"ဂုဏ်သိက္ခာ ထွက်ပေါက်၊ သနပ်ခါးလိမ်းတဲ့ စတော့နဲ့ ဘယ်သွားမလဲ ငွေဖြူငွေမည်း"

"ဂုဏ်သိက္ခာ ထွက်ပေါက်၊ သနပ်ခါးလိမ်းတဲ့ စတော့နဲ့
ဘယ်သွားမလဲ ငွေဖြူငွေမည်း"

ဥပဒေ၊ နည်းဥပဒေ ညွှန်ကြားချက်တွေ ထုတ်ပြန်ပြီး
ထိန်းကျောင်းနိုင်ခွင့် အခွင့်အာဏာ ရရှိထားတဲ့ ငွေကြေး
သက်သေခံလက်မှတ် လုပ်ငန်းကြီးကြပ်ရေးကော်မရှင်ဟာ
အဖွဲ့ဝင်လေးဦးနှင့် ဖွဲ့စည်းထားပြီး တစ်ဦးကတော့ ဥက္ကဋ္ဌ
အဖြစ် တာဝန်ယူရတာ ဖြစ်ပါတယ်။

နိုင်ငံတကာမှာတော့ စီးပွားရေးလုပ်ငန်းနဲ့သက်ဆိုင်တဲ့
စတော့အိတ်ချိန်း ကော်မရှင်လိုမျိုးကို အစိုးရ ၀င်ရောက်
စွက်ဖက်မှု အနည်းဆုံးနဲ့ စီးပွားရေးလုပ်ငန်းရှင်တွေ၊
စတော့အိတ်ချိန်းနဲ့ ငွေကြေးကျွမ်းကျင်သူတွေ၊
စာရင်းအင်းနဲ့ ဘောဂဗေဒပညာရှင်တွေနဲ့
လွတ်လွတ်လပ်လပ် ဖွဲ့စည်းတည်ထောင် ထားကြတာ
ဖြစ်ပါတယ်။

မြန်မာနိုင်ငံအတွက် အခုမှ စတင်ရတာဖြစ်ပြီး
- အမှီအခိုကင်းရဲ့လား၊
- စတော့အိတ်ချိန်း ကျွမ်းကျင်သူတွေပါသလား၊
- နိုင်ငံတကာဘဏ္ဍာရေး၊ ငွေကြေး၊ ဘောဂဗေဒ ပညာရှင်
တွေပါသလား ဒါမှမဟုတ် တိုင်ပင်သလားဆိုတဲ့
မေးခွန်းဟာ ငွေကြေးသက်သေခံလက်မှတ် ထုတ်ပေးရေး
ကော်မရှင်အတွက် မှတ်ကျောက်တင်မှာဖြစ်ပါတယ်။

လုပ်ငန်းလည်ပတ်မှု ဖြစ်စဉ်တစ်ခုလုံးအတွက် ကျွမ်းကျင်   
အိုင်တီပညာရှင်တွေ၊ အွန်လိုင်း အင်တာနက်စနစ်
ကျွမ်းကျင်တဲ့ ဆော့ဖ်ဝဲလ်ပညာရှင်၊ ငွေကြေးနဲ့ဘဏ္ဍာရေး
အသွားအလာလုပ်ငန်းတွေအတွက် နည်းပညာ
စိတ်ချရမှုတွေ ဘယ်လောက်ပံ့ပိုးထား သလဲ
ဆိုတာကိုလည်း စောင့်ကြည့်ရမှာပါ။

စတော့အိတ်ချိန်းတွင် ရှယ်ယာတွေ စတင်ရောင်းချဖို့
အများပိုင်ကုမ္ပဏီများကို ရွေးချယ်ရာမှာ ၊ FMI၊ သီလ၀ါ
အများပိုင်ကုမ္ပဏီ၊ Great HOR KHAN Public Co.,Ltd၊ 
MAPCO၊ First Privated Bank နှင့် Myanmar Citizen
Bank တို့ကို ရွေးချယ်ထားကြောင်း မနှစ်ကတည်းက
သိရပါတယ်။

■ "Nonproductive Public Company"

