"ပါမစ်မြေကို ၀ယ်မည်ဆိုလျှင်"

"ပါမစ်မြေကို ၀ယ်မည်ဆိုလျှင်"

''မြေကွက်ဝယ်ဖို့ သွားကြည့်ပြီး ပြန်လာတာ'' ဟု
မိတ်ဆွေတစ်ဦးက စာရေးသူ၏ ရုံးခန်းသို့
ဝင်လာစဉ် ပြောလိုက်ခြင်း ဖြစ်သည်။

''ဘာတွေမြင်တွေ့ခဲ့ပြီး၊ ဘယ်လို ဖြစ်လာလဲ'' ဟု
စာရေးသူက မိတ်ဆွေ၏ အမူအရာကို ကြည့်၍
မေးလိုက်ပါသည်။

''မြေကွက်က ရှင်းထားတော့ ကြည့်ရတာ အဆင်ပြေ
ပါတယ်။ သူတို့ ပြောစကားအရတော့ ပါမစ် မြေကွက်
လို့ ပြောတယ်''

''ပါမစ်မြေကွက် ဖြစ်ကြောင်း အထောက်အထား
ခိုင်လုံရင်တော့ ဝယ်သင့်ပါတယ်''

''စာရွက်စာတမ်းတော့ ပြတယ်''

''အဲဒီတော့ အခုရောင်းမယ်ဆိုတဲ့ သူ အမည်နဲ့
ပါမစ်ရထားတဲ့ မြေကွက်လား''

''အဲဒါတော့ မဟုတ်ဘူး''

''မဟုတ်ဘူးဆိုတော့ ဘယ်လို ဖြစ်နေလို့လဲ''

''အခုရောင်းမယ်ဆိုတဲ့ သူက ဝယ်ထားတဲ့
ကတိစာချုပ်တော့ ရှိတယ်''

''အရပ်စာချုပ် ဖြစ်မှာပေါ့''

''အေး အရပ်စာချုပ်ဆိုတဲ့ စကား မကြာခဏကြားနေ
ရတယ်။ အဲဒီအရပ်စာချုပ်ဆိုတာက၊ ဘယ်လို စာချုပ်မျိုး
ကို ခေါ်တာလဲ၊ ရှင်းပြပေးပါဦး''

''ပစ္စည်းလွှဲပြောင်းခြင်း ဥပဒေ နဲ့ စာချုပ်စာတမ်း မှတ်ပုံတင်
ဥပဒေတို့ အရ မရွှေ့မပြောင်းနိုင်သော ပစ္စည်းများဖြစ်တဲ့
အိမ် မြေ စသည်တို့ကို ရောင်းချသည့်အခါ မှတ်ပုံတင်
အရောင်းအဝယ် စာချုပ် ချုပ်ဆိုမှ တရားဝင်
ပိုင်ဆိုင်ခွင့် ရမှာ ဖြစ်တယ်''

''မှတ်ပုံတင် အရောင်း စာချုပ် ချုပ်ရင် အမြတ်ခွန်
ဆောင်ရတယ်ဆို ဟုတ်လား''

''ဥပဒေနဲ့အညီ တရားဝင် အရောင်းအဝယ်ပြုလုပ်မယ်
ဆိုရင်တော့
ပထမဆုံး ဝယ်ယူမယ့်မြေ၊ အဆောက်အအုံတို့ကို
တန်ဖိုးဖြတ်ဖို့ ပစ္စည်းတန်ဖိုးဖြတ်အဖွဲ့ထံ တင်ပြရတယ်။
တန်ဖိုးသတ်မှတ်ချက်အပေါ် မူတည်ပြီး ဝင်ငွေရလမ်း
ပေါ်မှာ အခြေတည်လို့ ဝယ်ခွန် ဆောင်ရတယ်။
ပြီးမှ အရောင်းအဝယ် မှတ်ပုံတင် စာချုပ်ကို
စာချုပ်စာတမ်းမှတ်ပုံတင်ရုံးမှာ ချုပ်ဆို ကြရတယ်။
အချို့ကလည်း ပြန်ရောင်းမယ်ဆိုတဲ့ ရည်ရွယ်ချက်နဲ့
မှတ်ပုံတင် အရောင်းအဝယ် စာချုပ် မချုပ်ဆိုကြတာ
လည်း ရှိတယ်။
အချို့လည်း သူငယ်ချင်းယူဆသလို ဝယ်ခွန်
မဆောင်နိုင်သေးလို့ ဆိုပြီး မှတ်ပုံတင် အရောင်းအဝယ်
စာချုပ် မချုပ်သေးတာလည်း ရှိတယ်။
အဲဒီလို အခြေအနေမျိုးမှာ ရောင်းသူ ဝယ်သူတို့ရဲ့ တာဝန်
များကို ဖော်ပြချုပ်ဆိုထားကြတဲ့ အိမ် မြေ အရောင်းအဝယ်
ကတိ စာချုပ်များကို ချုပ်ဆိုထားတတ်ကြတယ်''

