“အကွက်ရိုက်ရောင်းတဲ့မြေဆို သတိပြု”

“အကွက်ရိုက်ရောင်းတဲ့မြေဆို သတိပြု”

ယခု အခါ  လယ်မြေများကိုလည်းအကွက်ရိုက်ပြီး
တချို့ရောင်းချနေသည်ကိုတွေရှိရပါသည် ။
ဈေးအရမ်းပေါတယ်ဆိုပြီး မ၀ယ်ကြပါနဲ့ ။
မိတ်ဆွေများ အလိမ်မခံရအောင် ပါ။

"သတိပြုစရာများ"
==========

၁။ ပုံစံ ၁၀၅ ဆိုတာ ပိုင်ဆိုင်မှု အာမခံချက် လုံးဝ မဟုတ်ပါ။
ပုံစံ ၁၀၅ ဆိုတာ -
- တည်နေရာကို ဖော်ပြရန်၊
- မြေအမျိုးအစားကို ဖော်ပြရန်၊
- အိမ်ဆောက်လုပ်ခွင့် လျှောက်ထားရာတွင် တည်နေရာကို
ညွန်းဆိုရန်၊
- မြို့မြေဖြစ်ပါက ဂရံ လျှောက်ထားရာတွင် တည်နေရာကို
ညွန်းဆိုရန်၊ စသည်တို့အတွက်
“မြေစာရင်းဌာန” က ထုတ်ပေးတဲ့
"မြေပုံ ပုံစံ တစ်ခုသာ" ဖြစ်ပါသည်။
ပုံစံ ၁၀၅ ကို ယာ၊ ဥယျာဉ်၊ တောင်ယာ ၊
လန (၃၉ ) ၊ ၃ (ခ) ၊ ယခု ၃၀ (ခ) အတွက်ထုတ်ပေးသော
စာရွက်စာတမ်းများတွင်တွေ့ နိုင်သည်။

၂။ လယ်မြေ ဖြစ်စေ၊ ယာမြေဖြစ်စေ၊ သက်ဆိုင်ရာ ဌာနမှ
ပယ်ဖျက် ခြင်း မပြုသေးသ၍ စိုက်ပျိုးရန်မှလွဲ၍
အခြားနည်းလမ်း ဖြင့်အသုံးပြုခွင့် လုံးဝမရှိပါ။

၃။ လယ်မြေ ဖြစ်စေ၊ ယာမြေဖြစ်စေ အခြားနည်းလမ်းဖြင့်
အသုံးပြုလိုပါက
ဥပမာ -  အိမ်ဆောက်ရန်၊ ငါးကန်တူးရန်၊
အုတ်စက်တည်ရန် စသည်ဖြင့်
သီးခြား လျှောက်ထားပြီးမှသာ အသုံးပြုနိုင်ပါသည်။

၎။ လယ်ယာမြေ ဖြစ်ပါက
ယခင် ဥပဒေ အရ နိုင်ငံပိုင်သာ ဖြစ်ပြီး
ယခု ဥပဒေ များအရ ပိုင်ဆိုင်ခွင့်သာ ရရှိနိုင်မည်။

၅။ တရားဝင် အစိုးရ၏ မြို့သစ်တိုးချဲ့ စီမံကိန်းမှလွဲ၍
လယ်မြေ၊ ယာမြေ ကို လူနေအိမ်ခြေ အဖြစ်
အကွက်ရိုက် ရောင်းချခြင်းသည် တရားမဝင်ပါ။

၆။ ဥပဒေ ကြောင်းအရ အတိအကျ ဆောင်ရွက်လာပါက
ဝယ်ယူမိသူများ မိမိတို့ရဲ့ ချွေးနည်းစာ များဆုံးရှုံး
နိူင်ပါသည်။

“သူတို့ ဆိုစကားများ”
===========

"မြို့ကွက်သစ်တွေ ဖော်ထုတ်တုန်းက လယ်မြေတွေ သိမ်းပြီး
လုပ်ခဲ့ကြတယ်။
အခု နှစ်ကြာတော့မြို့ကွက်သစ်တွေထဲမှာ
အထူးသဖြင့်မြို့စွန်တွေမှာ ဘာမှ မလုပ်ဖြစ်တဲ့အကွက်တွေလည်း
ရှိနေသေးတယ်။
ဒါ့အပြင် ဒီမြေနဲ့ ဆက်စပ်နေတဲ့လယ်ကွက်တွေမှာလည်း
ပိုင်ရှင်တွေက အကွက်ရိုက်ပြီး ရောင်းတာကပိုပြီးတော့
သူတို့အတွက် ပိုမြတ်နိုင်တာကို မြင်လာကြလို့
အကွက်ရိုက်ပြီး ရောင်းတာတွေ ဖြစ်လာတယ်။
လယ်သမားမှာ ရှိတာက
လယ်ယာမြေ လုပ်ကိုင်ခွင့် လက်မှတ် ပုံစံ- ၇ ပဲရှိမယ်။
အရပ်စာချုပ်နဲ့ ရောင်းတာဥပဒေနဲ့လည်း မညီပါဘူး။
ပြဿနာဖြစ်လာရင် ဝယ်သူတွေ နစ်နာနိုင်တယ်” 
(တရားလွှတ်တော်ရှေ့နေ ဦးထွန်းအောင်)

"လယ်ကို အကွက်ရိုက်ပြီးရောင်းတာတွေ
တော်တော်များများမှာ တွေ့လာရတယ်။
လယ်ပိုင်ရှင်အတွက်လည်း ငွေပေါ်ပြီး အမြတ်အစွန်း
ပိုထွက်လာသလို ဝယ်တဲ့လူတွေကလည်း ဈေးချိုတော့
အိမ်ငှားခနဲ့ တွက်ပြီး ဝယ်တာများတယ်။
ခိုင်မာမှုတော့ မရှိပါဘူး၊ဝယ်တဲ့သူလည်း များပါတယ်”
(အေးရိပ်စံအိမ်ခြံမြေအကျိုးဆောင်လုပ်ငန်းမှကိုဝင်းထိန်)

"တောင်ဒဂုံ ကျည်စုမှာ ပေ ၂ဝ x ၆ဝ မြေကွက်ကို
ငါးသိန်းနဲ့ ရောင်းတယ်ဆိုတာ သတင်းကြားလို့
သွားဝယ်တာ ရခဲ့ပါတယ်။
တရား ဝင်မဝင် မသိပေမယ့် နှစ်နှစ်လောက် နေရရင်တောင်
အိမ်ငှားခပေးရမယ့် ငွေနဲ့ တွက်ရင် တန်ပါတယ်”
(မြေကွက်ဝယ်ထားသူ ဒဂုံမြို့သစ်အရှေ့ ပိုင်းမှ ကိုမင်းမင်း)

credit - Trade Time Journal / ShweProperty &
Kyi Soe (IC)