အခုဆိုရင် အများပိုင်ကုမ္ပဏီတွေထဲက ပထမမြန်မာ
ရင်းနှီးမြှုပ်နှံမှု ကုမ္ပဏီ င်္FMI ရဲ့ အစုရှယ်ယာ ထုတ်ရောင်းချ   
နိူင်ဖို့ ပြီးခဲ့တဲ့ မတ် ၂၅ ရက်မှာ စတော့ရှယ်ယာရောင်းချပွဲ
တရားဝင် ဖွင့်လှစ်ခဲ့ပါတယ်။ စတော့အိတ်ချိန်း စဖွင့်ချိန်မှာပဲ
ရှယ်ယာတစ်ခုသတ်မှတ် ဈေးနှုန်းကျပ် ၂၆၀၀၀ နဲ့ ဖွင့်လိုက်
ပေမယ့် ၀ယ်လိုအားဟာ နှစ်ဆကျော်ထိုးတက်သွားပါတယ်။

ရန်ကုန်စတော့အိတ်ချိန်း စဖွင့်တဲ့ တစ်ရက်အတွင်းမှာပဲ
ရှယ်ယာအရေအတွက် တစ်သိန်းတစ်သောင်းကျော်
သွားခဲ့ပြီး ကျပ်သုံးဘီလျံကျော် အရောင်းအ၀ယ်
ဖြစ်ခဲ့တယ်လို့ သိထားပါတယ်။

FMI ရဲ့ ဈေးကွက်မတည် ငွေဟာ ကျပ်သန်း ၇၂၇,၈၈၀
ဖြစ်တယ်လို့ ပြောထားပါတယ်။ အများပြည်သူသိထားတဲ့
FMI ရဲ့စီးပွားရေးလုပ်ငန်းတွေကတော့ ရိုးမဘဏ်လုပ်ငန်း၊
ပန်းလှိုင်ဂေါက်ကွင်းနဲ့ ဆေးရုံ၊ ဗိုလ်ချုပ်လမ်းမှာရှိတဲ့ FMI
စီးပွားရေးလုပ်ငန်းစုနဲ့ အိမ်ရာတွေစတဲ့ Nonproductive
အများပိုင်ကုမ္ပဏီဖြစ်ပါတယ်။

အလားတူပဲ ပြီးခဲ့တဲ့ကာလတုန်းကလည်း
Myanmar Thilawa SEZ ကုမ္ပဏီ၏ အစုရှယ်ယာများဟာ
ရန်ကုန်စတော့အိတ်ချိန်း စာရင်းဝင်မသတ်မှတ်ခင်တုန်းက
ကျပ် ၁၀၀၀၀ နဲ့ရောင်းချထားပြီး EOI စတင်လျှောက်တော့
ကျပ် ၄၀၀၀၀ အထိ ဈေးပေါက်ခဲ့ပါတယ်။

ရန်ကုန်စတော့အိတ်ချိန်းတွင် အရွေးချယ်ခံရပြီးနောက်
ရှယ်ယာတစ်စုကို ကျပ် ၅၀၀၀၀ ခန့် ပေါက်ဈေးဖြစ်ခဲ့ပြီး
အခုဆိုရင် ၉၀,၀၀၀ ပတ်ဝန်းကျင် ဖြစ်ပေါ်နေတယ်လို့
ကောလာဟလသတင်း ထွက်နေပါတယ်။

ဒီလို စတော့ရှယ်ယာတွေ ရဲ့ အမှန်ဈေးနှုန်းဖြစ်သင့်တဲ့
ဈေးနှုန်းဖြစ် မဖြစ်ကို စံနှုန်း စည်းကမ်း သတ်မှတ်ပေးတဲ့
စတော့ အာဏာပိုင်အဖွဲ့က Risk Management
အလုပ်ပေးရမှာဖြစ်ပြီး အာမခံပေးရမှာ ဖြစ်ပါတယ်။

နိုင်ငံတကာမှာရှိတဲ့ ရှယ်ယာဈေးနှုန်း တည်ငြိမ်မှု၊မြင့်တက်မှု၊
ရေရှည် ရပ်တည်နေမှုတွေဟာ ထုတ်လုပ်မှုကိုအခြေပြုထား
တဲ့ လုပ်ငန်းတွေအများစုဖြစ်ပါတယ်။ နိုင်ငံတကာ
စာရင်းအင်းစနစ်၊ စီမံခန့်ခွဲမှု၊ ဘဏ္ဍာရေးစီးဆင်းမှုစတဲ့
စံချိန်စံညွှန်းများစွာနဲ့ အာမခံထားကြတာ ဖြစ်ပါတယ်။