''ကတိစာချုပ်ဆိုရင်တော့ မှတ်ပုံတင်ဖို့ မလိုဘူးပေါ့
ဟုတ်လား''

''မှန်ပါတယ်။
ပစ္စည်း လက်ဝယ်ရရှိထားပေမယ့် ဥပဒေနဲ့အညီ တရားဝင်
ပိုင်ဆိုင်ခွင့် အတွက် ဆောင်ရွက်ပေးရမယ့် တာဝန်၊
ဝယ်ယူသူဘက်ကလည်း ပစ္စည်းတန်ဖိုး ပေးချေရမည့်
အခြေအနေ၊ ဝယ်ခွန်ကိစ္စ စသည်ဖြင့် တာဝန်များကို
ဖော်ပြပြီး ကတိပြု စာချုပ် အဖြစ် ချုပ်ဆိုထားကြတာပဲ
ဖြစ်တယ်။
ကတိစာချုပ်ကတော့ သူငယ်ချင်းပြောသလို မှတ်ပုံတင်ဖို့
မလိုအပ်သေးဘူး။
အဲဒီလို ရောင်းသူ ဝယ်သူတို့ရဲ့ ကတိပြုဆောင်ရွက်ချက်
တွေ ဖော်ပြချုပ်ဆိုတဲ့ အရောင်းအဝယ် ကတိစာချုပ်မျိုး ကို
အရပ်စာချုပ်လို့ ခေါ်ကြ တာ ဖြစ်တယ်။
လွတ်လွယ်မှတ်ထားမယ် ဆိုရင်တော့ စာချုပ်စာတမ်း
မှတ်ပုံတင် ဥပဒေနဲ့အညီ မှတ်ပုံ တင်ထားခြင်းမရှိဘဲ
ချုပ်ဆိုထားတဲ့ ကတိစာချုပ်များသည် အရပ်စာချုပ်များ
ဖြစ်တယ်လို့ မှတ်သားထား ရမှာ ဖြစ်တယ်''

''ပါမစ်မြေကွက်ဆိုရင် စာချုပ်စာတမ်း မှတ်ပုံတင်ရုံးမှာ
မှတ်ပုံတင်ခွင့် မရဘူးဆိုတာ ဟုတ်သလား''

''ဂရန်မြေနဲ့ဘိုးဘွားပိုင်မြေ တို့ကို ဝယ်မယ်ဆိုရင်တော့
မဖြစ်မနေ မှတ်ပုံတင် အရောင်းအဝယ် စာချုပ်ပြုလုပ်မှ
တရားဝင် အရောင်း အဝယ်မြောက်ပြီး ပိုင်ဆိုင်ခွင့်ကို
ဥပဒေနဲ့အညီရပိုင်ခွင့်ရှိမှာ ဖြစ်တယ်။
ပါမစ်မြေကွက်တွေကို တော့ စာချုပ်စာတမ်း မှတ်ပုံတင်
ဥပဒေအရ မှတ်ပုံတင်ရန် မလိုအပ်ပါဘူး။
အရောင်းအဝယ် ကတိစာချုပ်နဲ့ လွှဲပြောင်းရောင်းချကြပြီး
ဂရန်လျှောက်ထားကြရမှာ ဖြစ်ပါတယ်''

''ပါမစ် အတုတွေလည်း ရှိ တယ်လို့ ကြားဖူးတယ်။
ဟုတ်ပါ သလား''

''အတုမရှိဘူးလို့တော့ မပြောလိုဘူး။
အဓိကအချက်ကတော့ ဝယ်မယ်ဆိုတဲ့သူ အနေနဲ့
စာရွက် စာတမ်းကို သေချာစုံစမ်းဖို့တော့ လိုတာပေါ့။
အခု သူငယ်ချင်းသွားကြည့်တယ်ဆိုတဲ့ မြေကွက်ဘေး
ပတ်ဝန်းကျင်က ဘယ်လို အခြေအနေ ရှိသလဲ''

''အချို့လည်း အိမ်ဆောက်ထားတာ တွေ့ရတယ်။
မြေကွက်လပ်တွေလည်း အတော်များများ ရှိသေးတယ်''

''အခု ရောင်းမယ်ဆိုတဲ့ မြေကွက်က ကာရံထားတာ
ရှိလား''

