"သိထားသင့်သည့် စံငှားရမ်းခ သတ်မှတ်မှု"

"သိထားသင့်သည့် စံငှားရမ်းခ သတ်မှတ်မှု"
 
''အိမ်၊ မြေ ရောင်းဝယ်မယ်ဆိုရင်
သက်ဆိုင်ရာအခွန်ဦးစီးဌာန မှာ အိမ်မြေတန်ဖိုးဖြတ်
တင်ရတယ်ဆိုတာ ဟုတ်ပါသလား''ဟု မိတ်ဆွေတစ်ဦး
က စာရေးသူအား မေးမြန်းလာပါသည်။

''ဟုတ်ပါတယ်။
ရန်ကုန်တိုင်း အတွင်းမှာရှိတဲ့ အိမ်၊ မြေ၊ တိုက် ခန်း
ရောင်းဝယ်မယ်ဆိုရင် ဝင်ငွေခွန်၊ ရောင်းခွန်နဲ့
မှတ်ပုံတင်စာချုပ်စာတမ်းရုံးမှာ သတ်မှတ်ထားတဲ့
ရုံးခွန်ထမ်းဆောင်ပြီး စာချုပ် ချုပ်ဆိုနိုင်ဖို့ သက်ဆိုင်ရာ
မရွှေ့မပြောင်းနိုင်သော ပစ္စည်းတန်ဖိုး သတ်မှတ်
ပေးတဲ့ရုံးမှာ တင်ပြ လျှောက်ထားရပါတယ်''

''သတ်မှတ်တဲ့နှုန်းထားတွေ က အပြင်ကာလပေါက်ဈေး
ပေါ် မူတည်သတ်မှတ်ပေးတာလား''

''အနီးစပ်ဆုံးမျှတအောင် သတ်မှတ်ပေးထားတာ
ဖြစ်ပါတယ်။ သက်ဆိုင်ရာမြို့နယ်၊ ရပ်ကွက်၊ လမ်းမတန်း၊
အတွင်းလမ်းစသဖြင့် အိမ်မြေတန်ဖိုး သတ်မှတ်ပေးပြီး
ပြည်သူများသိအောင် ကြေညာ ပေးပါတယ်။
သက်ဆိုင်ရာ အခွန် ဦးစီးဌာနတွေမှာရှိတဲ့
ကြော်ငြာသင်ပုန်းမှာ ကပ်ပေးထားရပါတယ်''

''အိမ်၊ မြေ၊ တိုက်ခန်းတန်ဖိုး တွေက အပြောင်းအလဲ
ရှိနေတော့ ဘယ်လိုဆောင်ရွက်ပေးသလဲ''

''ကာလပေါက်ဈေး အပြောင်းအလဲဖြစ်ပေါ်မှုကို
အခြေတည်ပြီး လိုအပ်ရင် ဘဏ္ဍာရေးနှစ် တစ်နှစ် ပြည့်ရင်
သတ်မှတ်ဈေးနှုန်းတွေကို ပြောင်းလဲကြေညာပေးပါတယ်''

''တစ်ခါတစ်ရံမှာ အပြင်က ပေါက်ဈေးထက်
သတ်မှတ်ဈေးနှုန်းက မြင့်နေတာတွေရှိတယ်လို့ လည်း
ကြားမိတယ်''

''ပြဋ္ဌာန်းသတ်မှတ်ထားတဲ့ တစ်နှစ်တာအတွင်းမှာ
အိမ်၊ မြေ၊ တိုက်ခန်းဈေးနှုန်းအလွန်အမင်း ကျဆင်း
သွားရင်တော့လည်း ဖြစ်နိုင်တာပေါ့။
ဒါပေမယ့် အင်မတန် ဖြစ်နိုင်ခဲတဲ့ ကိစ္စပါ''

''တစ်ဆက်တည်းသိချင်တာ က အရောင်းအဝယ်ဖြစ်တဲ့
အိမ်၊ မြေ၊ တိုက်ခန်းတွေကို တန်ဖိုးဖြတ် စံနှုန်းသဘော
ရှိသလို၊ အိမ်ငှားရမ်းခတွေမှာလည်း စံသဘော
သတ်မှတ်ထားတာရှိသလား''

''မြို့ပြဆိုင်ရာ ငှားရမ်းခကြီးကြပ်ရေး ဥပဒေအရ
ငှားရမ်းခကြီးကြပ်ရေးဝန်ဟာ 'စံငှားရမ်းခ' သတ်မှတ်
ပေးနိုင်တယ်လို့ ပြဋ္ဌာန်း ထားတယ်''

''ငှားရမ်းခကြီးကြပ်ရေးဝန်ရုံး ဆိုတာ ရှိလို့လား''