FMI စီးပွားရေးလုပ်ငန်းစုအနေနဲ့ ဘယ်လိုကုန်စည်တွေ
ထုတ်လုပ်တယ်၊ ပြည်ပပို့ကုန်မြှင့်တင်ရေး၊ ပြည်တွင်း
သွင်းကုန်တွေမှာ သူ့ရဲ့ထုတ်ကုန်တွေက ဘယ်လိုဈေးကွက်
နေရာယူထားသလဲဆိုတဲ့ ထုတ်လုပ်မှုကွင်းဆက်ကို မသိရ
သေးပါဘူး။

ထို့အတူ သီလ၀ါ အထူးစီးပွားရေးဇုန်ကတော့
ဘယ်ကုန်စည်မှ ထုတ်လုပ်မှုမရှိသေးပါဘူး။
*** ဒီလိုစတော့ရှယ်ယာဈေးနှုန်း ထောင်တက်သွားမှုဟာ
ငွေရှိတဲ့သူတွေ ငွေကစားရင်းတက်နေတဲ့ ဈေးနှုန်းဖြစ်နေ
ခဲ့မယ်ဆိုရင် အန္တရာယ်ရှိပါတယ်။ ပိုပြီး စိတ်အ၀င်စားဆုံး
အချက်က အဲဒီ စတော့ရှယ်ယာပိုင်ဆိုင်သူတွေဟာ
ဘယ်သူတွေလဲ၊ လက်ဆင့်ကမ်း ရောင်းချနေသူတွေဟာ
ဘယ်သူတွေလဲဆိုတဲ့ မေးခွန်းဖြစ်ပါတယ်။ ***

အမှန်တကယ်တော့ အဲဒီကုမ္ပဏီတွေဟာ ထုတ်လုပ်မှု
အခြေပြု လုပ်ငန်းတွေအပေါ် အခြေပြုပြီး စတင်
ဆောင်ရွက်သင့်ပေမယ့် အမှန်တကယ်ရွေးထားတဲ့
nonproductive public company တွေဆိုရင်
စတော့ ဈေးကွက်မှာရှိတဲ့ ရှယ်ယာဈေးနှုန်း
ခုန်တက်မှုကို ဆန်းစစ်ရမှာဖြစ်ပါတယ်။

အဲဒီလို ဈေးများမြင့်တက်နေခြင်းဟာ မည်သည့်
အကြောင်းကြောင့် မြင့်တက်နေတယ်ဆိုတာကို
ဘယ်သူကမှ ရှင်းလင်းမှုမလုပ်ထားပါဘူး။

အဲဒီလို မြင့်တက်နေမှုများဟာ စတော့အိတ်ချိန်းမှာ
အမှန်တကယ်သာ ရှယ်ယာများ ရောင်းချတော့မယ်ဆိုရင်
- အများပြည်သူကို ဈေးဖွင့်သင့်တဲ့ ဈေးနှုန်းကို
ဘယ်လောက်နဲ့ သတ်မှတ်ရောင်းချမယ်၊
- ရှယ်ယာတစ်ခုရဲ့ဈေးနှုန်း ဖြစ်နိုင်ခြေ၊ ဈေးကွက်
အလားအလာ စတာတွေကို Stock Risk Management
(စတော့ရှယ်ယာတွေရဲ့ အန္တရာယ်ညွှန်းကိန်း) ဆန်းစစ်
ပေးနိုင်တဲ့ နိုင်ငံတကာအဆင့်မီ စတော့အိတ်ချိန်း
ကြီးကြပ်စောင့်ကြည့်ရုံးကနေ ထုတ်ပြန်ရမှာဖြစ်ပါတယ်။

အခုလိုဈေးနှုန်းတက်နေတဲ့ နှုန်းတွေနဲ့ အရောင်းအ၀ယ်
ဖြစ်နေရင် ငွေကြေးခ၀ါချ မှုများ၊ ဈေးကွက်လက်ဝါးကြီးအုပ်
မှုများ စသည့် အခြေအနေများစွာ ဖြစ်ပေါ်လာနိုင်ပါတယ်။
*** စတော့ရှယ်ယာတွေကိုရှားအောင် တမင်ဖန်တီးပြီး
ငွေရှိတဲ့သူက တခြားရင်းနှီး မြှုပ်နှံဖို့နေရာလည်းမရှိတော့
အစုရှယ်ယာတစ်လက်ကနေ တစ်လက် ကူးပြောင်းနေရင်း
ဈေးတက်နေတယ်ဆိုရင် စတော့အိတ်ချိန်းမှာ
အမှန်တကယ် ရှိသင့်တဲ့ဈေးနှုန်းထက် အများကြီး
မြင့်တက်သွားပြီး အရောင်းအ၀ယ် ရပ်တန့်သွားချိန်မှာ
ဈေးကွက်ကပျောက်သွား မှာဖြစ်ပါတယ်။
နောက်ဆုံးအမြင့်ဈေးနဲ့ ၀ယ်ထားတဲ့
စတော့ရှယ်ယာတွေဟာ ဘာမှမသိတဲ့ အများပြည်သူ
လက်ထဲမှာ ပိုက်ဘောမိပြီး ကျန်ခဲ့နိုင်ပါတယ်။ ***
အစုရှယ်ယာပိုင်ရှင်တွေ ကိုယ်တိုင် အစုရှယ်ယာဈေးတက်
အောင် ဈေးကွက်ကစားပြီး အမြင့်ဆုံးဈေးရောက်မှ
ရောင်းထုတ်လိုက်တဲ့ စတော့ဈေးကွက်မှာ မသမာတဲ့
စီးပွားရှာနည်း ကျင့်သုံးသွားမှာကိုပါပဲ။