''ယာယီသဘောဝါးကပ်တွေနဲ့ ကာထားတာတော့
တွေ့တယ်။ အုတ်တိုင်တွေ စိုက်ထားတာလည်း တွေ့ခဲ့တယ်။
စာရွက်စာတမ်း မှန် မမှန်ကို ဘယ်မှာသွားစစ်ဆေးရသလဲ''

''ရန်ကုန်မြို့တော် စည်ပင် သာယာရေးကော်မတီက
ထုတ်ပေးထားတဲ့ မြေချပါမစ်နဲ့ မြို့ရွာနှင့် အိုးအိမ်ဖွံ့ဖြိုးရေး
ဦးစီးဌာနက ထုတ်ပေးတဲ့ မြေချပါမစ်နှစ်မျိုးရှိတယ်''

''ဒါဆိုရင် သက်ဆိုင်ရာ ရုံး ဌာနတွေမှာ စုံစမ်းရမှာပေါ့''

''မှန်ပါတယ်။
သက်ဆိုင်ရာ ဌာနက ထုတ်ပေးထားတဲ့ မြေချပါမစ်ဟာ
စာရွက်စာတမ်းပြည့်စုံမှုရှိ မရှိ၊ ရောင်းသူနဲ့ အမည်ပေါက်
မည်သို့ ဆက်စပ်မှုရှိ မရှိကတော့ သေချာမေးမြန်းဖို့
လိုတယ်''

''စုံစမ်းလို့ရအောင်ဆိုပြီး မြေချပါမစ် စာရွက်စာတမ်းကို
ဓာတ်ပုံမိတ္တူကူးပြီး ယူလာတယ်။ စုံမစုံကြည့်ပေးပါဦး''

''မိသားစု ဓာတ်ပုံများ လို အပ်နေသလားလုိ့''
စာရေးသူက စာရွက်စာတမ်းဓာတ်ပုံ မိတ္တူများကို ကြည့်၍
မေးလိုက်ခြင်းဖြစ်သည်။

''သူတို့ပေးလိုက်တာတော့ ဒီ စာရွက်တွေ အကုန်ပဲ''

''မြေချပါမစ်မှာ
အိမ်ရာ ဆောက်လုပ်နေထိုင်ခွင့် လက်မှတ် (မြေပါမစ်)၊
မြေကွက် ဖော်ပြထားတဲ့ မြေကွက်အမှတ်နဲ့
အကျယ်အဝန်းပြမြေပုံ၊
ရွှေ့ပြောင်းနေထိုင်မည့် သူများ၏ ရာဇဝင်အကျဉ်းချုပ်
စာရွက်နဲ့
မိသားစုဓာတ်ပုံတို့ ပါရှိ ရတယ်''

''စာရွက်စာတမ်း လေးမျိုး ပေါ့''

''ဟုတ်တယ်။
ဒီမှာက မိသား စုဓာတ်ပုံ မပါလာတော့ စိစစ်ဖို့လိုလိမ့်မယ်။
ဒီမြေကွက်ကို စွပ်စွဲပြောတာတော့ မဟုတ်ဘူး။
တစ်ခါ တစ်ရံမှာ ပါမစ်မူရင်းပျောက်သွားလို့ အသစ်
လျှောက်ထားကြတာလည်း ရှိတယ်။
မူရင်းကောက်ရသူ က သူဝယ်ထားတဲ့ မြေကွက်ပါ ဆိုပြီး
ပါမစ် စာရွက်မှာပါတဲ့ မိသားစု ဓာတ်ပုံကို ဖြုတ်ထားလို့
လက်လွှဲ ရောင်းချတာလည်းရှိတတ်တယ်။
ဒါကြောင့် မှားယွင်းမဝယ်မိစေဖို့ သက်ဆိုင်ရာရုံးဌာနမှာ
စုံစမ်းစိစစ်ပြီးမှ ဝယ်သင့်တယ် သူငယ်ချင်း'' ဟု
အကြံပြုဆွေးနွေးလိုက်ပါသည်။

ထီယု (ဥပဒေအတိုင်ပင်ခံ)

credit - Zaygwet Journal

“အိမ်ခြံမြေ လမ်းဆုံ” မိတ်ဆွေများခင်ဗျာ -
------------------------------------------------

အိမ်ခြံမြေနဲ့ပတ်သက်တဲ့ ကြော်ငြာများအား
အောက်ပါ link ကိုနှိပ်၍ လေ့လာနိူင်ပါတယ်။

https://www.facebook.com/726764717432470/photos/a.727586294016979.1073741828.726764717432470/1183546585087612/?type=3&theater