"မြို့သစ်များ ဖော်ဆောင်ရာတွင် အခြေခံအဆောက်အအုံလိုအပ်ချက်
များစွာရှိနေကြောင်း ကျွမ်းကျင်သူများ ထောက်ပြ"
ရန်ကုန်မြို့သစ်စီမံကိန်းများအဖြစ်
အရှေ့ပိုင်းမြို့သစ်စီမံကိန်းများ၊
အနောက်တောင်ပိုင်းမြို့သစ်စီမံကိန်းများကို
အကောင်အထည်ဖော်လုပ်ဆောင်နေသော်လည်း
အခြေခံ အဆောက်အအုံများ
ဆောက်လုပ်ရာတွင် အားနည်းမှုများစွာရှိနေကြောင်း
ကျွမ်းကျင်သူများက ပြောသည်။
ရန်ကုန်တိုင်းဒေသကြီး လွှတ်တော်တွင် ယခုနှစ် ဇွန်လက
အတည်ပြုခဲ့သော
မဟာရန်ကုန်မြို့ပြဖွံ့ဖြိုးရေး မဟာဗျူဟာစီမံကိန်း ၂၀၄၀ အရ
ဦးစားပေးမြို့နယ်များဖြစ်သည့်
ရန်ကုန် အရှေ့ပိုင်းမြို့သစ်များအပြင်
ယခုလ အတွင်း နိုင်ငံပိုင်သတင်းစာများတွင် တင်ဒါခေါ်ယူထားသော
(ရန်ကုန်အနောက်တောင်ပိုင်းမြို့သစ်) ရန်ကုန်မြို့သစ်စီမံကိန်းများအရ
မြို့သစ်များကိုဖော်ဆောင်နေသော်လည်း မြို့သစ်တစ်ခုအတွက်
မဖြစ်မနေထည့်သွင်း တည်ဆောက်ရန်လိုအပ်သော
အခြေခံအဆောက်အအုံများ ထည့်သွင်းတည်ဆောက် မှုများမှာ
လွန်စွာအားနည်းနေကြောင်း မြို့ပြ ပညာရှင်များက ပြောသည်။
"မြို့သစ်တွေ တည်ဆောက်မယ်ဆိုရင်
မြေကွက်ကို အကွက်ချရောင်းပြီး ဖော်နေသလိုဖြစ်နေတယ်။
ဘယ်လောက် စတုရန်းမီတာမှာဘယ်လိုအခြေခံအဆောက်အအုံ မျိုးကို
ထည့်သွင်းတည်ဆောက်မယ်ဆိုတာ
တိကျတဲ့မူဝါဒတို့၊စီမံချက်တို့ မရှိဘူး။
စီမံကိန်း အသစ်တွေ အကောင်အထည်ဖော်မယ် ဆိုရင်
နေရာဘယ်လောက်အကျယ်မှာ လူဦးရေ
ဘယ်လောက်တိုးတက်လာမယ်။
သူတို့အသုံးပြုမယ့်အမှိုက်တို့၊ရေဆိုးစတာတွေကို
သေချာတွက်ချက်ထားတာမျိုး လည်း မရှိဘူး။
သုတေသနပြုလုပ်တာအရမ်း အားနည်းတယ်။
အကောင်အထည်ဖော်မယ့် စီမံကိန်းအသစ်အတွက်
တိကျတဲ့ သုတေသနပြုလုပ်တာတွေ လိုအပ်တယ်"ဟု
အိမ်ခြံ မြေအကြံပေးနှင့် အာရှဆောက်လုပ်ရေး လုပ်ငန်း
အထွေထွေမန်နေဂျာဦးရန်အောင် က ပြောသည်။
ယခုမှတည်ထောင်သော မြို့သစ်များ သာမက
ယခင်ကတည်းက တည်ထောင်ခဲ့ သော မြို့သစ်များတွင်ပင်
အခြေခံအဆောက် အအုံများအားနည်းလျက်ပင်ရှိကြောင်း
ကျွမ်းကျင်သူများက ပြောသည်။
"ရန်ကုန်မြို့နယ်မှာ မြို့သစ်တည်မယ်ဆိုရင် မြို့အင်္ဂါရပ်တွေနဲ့
ညီညွတ်စေမယ့် အခြေခံအဆောက်အအုံစီမံကိန်းတွေကို
ထည့်သွင်းတည်ဆောက်ခဲ့တာမျိုး မရှိတာက
၁၉၅၈-၆၀ခုနှစ်လောက်ကမြို့သစ်တွေစတည်ခဲ့တဲ့