စတော့အိတ်ချိန်းဈေးကွက်အပေါ် ယုံကြည်မှု ပျောက်ဆုံး
သွားခဲ့မယ်ဆိုရင် နိုင်ငံတကာ ရင်းနှီးမြှုပ်နှံသူတွေလည်း
နောက်ဆုတ်သွားနိုင်ပါတယ်။ဒါကြောင့် စတော့အိတ်ချိန်းမှာ
အမှန်တကယ်ဖြစ်သင့်တဲ့ ဈေးနှုန်းဟုတ်မဟုတ်ကို
အများပြည်သူကို ကနဦးဈေးဖွင့်ပေးတဲ့ စတော့အိတ်ချိန်း
ကြီးကြပ်တဲ့ရုံးတွေက စစ်ဆေးပေးဖို့ တာဝန်ရှိလာပါပြီ။
ဒါကြောင့် လမ်းခုလတ်မှာ ရောက်နေတဲ့ ကမ္ဘာဒီးယားရဲ့
စတော့အိတ်ချိန်းအတွေ့အကြုံကို အနည်းငယ်
ဖောက်သည်ချလိုပါ တယ်။

■ "ကမ္ဘောဒီးယား"

ကမ္ဘောဒီးယားစတော့အိတ်ချိန်းဟာ ၂၀၁၂ခုနှစ် ဧပြီလမှာ
စတင်ခဲ့တာဖြစ်ပါတယ်။ ပထမဆုံး တရားဝင် ရောင်းချဖို့
စာရင်းဝင်တဲ့ လုပ်ငန်းကတော့ ဖနွမ်းပင် ရေအရင်းအမြစ်
ပံ့ပိုးမှု အာဏာပိုင်အဖွဲ့ဖြစ်ပြီး စတင်ဖွင့်လှစ်တဲ့နေ့မှာ
(အခု မြန်မာနိုင်ငံမှာလို) စတော့ရှယ်ယာတစ်ခုချင်းရဲ့
တန်ဖိုးဟာ မူရင်းတန်ဖိုးရဲ့ ဆယ်ဆအထိ ထိုးတက်သွားခဲ့
ပါတယ်။

အများပြည်သူကို ကနဦးဈေးစဖွင့်ပေးတဲ့ ရှယ်ယာတစ်ခုချင်း
တန်ဖိုး၊ ခမာငွေ  ၆၃၀၀ ဈေးနှုန်းဟာ အခုဆိုရင် ၀ယ်သူ
ရောင်းသူ အမှန်ဈေးကွက်မှာတော့ ခမာငွေ ၄၃၂၀ ဖြစ်သွား
လို့ အစုရှယ်ဈေးနှုန်းကျဆင်းသွားပါပြီ။ စတော့ဈေးနှုန်းတွေ
အတက်အကျ အညွှန်းကိန်း သတ်မှတ်မှုနှုန်းအရဆိုရင်
အနုတ် ၁၄ ဒသမ ၉ ရာခိုင်နှုန်း ရှိနေတာကြောင့်
ကုမ္ပဏီ တိုးတက်လာဖို့အလားအလာဟာ
ကြောက်ခမန်းလိလိ အခြေအနေကို
ရောက်ရှိနေတယ်လို့လည်း ဆိုထားပါတယ်။

