရှင်များရှိသကဲ့သို့ ဈေးကွက် ပေါက်ဈေး၏ ၃၀ ရာခိုင်နှုန်း
ကိုသာ ငွေထုတ်ချေးသည့်ငွေရှင်များလည်း ရှိနေဆဲဖြစ်သည်။

ထို့ပြင် ငွေရှင်များက ပိုင်ဆိုင်မှု ခိုင်မာ သေချာစေရန်
အရောင်းအ၀ယ်စာချုပ်များအပြင် သတ်မှတ်ကာလအတွင်း
ပြန်လည် ရွေးယူနိုင်သည့် အပေါင်စာချုပ်များကို ပူးတွဲ
ချုပ်ဆိုကာငွေထုတ်ချေးသည့်စနစ် ကို ကျင့်သုံးလျက်ရှိပြီး
ကျပ် ၁၀၀ လျှင် ခြောက်ကျပ်အတိုးနှုန်းဖြင့်
ရယူလုပ်ကိုင် လျက်ရှိသည်။

အပေါင်ခံသည့် ကာလကိုလည်း အများဆုံး ခြောက်လမှ
တစ်နှစ် အတွင်း ပြန်လည်ရွေးယူရန်တစ်ပါတည်း
သတ်မှတ်ကာ စာချုပ်များတွင် ထည့်သွင်းချုပ်ဆို
ပေါင်နှံကြခြင်းဖြစ်သည်။

မြန်မာနိုင်ငံတွင် ပြင်ပပေါင်နှံခြင်းကို ဥပဒေအရ
အသိအမှတ်ပြုထားခြင်း မရှိသည့် အတွက်ပေါင်နှံလိုသည့်
အဆောက်အအုံ များကို အသိသက်သေများဖြင့်
အရောင်းအ၀ယ် စာချုပ်များချုပ်ဆိုကာ ပေါင်နှံလိုသူ နှင့်
ငွေရှင်နှစ်ဦး သဘောတူညီချက်များဖြင့်
လုပ်ကိုင်နေကြခြင်းဖြစ်သည်။

"အခုနောက်ပိုင်းဆိုရင် ကာလတန်ဖိုးရဲ့ သုံးချိုးတစ်ချိုး
လောက်ပဲ ငွေရှင်ဘက်ကပေးတော့တယ်။
အဲဒါတောင် ပြန်မရွေးနိုင် တော့တဲ့လူတွေ အများကြီး။
ရောင်းမယ်ဆိုရင်လည်း ၀ယ်လက်က အောက်ဈေးလောက်
ပဲပေးကြတော့ ပေါင်ကြတယ်။
အတိုးအရင်းမပေးနိုင်လို့ အဆုံးခံလိုက်တဲ့လူတွေရှိသလို
တချို့ကျတော့လည်း ငွေရှင်နဲ့ညှိပြီး ရတဲ့ဈေးနဲ့
ပြန်ရောင်း၊ ငွေရှင်ကို ပေးစရာ ရှင်းစရာ ရှိတာရှင်းပြီး
ပိုတဲ့ငွေလေး သုံးပေါ့။
အဓိက ပြဿနာကတော့ နေရာတိုင်းမှာ စီးပွားရေး
မကောင်းလို့ အပေါင်ဆုံးတွေ ဖြစ်ကုန်တာ" ဟု
ဒဂုံမြို့သစ်မြောက်ပိုင်း အေးရိပ်စံ အိမ်ခြံမြေအကျိုးဆောင်
လုပ်ငန်းပိုင်ရှင် ဒေါ်နီလာကျော်ကပြောသည်။

အိမ်ခြံမြေများကို ဘဏ်များတွင် သွား ရောက်ပေါင်နှံရာတွင်
ပြင်ပငွေရှင်များထံသို့ ပေးရသည့်အတိုးနှုန်းထက်
ဘဏ်များက ရယူသည့်အတိုးနှုန်း အလွန်သက်သာမှုရှိသည့်
အားသာချက်များရှိသော်လည်း
များပြားလှသည့် စာရွက်စာတမ်း အဆင့်ဆင့် ဖြတ်သန်းရခြင်း၊
ဝင်ငွေရရှိနိုင်သည့်လုပ်ငန်း များကို ပြသရခြင်းကြောင့်
အများစုမှာ ပြင်ပ လုပ်ငန်းရှင်များထံ၌သာ သတ်မှတ်
အတိုးနှုန်း တစ်ခုဖြင့် ပေါင်နှံနေကြရခြင်းဖြစ်သည်။

(ဇေယျာလင်း)

credit - Kumudra Journal & The Myanmar Times

“အိမ်ခြံမြေ လမ်းဆုံ” မိတ်ဆွေများခင်ဗျာ -
------------------------------------------------

အိမ်ခြံမြေနဲ့ပတ်သက်တဲ့ ကြော်ငြာများအား
အောက်ပါ link ကိုနှိပ်၍ လေ့လာနိူင်ပါတယ်။

https://www.facebook.com/726764717432470/photos/a.727586294016979.1073741828.726764717432470/962655320510074/?type=3