“အိမ်၊ခြ၊ံမြေ ဈေးကွက် ပြန်လည်လှုပ်နိူးခြင်း အစလား?”

“အိမ်၊ခြ၊ံမြေ ဈေးကွက် ပြန်လည်လှုပ်နိူးခြင်း အစလား?”

၁။ "ကာလအတန်ကြာ အေးစက်ခဲ့သည့် ရန်ကုန်မြို့၏
အိမ်၊ ခြံ၊ မြေဈေးကွက်အတွင်း အကွက်အကွင်းကျသည့်
တန်ဖိုးကြီး မြေနေရာများနှင့် တိုက်ခန်းများ
ရွေးကောက်ပွဲပြီးနောက်ပိုင်း အရောင်းအ၀ယ် ပြန်ဖြစ်လာ"

ကာလအတန်ကြာ အေးစက်နေသည့် ရန်ကုန်မြို့၏
အိမ်ခြံမြေဈေးကွက်မှာ ရွေးကောက်ပွဲပြီးနောက်ပိုင်း
ဗဟန်း၊ မရမ်းကုန်း စသည့် အကွက်အကွင်းကျသည့်
တန်ဖိုးကြီး မြေနေရာများနှင့် တိုက်ခန်းများ အရောင်းအ၀ယ်
ဖြစ်လာကြောင်း အိမ်ခြံမြေ အကျိုးဆောင် လုပ်ငန်းများထံမှ
စုံစမ်းသိရသည်။

“ခုရက်ထဲမှာ အိမ်ခြံမြေ အရောင်းအ၀ယ် နည်းနည်း
ပြန်လှုပ်လာပါတယ်။ အကွက်အကွင်းကျတဲ့ အင်းလျားလမ်း၊
ဗဟန်း၊ ရွှေတောင်ကြားထဲမှာဆို သိန်းပေါင်း တစ်သိန်းကျော်နဲ့
အရောင်းအ၀ယ် ရှိလာတယ်။ သံလွင်လမ်းမှာဆို
သိန်းခြောက်သောင်း၊ ခုနစ်သောင်းကျော်နဲ့ အရောင်းအ၀ယ်တွေ
ရှိလာတယ်။ ဒါတွေက နေထိုင်ဖို့ရော ရင်းနှီးမြှုပ်နှံချင်သူတွေက
ဝယ်ကြတာလည်း ပါပါတယ်” ဟု ရန်ကုန်မြို့ရှိ
အိမ်ခြံမြေ အကျိုးဆောင် လုပ်ငန်းတစ်ခုမှ
တာဝန်ရှိသူ တစ်ဦးက ပြောကြားသည်။

တိုက်ခန်း အရောင်းအ၀ယ် ဈေးကွက်တွင်မူ အမှန်တကယ်
နေထိုင်လိုသူများနှင့် ငှားစားရန် ၀ယ်ယူသူများကြောင့်
ဈေးကွက်သွက်လာခြင်းဖြစ်ကြောင်း သိရသည်။

“အများအားဖြင့် တိုက်ခန်းအရောင်းအ၀ယ် အငှားကတော့
စမ်းချောင်းက အသွက်ဆုံးပဲ။ နေချင်တဲ့သူတွေ ၀ယ်ကြတယ်။
ပြီးတော့ ကိုယ်တိုင် မနေပေမယ့် ပြန်ငှားဖို့အတွက်
ဝယ်ကြတာလည်းရှိတယ်။ ခုချိန်မှာ အရောင်းအ၀ယ်စပြီး
ပြန်သွက်လာတာ စမ်းချောင်းပဲ” ဟု Estate Myanmar
အိမ်ခြံမြေ အကျိုးဆောင် လုပ်ငန်းမှ တာဝန်ရှိသူ တစ်ဦးက
ပြောကြားသည်။

ထို့ပြင် လူနေထူထပ်လာကာ ဖွံ့ဖြိုးလာသည့်
မြောက်ဒဂုံမြို့နယ်တွင်လည်း နေထိုင်လိုသူများက
စုံစမ်းဝယ်ယူမှု ရှိလာကြောင်း သိရသည်။