ဒုတိယစာရင်းသွင်းတဲ့ ကုမ္ပဏီကတော့
ထိုင်ဝမ် အထည်ချုပ်လုပ်ငန်း အားပြုထားတဲ့
ကမ္ဘောဒီးယားအခြေစိုက် Grand Twin International
အများပိုင် အထည်ချုပ်လုပ်ငန်း ဖြစ်ပါတယ်။
စတော့အိတ်ချိန်းမှာ စာရင်းသွင်း စတင်ရောင်းချတဲ့နေ့မှာ
ခမာငွေ ၉၇၀၀ နဲ့ အများပြည်သူကို ကနဦးဈေးစဖွင့်
ပေးခဲ့ပြီး ကုမ္ပဏီရဲ့ ရင်းနှီးမြှုပ်နှံမှုတန်ဖိုးဟာ
ဒေါ်လာ ၁၉ ဒသမ ၃ သန်းအထိ မြင့်တက်ခဲ့ပါတယ်။
ဒါပေမဲ့လည်း နှစ်လကြာပြီးတဲ့နောက်မှာတော့ ရှယ်ယာ
တစ်ခုချင်းရဲ့ ဈေးနှုန်းဟာ ၇၆၈၀ အထိ ထိုးကျသွားခဲ့
ပါတယ်။ စတော့အညွှန်းကိန်းတွေရဲ့ သတ်မှတ်ချက်အရ
ဆိုရင် အနုတ် ၂၀ ဒသမ ၈ ရာခိုင်နှုန်းဖြစ်ပြီး တစ်နှစ်လုံး
တိုင်းတာချက်အရဆိုရင် အနုတ် ၇၅ ဒသမ ၃ ရာခိုင်နှုန်း
ဖြစ်ခဲ့တယ်လို့ ဆိုထားပါတယ်။

စတော့အိတ်ချိန်း ဈေးကွက်တွေမှာရှိတဲ့ အများပြည်သူကို
ကနဦးဈေး စဖွင့်ပေးတဲ့ သတ်မှတ်တဲ့ဈေးနှုန်းနှင့်
ဈေးကွက်မှာ အမှန်တကယ် အရောင်းအ၀ယ်ဖြစ်နေတဲ့
ဈေးနှုန်းကွာဟချက်တွေကြောင့် ကမ္ဘောဒီးယား
စတော့အိတ်ချိန်း အနာဂတ်အလားအလာဟာ
စိန်ခေါ်မှုတွေနဲ့ ပြည့်နေသလို
အောင်မြင်နိုင်ပါ့မလားဆိုပြီး သံသယရှိခဲ့ကြပါတယ်။

ဒီလိုအခြေအနေတွေကြောင့် စတော့အိတ်ချိန်း စတင်ဖို့
အားယူနေတဲ့ မြန်မာအနေဖြင့် ကမ္ဘောဒီးယား
စတော့အိတ်ချိန်းရဲ့အမှားတွေကို ထပ်ကာထပ်ကာ
မလုပ်မိစေဖို့ သင်ခန်းစာ ယူသင့်ပါတယ်။

ဒါကြောင့် ကမ္ဘောဒီးယားစတော့အိတ်ချိန်းရဲ့
အမှားအယွင်းကြီး သုံးခု ဖြစ်နေတယ်ဆိုတာကို
ထောက်ပြထားပါ တယ်။

■ "ဂုဏ်သိက္ခာရှိတဲ့ထွက်ပေါက်"

ပထမအမှားကတော့ စတော့အိတ်ချိန်းမှာ ရှယ်ယာအရောင်း
အ၀ယ်လုပ်ဖို့ အများပိုင်ကုမ္ပဏီ၊ ကုမ္ပဏီတွေကို ရွေးချယ်တဲ့
နေရာမှာ အဆောတလျင်မဖြစ်ဖို့နဲ့ အရွေးမမှားဖို့ တိုက်တွန်း
ထားပါတယ်။  အမှန်တကယ်က ကမ္ဘောဒီးယားစတော့
အိတ်ချိန်းကို ပထမဆုံး စာရင်းသွင်းတဲ့ ဖနွမ်းပင်ရေအရင်း
အမြစ် ပံ့ပိုးရေးအာဏာပိုင်အဖွဲ့ဆိုတာ စီးပွားရေးအရ
အရမ်းဆိုးဆိုးရွားရွားဖြစ်နေတာမဟုတ်ဘဲ ထုတ်လုပ်မှုကို
အခြေခံဦးစားပေးတဲ့ လုပ်ငန်းကို ဦးစားပေးတာဟာ
အရမ်းကို အန္တရာယ်များတယ်လို့ ပြေားထားပါတယ်။
အမှန်တကယ် စာရင်းဝင်ဖို့ ဖြစ်သင့်တာကတော့
တယ်လီကွန်း လုပ်ငန်းကြီးတွေ၊ ဘဏ်လုပ်ငန်းကြီးတွေ၊
သတ္တုတွင်းလုပ်ငန်းတွေဟာ လုပ်ငန်းလည်ပတ်တဲ့နေရာမှာ
ပိုပြီးစီးပွားရေး စီမံခန့်ခွဲမှု စွမ်းဆောင်ရည်ထက်မြက်တဲ့
သမိုင်းကြောင်းရှိတာကြောင့် ရွေးချယ်သင့်တယ်လို့
ဆိုထားပါတယ်။
ဥပမာအားဖြင့် -
ကမ္ဘောဒီးယား တယ်လီကွန်း လုပ်ငန်းကြီးဟာ ရင်းနှီးမြှုပ်နှံမှု
ကြီးမားသလို စီးပွားရေးအကျိုးအမြတ်လည်းရှိနေပြီး
တစ်နိုင်ငံလုံး ဖြန့်ကြက်ထားနိုင်တာကြောင့် ရေရှည်အာမခံ
ပေးနိုင်ပါတယ်။