''တည်ဆဲဥပဒေအရတော့ မြို့ပြဆိုင်ရာ ငှားရမ်းခ
ကြီးကြပ်ရေး ဥပဒေပါ ငှားရမ်းခကြီးကြပ်ရေးဝန်အဖြစ်၊
မြို့နယ် အုပ်ချုပ်ရေးမှူး ကို ခန့်ထားတာဝန်ပေးထားပါ
တယ်။ ဒါကြောင့် ငှားရမ်းခကြီးကြပ်ရေးဝန်ရုံးကလည်း
မြို့နယ် အုပ်ချုပ်ရေးမှူးရုံးပဲ ဖြစ်ပါတယ်''

''စံငှားရမ်းခနှုန်းထားသိချင်ရင် သက်ဆိုင်ရာ
မြို့နယ်အုပ်ချုပ်ရေးမှူးရုံးမှာ သွားစုံစမ်းလို့ရတယ်ပေါ့''

''စံငှားရမ်းခမှာတော့ အစောက ပြောခဲ့သလို
အိမ်၊ ခြံ၊ မြေ၊ တန် ဖိုးသတ်မှတ်ချက်နဲ့ မတူဘူး။
အိမ်၊ ခြံ၊ မြေ၊ တိုက်ခန်းတို့ရဲ့ တန်ဖိုး သတ်မှတ်မှုက
သက်ဆိုင်ရာ မရွှေ့မပြောင်းနိုင်သော ပစ္စည်းတန်ဖိုး
သတ်မှတ်ရေးအဖွဲ့ ဒါမှမဟုတ် ကော်မတီက ညှိနှိုင်း
သတ်မှတ် ကြေညာပေးတဲ့ တန်ဖိုးဖြစ်ပါတယ်။
စံငှားရမ်းခမှာ သက်ဆိုင်ရာ ငှားရမ်းခကြီးကြပ်ရေးဝန်က
သတ်မှတ် ကြေညာပေးတာမျိုး မရှိဘူး။
အိမ်ရှင်ဒါမှမဟုတ် အိမ်ငှားဖြစ်သူ တစ်ဦးက
မိမိတို့ အငှားချထားတဲ့ ဒါမှမဟုတ် ငှားရမ်းနေထိုင်မယ့်
အဆောက်အအုံ၊ တိုက်ခန်း၊ အိမ်ခန်းကို စံငှားရမ်းခ
သတ်မှတ်ပေးပါလို့  သက်ဆိုင်ရာ မြို့နယ်ငှားရမ်းခ
ကြီးကြပ်ရေးဝန်ထံ လျှောက်ထားတဲ့အခါ
ငှားရမ်းခကြီးကြပ်ရေးဝန် က စုံစမ်းစစ်ဆေးပြီး
သင့်တင့်တဲ့ ငှားရမ်းခကို စံငှားရမ်းခအဖြစ်
သတ်မှတ်ပေးမှာဖြစ်တယ်''

''ဒါဆိုရင် တစ်ဦးချင်းအလိုက် ငှားရမ်းထားတဲ့ အိမ်ခန်း၊
အဆောက်အအုံအလိုက် သီးခြားတစ်ခုခြင်း
လျှောက်ထားရမယ့် သဘောဖြစ်နေတာပေါ့''

''အိမ်ရှင်နဲ့ အိမ်ငှားတို့ အိမ် ငှားရမ်းခသတ်မှတ်တဲ့အခါမှာ
အနည်း၊ အများ မကျေနပ်လို့လျှောက်ထားကြတာတွေ
ဖြစ်တယ်''

''အိမ်ငှားရမ်းခအပေါ်မှာ အိမ်ရှင်၊ အိမ်ငှား နှစ်ဖက်လုံးက
သဘောတူရင် ငှားရမ်းခကြီးကြပ်ရေးဝန်ထံ လျှောက်ဖို့
မလိုအပ်တော့ ဘူးပေါ့''

''မှန်ပါတယ်။
မြို့ပြဆိုင်ရာ  ငှားရမ်းခကြီးကြပ်ရေး ဥပဒေအရ
ငှားရမ်းခဆိုသည်မှာ အိမ်ရှင်နဲ့ အိမ်ငှားတို့
နှစ်ဦးသဘောတူညီ လက်ခံကြသည့် ငှားရမ်းခ အပြင်
မြို့နယ်ငှားရမ်းခကြီးကြပ်ရေးဝန် က မြို့ပြဆိုင်ရာ ငှားရမ်းခ
ကြီး ကြပ်ရေးဥပဒေနှင့် အညီ သတ်မှတ် ပေးထားတဲ့
ငှားရမ်းခလည်း ပါဝင်တယ်လို့
အဓိပ္ပာယ်ဖွင့်ဆိုထားပါတယ်''

''ဘယ်လိုကိစ္စရပ်တွေပေါ်လာရင် စံငှားရမ်းခ
သတ်မှတ်ပေးဖို့ လျှောက်ထားနိုင်ပါသလဲ''