အချိန်ကတည်းကပါပဲ။
အခုမှ စတင်တည်တဲ့မြို့သစ်တွေမပြောနဲ့ ။
လွန်ခဲ့တဲ့ နှစ်ငါးဆယ်ကျော်လောက်ကတည်းက
စတင်တည်ထောင်ခဲ့တဲ့မြို့သစ်တွေဖြစ်တဲ့
တောင်ဥက္ကလာ၊ မြောက်ဥက္ကလာ၊ သာကေတ နဲ့
သုဝဏ္ဏမြို့သစ်တွေမှာတောင်
အခြေခံအဆောက်အအုံအားနည်းတာတွေရှိခဲ့လို့
ခုမှ ဖွံ့ဖြိုးကာစမြို့နယ်အဆင့် လောက်ပဲရှိသေးတယ်"ဟု
ဦးရန်အောင်က ပြောသည်။
ဦးစွာ အကောင်အထည်ဖော်လျက် ရှိသော
ရန်ကုန်အရှေ့ပိုင်းမြို့သစ်စီမံကိန်းက မြို့သစ်များကိုပိုမိုဖွံ့ဖြိုးစေရန်
အခြေခံအဆောက်အအုံပိုင်းကို အကောင်အထည်ဖော်မှုများကို
ပြီးစီးအောင်မပြုလုပ်ဘဲ
ရန်ကုန် အနောက်တောင်ပိုင်းမြို့သစ်စီမံကိန်းများကို
ထပ်မံပြုလုပ်နေသည့်အပေါ်လည်းကျွမ်း ကျင်သူများက
ဝေဖန်ကြသည်။
အိမ်ခြံမြေအတိုင်ပင်ခံတစ်ဦးဖြစ်သူ ဦးမြတ် မင်းကလည်း
"ရန်ကုန်မြို့မှာ မြို့သစ်တွေက တစ်မြို့ပြီး တစ်မြို့တိုးလာပေမယ့်
အခြေခံအဆောက်အအုံတွေသာမဆောက်ပေးနိုင်ဘူးဆို ရင်
အချိန်တိုအတွင်း ဖွံ့ဖြိုးတိုးတက်တဲ့ မြို့သစ်တွေ ဖြစ်လာဖို့မလွယ်ဘူး၊
မြို့သစ် တွေ အများကြီးတည်နေမယ့်အစား မြို့သစ်အနည်းငယ်ကိုပဲ
ရွေးချယ်ပြီး အခြေခံအဆောက်အအုံတွေ
ပြည့်ပြည့်စုံစုံဆောက်ပေးပြီး တကယ်နေနိုင်ဖို့ လုပ်ပေးသင့်တယ်။
မြို့သစ်တွေကဈေးကစားရာမြေကွက်တွေသက်သက်ပဲ
မဖြစ်သင့်တော့ပါဘူး" ဟု ပြောသည်။
မြို့ပြစီမံကိန်းအရ ရုပ်ပိုင်းဆိုင်ရာ အခြေခံအဆောက်အအုံများဖြစ်သည့်
လမ်း၊ ရေပေးဝေရေး၊လျှပ်စစ်မီး၊ ရေမြောင်း၊ မိလ္လာစနစ်၊
အမှိုက်သိမ်းစနစ်နှင့်
လူနေထိုင်မှုဆိုင်ရာ အခြေခံအဆောက်အအုံများဖြစ်သည့်
စာသင်ကျောင်း၊ ဆေးရုံ၊ ဈေး၊ ကစားကွင်းနှင့် ပန်းခြံ စသည်
တို့ကိုလည်း ထည့်သွင်းတည်ဆောက်ပေးရန် လိုအပ်သည်။
ရန်ကုန်မြို့တော် ပိုမိုကျယ်ပြန့်စေရန်မြို့သစ်များတိုးချဲ့ခြင်းအပြင်
အခြေခံအဆောက်အအုံများ အဆင့်မြှင့်တင်ခြင်း များဖြစ်သည့်
လမ်း၊ မြစ်ကူးတံတားနှင့် မြေအောက်တူးမြောင်းများ
ဖောက်လုပ်ခြင်းများကိုလည်း ပြုလုပ်သွားမည်ဖြစ်ကြောင်း
ဇွန်လ ၁၉ ရက်နေ့က လွှတ်တော်သို့
ရန်ကုန်မြို့တော်ဝန် ဦးလှမြင့်တင်သွင်းသော အစီရင်ခံစာတွင်
ဖော်ပြထားသည်။
(တင်ရတနာထွန်း)
credit - The Myanmar Times
No comments:
Post a Comment