ကမ္ဘာ့ဘဏ်အုပ်စုဖြစ်တဲ့ နိုင်ငံတကာ ငွေကြေးကော်ပိုရေးရှင်း၊
ဂျာဒီးမဟာဗျူဟာ ဟိုးဒင်းနှင့် အခြားငွေကြေးအဖွဲတွေ
ကျောထောက်နောက်ခံပေးထားပြီး ပြည်တွင်းမှာ
အကောင်းဆုံးလည်ပတ်နေပြီဖြစ်တဲ့ ပုဂလိကဘဏ်တွေရဲ့
အစုရှယ်ယာတွေကို ဦးစားပေးသင့်တယ်လို့ ညွှန်းဆို
ထားပါတယ်။
ဥပမာပေးထားတဲ့ ဘဏ်ကတော့ ACLEDA Bank ဖြစ်ပါတယ်။
အဲဒီကုမ္ပဏီကြီးတွေဟာ ဘဏ်ကြီးတွေဟာ ကမ္ဘာ့အဆင့်မီ
အုပ်ချုပ်မှုစီမံကောင်းတွေ ကျင့်သုံးနေတယ်၊ နိုင်ငံတကာ
ကျွမ်းကျင်သူတွေကို ခန့်ထားနိုင်တယ်၊ ကုမ္ပဏီရဲ့ငွေစာရင်းနှင့်
စာရင်းအင်းထားရှိမှုဟာ အဆင့်အတန်း မီတယ်ဆိုတဲ့အချက်
တွေဟာ အဲဒီကုမ္ပဏီရဲ့ ဂုဏ်သိက္ခာ ကျော်စောမှုတွေ ကြောင့်
နိုင်ငံတကာအဆင့် ရှိတယ်လို့ ညွှန်းဆိုထားပါတယ်။

ဒုတိယ ထောက်ပြထားတဲ့အချက်ကတော့ ကမ္ဘောဒီးယား
ကော်ပိုရေးရှင်းလုပ်ငန်းတွေဟာ နိုင်ငံတကာအဆင့်မီ
စီမံအုပ်ချုပ်မှုစနစ် စံတော်ဝင်မဖြစ်ဘဲ အားနည်းချက်တွေ
ရှိနေတယ်လို့ ရှင်းပြထားပါတယ်။

ကနဦး မှတ်ပုံတင်ထားတဲ့ ဖနွမ်းပင် ရေအရင်းအမြစ် ပံ့ပိုးရေး
အာဏာပိုင်အဖွဲ့ရဲ့ အနာဂတ် စီးပွားရေး အလားအလာဖွင့်ဆို
မှုဟာေ၀၀ါးနေတယ်။ ကုမ္ပဏီရဲ့ နှစ်လတ် အစီရင်ခံစာ၊
ကုမ္ပဏီရဲ ဘဏ္ဍာရေးရှင်းတမ်း၊ မဟာဗျူဟာနှင့် အနာဂတ်
စီမံချက်၊ ၀န်ထမ်းစီမံခန့်ခွဲမှု၊ အကျိုးအမြတ် စာရင်းဇယား
တွေကို ရှာဖွေရတာ ခက်ခဲပါတယ်။ ၀က်ဘ်ဆိုက်တွေမှာ
တင်ထားတာလည်း မရှိပါဘူး။