''ငှားရမ်းထားတဲ့ အဆောက်အအုံမှာ
- ထပ်ဆင့်ပြီး အငှားချထားလို့ အိမ်လခတိုးတောင်းတဲ့
ကိစ္စတွေ၊
- စပေါ်ငွေရယူပြီး ငှားရမ်းထားတဲ့ကိစ္စရပ်တွေမှာ
အိမ်လခတိုးတောင်းတဲ့ ကိစ္စတွေ၊
- အဆောက်အအုံကို ပြင်ပေးရတဲ့အတွက် ကုန်ကျစရိတ်
ကြောင့် ငှားရမ်းခ တိုးတောင်းတာတွေစတဲ့အကြောင်း
အမျိုးမျိုးကြောင့် အိမ်ရှင်က အိမ်လခတိုးတောင်းတဲ့
ဆိုတဲ့အခါ
- အိမ်ငှားကလည်း အဆောက်အအုံမှာ
ဟောင်းနွမ်းနေတဲ့အတွက် ငှားရမ်းခလျှော့ပေးဖို့
တောင်းဆိုတဲ့ အခါမျိုးတွေမှာ
မကျေနပ်ရင် မိမိ နေထိုင်ရာ မြို့နယ်အုပ်ချုပ်ရေးမှူး ဖြစ်တဲ့
ငှားရမ်းခကြီးကြပ်ရေးဝန် ထံ လျှောက်ထား
တောင်းဆိုခွင့်ရှိမှာ ဖြစ်ပါတယ်''

''သူငယ်ချင်းပြောတဲ့ ငှားရမ်းခကြီးကြပ်ရေးဝန်ရဲ့
စံငှားရမ်းခ သတ်မှတ်ချက်အပေါ် မကျေနပ်ရင်
ဘယ်လို ဆောင်ရွက်နိုင်သေးလဲ''

''မြို့နယ် ငှားရမ်းခကြီးကြပ်ရေးဝန်ရဲ့ စံငှားရမ်းခ
သတ်မှတ်ချက်ကို မကျေနပ်သူဟာ
သက်ဆိုင်ရာ ခရိုင်တရားရုံးသို့ အယူခံ သဘောမျိုး
လွှဲအပ်လွှာတင်သွင်းခွင့်ရှိတယ်လို့
မြို့ပြဆိုင်ရာငှားရမ်းခကြီးကြပ်ရေး ဥပဒေ ပုဒ်မ ၃၂ မှာ
အတိအလင်းပြဋ္ဌာန်းထားပါတယ်''

''ဒီလိုဆိုရင် အုပ်ချုပ်ရေးအာဏာနဲ့ တရားစီရင်ရေးအာဏာ
က ဒွန်တွဲနေတဲ့သဘော ဖြစ်မနေဘူးလား''

''ဟုတ်ပါတယ်၊ မြို့ပြဆိုင်ရာ ငှားရမ်းခကြီးကြပ်ရေးဥပဒေရဲ့
ထူးခြားချက်ပဲဖြစ်တယ်''

''ခရိုင်တရားရုံးရဲ့ ဆုံးဖြတ်ချက်ကို မကျေနပ်ရင်
တိုင်းတရားရုံးကို အယူခံထပ်ဝင်ရမှာပေါ့''

''မြို့ပြဆိုင်ရာ ငှားရမ်းခကြီးကြပ်ရေး ဥပဒေပုဒ်မ ၃၂ မှာ
ခရိုင်တရားရုံးက ဆုံးဖြတ်ချက်သည် အပြီးသတ်
အတည်ဖြစ်တယ်လို့ ပြဋ္ဌာန်းထားတဲ့အတွက်
ခရိုင်ရုံးရဲ့ဆုံးဖြတ်ချက်ဟာ အပြီးအပြတ်ဖြစ်ပါတယ်။
ဒါပေမယ့် တရားလွှတ်တော်ချုပ်ထံ စာချွန်အဖြစ်နဲ့
ခရိုင်တရားရုံးရဲ့ ဆုံးဖြတ်ချက်ကို ပြင်ဆင်ပေးဖို့
နောက်ဆုံး လျှောက်ထားနိုင်ပါတယ်''

''သူငယ်ချင်းရှင်းပြမှာပဲ 'စံ ငှားရမ်းခ' ဆိုတာ
နားလည်သွားတော့တယ်''ဟု
သူငယ်ချင်းနှင့်ဆွေးနွေးချက်အား
ဗဟုသုတ အဖြစ် ရေးသားလိုက်ပါသည်။

ထီယု (ဥပဒေအတိုင်ပင်ခံ)

credit - Zaygwet Journal

“အိမ်ခြံမြေ လမ်းဆုံ” မိတ်ဆွေများခင်ဗျာ -
---------------------------------------------

အိမ်ခြံမြေနဲ့ပတ်သက်တဲ့ ကြော်ငြာများအား
အောက်ပါ link ကိုနှိပ်၍ လေ့လာနိူင်ပါတယ်။

https://www.facebook.com/726764717432470/photos/a.727586294016979.1073741828.726764717432470/962655320510074/?type=3