အများပြည်သူကို စတော့ရှယ်ယာ ကမ်းလှမ်းရောင်းချတဲ့
ရုံးမှာလည်း ဒီလိုအစီအစဉ်တွေ၊ လုပ်ငန်းစဉ် စီမံချက်
သတင်းအချက်အလက်တွေကို ရှာဖွေကြည့်ရှု လေ့လာရတာ
ခက်ခဲတယ် လို့ဆိုထားပါတယ်။ အများပိုင်ကုမ္ပဏီအနေဖြင့်
ရင်းနှီးမြှုပ်နှံမှု အသစ်တွေကို အကြံပေးနိုင်တဲ့အဖွဲ့၊ နှစ်စဉ်
အစီရင်ခံစာထုတ်ပြန်ရေး၊ နိုင်ငံတကာ စတော့အတွေ့အကြုံ
ရရှိနိုင်ဖို့  အကြီးတန်းအရာရှိတွေကို စတော့လုပ်ငန်းဆိုင်ရာ
မွမ်းမံမှုသင်တန်း၊ ကမ္ဘာ့ စတော့ဈေးကွက်နှင့် ကုမ္ပဏီ
အောင်မြင်မှု ဖြစ်နိုင်ခြေကို လေ့လာတဲ့ စီးပွားရေး လေ့လာ
ဆန်းစစ်ရေးအဖွဲ့၊ အစုရှယ်ယာ ၀င်ထားတဲ့သူတွေ
အတွန့်တက်လာရင် အဆင်သင့် ဖြေရှင်းပေးနိုင်မယ့်
နည်းလမ်းစတာတွေကို မလုပ်ထားဘူးလို့ ဆိုထားပါတယ်။

စတော့ဈေးကွက်ထဲကို စာရင်းသွင်းတဲ့အများပိုင်ကုမ္ပဏီတွေ၊
ကုမ္ပဏီတွေဟာ အစိုးရစတော့အိတ်ချိန်း ကော်မရှင်နဲ့
သဘောတူညီချက် လက်မှတ် ရေးထိုးထားကတည်းက
အရေးကြီး အချက်တွေ ပါဝင်ထည့်သွင်းထားပေမယ့်
ဖနွမ်းပင် ရေအရင်းအမြစ် ပံ့ပိုးရေး အာဏာပိုင်အဖွဲ့ဟာ
မျက်ကွယ်ပြုထားတယ်လို့ ဆောင်းပါးရှင်က
ရှင်းထားပါတယ်။

နိုင်ငံတကာ ရင်းနှီးမြုပ်နှံသူတွေ လေ့လာနိုင်ဖို့ ၀က်ဆိုက်ရဲ့
ဖော်ပြချက်ဟာလည်း ပြည်တွင်း ဘာသာတစ်ခုတည်းနဲ့
မလုံလောက်ဘဲ အင်္ဂလိပ်ဘာသာရပ်နဲ့ အများဆုံး
ဖော်ပြမှသာ နိုင်ငံတကာ ရင်းနှီးမြှုပ်နှံသူတွေရဲ့
ယုံကြည်မှုကိုလည်း ရရှိမှာဖြစ်ပါတယ်။

တတိယအချက်ကတော့ အချက်အလက် အားကိုးမှုထက်
တွေးဆချက် ဖြစ်နိုင်ခြေ သတ်မှတ်တဲ့ စတော့ဈေးနှုန်းနှင့်
ရှုပ်ထွေးတဲ့ အ၀ယ်အရောင်း အလွဲအပြောင်းနဲ့ နည်းပညာ
ရပ်ဆိုင်ရာ ကိစ္စဖြစ်တယ်လို့ ဆိုထားပါတယ်။

စတော့အိတ်ချိန်းတွေရဲ့ ပထမဆုံး ဦးစားပေးလုပ်ရမှာက
နည်းပညာအဆင့်မြင့်မှုနှင့် လိုအပ်တဲ့ စတော့ဈေးနှုန်း
ဒေတာတွေ၊ ဈေးကွက် သတင်းအချက်အလက်တွေ
မှန်မှန်ကန်ကန် ရရှိနေဖို့နဲ့ အဲဒီအချက်အလက်တွေ
အားလုံးဟာ မှန်ကန်နေဖို့ပဲ ဖြစ်ပါတယ်။

ဒါပေမဲ့လည်း ကမ္ဘောဒီးယားစတော့အိတ်ချိန်းစီမံခန့်ခွဲသူတွေ
အနေနဲ့ အထက်ပါ လုပ်ငန်းစဉ်တွေ အပီအပြင် လုပ်နိုင်လိမ့်
မယ်လို့ ပိုတွက်ဆပြီးယုံကြည်မှု လွန်ကဲခဲ့ဟန်တူပါတယ်။

နည်းပညာအကူအညီပေးတဲ့ ကိုရီးယားအိတ်ချိန်း စီမံခန့်ခွဲမှု
ပုံစံတွေကို အတုယူ နည်းနာခံခဲ့ပေမယ့် အတွေ့အကြုံ
အားနည်းချက်တွေကြောင့် စတော့အိတ်ချိန်း လုပ်ငန်းစဉ်
တွေကို အပြည့်အ၀ အသုံးမချနိုင်ခဲ့ ဘူးလို့
မှတ်ချက်ပြုထားပါတယ်။

■ "ဘယ်သွားမလဲ ငွေဖြူငွေမည်း"

မြန်မာနိုင်ငံဟာ ငွေဖြူငွေမည်း ပြဿနာတွေကို
ရှင်းရှင်းလင်းလင်း မဖြေရှင်းသေးနိုင်ပါဘူး။ အဂတိလိုက်စားမှု၊
နိုင်ငံခြားငွေကြေးများ၊ ဘိန်းနဲ့ မူးယစ်ဆေးဝါး ငွေကြေးများဟာ 
တရားဝင် ဈေးကွက်ထဲကို ရောက်လာလို့ ရန်ကုန်မြို့အိမ်ခြံမြေ
မိုးထိအောင် တက်နေတဲ့အကျိုးဆက်ကို ခံစားနေရဆဲပါ။
ငွေဖြူငွေမည်း ပြဿနာကို ဘယ်လိုကိုင်တွယ်နေသလဲ
ရှင်းရှင်းလင်းလင်း မသိရပါဘူး။ ဒီလို * ငွေကြေး ခ၀ါချချင်သူ
တွေက အစုရှယ်ယာတွေ နင်းကန်ဝယ်ပြီး ရှယ်ယာဈေးနှုန်း
မြင့်တက်နေတဲ့ အခြေအနေကို ထိန်းချုပ်ထားလာမှာကိုလည်း
စိုးရိမ်ရပါတယ်။ *

အခုဆိုရင် အများပိုင် ကုမ္ပဏီတချို့ ရှယ်ယာဈေးနှုန်းတွေ
ထောင် တက်နေတာနဲ့ပတ်သက်ပြီး ငွေကြေးခ၀ါချမှုတွေနဲ့
ဆက်စပ်နိုင်ခြေ ရှိတယ်ဆိုပြီး ငွေကြေးခ၀ါချမှု တိုက်ဖျက်ရေး
အဖွဲ့ရဲ့အကြီးတန်းအရာရှိ ဒီလဆန်းပိုင်းတုန်းက
မီဒီယာတွေမှာ ပြောထားပါတယ်။

မြန်မာနိုင်ငံမှာ ငွေကြေး ဖောဖောသီသီကိုင်ပြီး
ဈေးကစားနိုင်တဲ့သူတွေ အများကြီးမရှိနိုင်ပါဘူး။
ထုတ်လုပ်မှု အခြေပြုထားတဲ့
အများပိုင်လုပ်ငန်းတွေ မဖြစ်တာကြောင့် စတော့ရှယ်ယာ
တွေရဲ့ အမှန်ဈေးနှုန်း ဖြစ်မဖြစ်၊ ငွေဖြူငွေမည်း ခ၀ါချမှု
ဖြစ်မဖြစ်စတဲ့ အန္တရာယ် (Risk) တွေရှိနေတာကြောင့်
စတော့အိတ်ချိန်းကို ဘယ်လို ကိုင်တွယ်မယ်၊ အဲဒီလို
ကိုင်တွယ်ဖို့ နည်းပညာ၊ စောင့်ကြည့်စစ်ဆေးမှု၊
အာမခံမှုစတဲ့ နည်းလမ်းတွေ အဆင်သင့်ပြင်ထားဖို့လိုပါပြီ။

အဆိုးဆုံးကတော့ နိုင်ငံတကာ ရင်းနှီးမြှုပ်နှံသူတွေရဲ့
စတော့ဈေးကွက်ဆိုင်ရာ ယုံကြည်မှု
ပျောက်ဆုံးသွားမှာကိုပါပဲ။

သန်းစိုး(ဘောဂဗေဒ)

credit - Eleven Media Group