ကျပ်သိန်း ၂၀၀၀၊ ၃၀၀၀ ဈေးဆိုပါက ခြံဝင်းကျယ်ကျယ်
အိမ်များရနိုင်ကာ ကျပ်သိန်း ၆၀၀၀ ၀န်းကျင် အိမ်အချို့မှာ
ရေကူးကန်ပါသည်အထိ ရှိကြောင်း သိရသည်။

ပြီးခဲ့သည့် ကာလများက ရန်ကုန်မြို့၏ အိမ်ခြံမြေဈေးကွက်မှာ
အရောင်းအ၀ယ် မရှိခဲ့သလောက် အေးစက်ခဲ့သည်
ဆိုသော်လည်း အငှားဈေးနှုန်းများပါ ဈေးနှုန်းကျဆင်းမှု
မရှိခဲ့ပေ။

အခြားတစ်ဖက်တွင် အိမ်ရာလိုအပ်ချက် မြင့်နေသော်လည်း
လက်ရှိထုတ်လုပ်နေသည့် တိုက်ခန်းများ ၀ယ်ယူမည့်သူ မရှိဘဲ
ဈေးကွက်အေးစက်ခဲ့ခြင်းဖြစ်သည်။

မြန်မာနိုင်ငံ၏ မြေဈေးကွက်သည် ၂၀၁၁ ခုနှစ်နောက်ပိုင်း
သိသိသာသာ မြင့်တက်လာခဲ့သည်။
* ပြည်ပ ရင်းနှီးမြှုပ်နှံမှုများ ၀င်လာခြင်း၊
* ဈေးကစားခြင်း၊ ဈေးကစားသည့် မြေများကို
Property gain tax မကောက်နိုင်ခြင်း၊
* စီမံကိန်းနယ်မြေများ ပေါ်ထွက်လာခြင်း၊
ထိုစီမံကိန်းများ ရှိသော်လည်း ထိုစီမံကိန်းများကြောင့်
မြေဈေးများ မြင့်တက်ခဲ့သော်လည်း Property gain tax
ကောက်ယူနိုင်ခြင်း မရှိခြင်းတို့ကြောင့်
မြေဈေးကွက်သည် သိသိသာသာ တက်လာခဲ့ပြီး
ကမ္ဘာပေါ်တွင် မြေဈေးအမြင့်ဆုံးဖြစ်သည့် တိုကျို၊ စင်ကာပူ၊
နယူးယောက်တိုင်းမ်စကွဲ စသည့် မြေများနှင့်အပြိုင်
မြင့်တက်ခဲ့ကြောင်း၊ ထို့ကြောင့် ပြည်ပရင်းနှီးမြှုပ်နှံသည့်
ကုမ္ပဏီကြီး အချို့သည် မြေဈေးကြောင့် လှည့်ပြန်သွားခဲ့ရသည့်
သာဓကများလည်း ရှိကြောင်း၊
ပြီးခဲ့သည့်နှစ်တွင် တောင်ကိုရီးယား၏ ကြီးမားသည့်
ရင်းနှီးမြှုပ်နှံမှု တရားဝင် ၀င်ရောက်လာမည့် SAMSUNG သည်
မြေဈေးနှုန်း ကြီးမြင့်မှုကြောင့် ဗီယက်နမ်နိုင်ငံသို့
ဦးလှည့်သွားသည့် သာဓကများ ရှိခဲ့ကြောင်း သိရသည်။

သို့သော်လည်း ရွေးကောက်ပွဲပြီးကာလ လက်ရှိအချိန်တွင်
အိမ်ခြံမြေဈေးကွက် အနည်းငယ် လှုပ်ခတ်မှု ရှိလာပြီး
အိမ်ခြံမြေ ဈေးနှုန်းများမှာ လူလတ်စားများနှင့် ၀င်ငွေနည်း
ပြည်သူများ ၀ယ်ယူနိုင်သည့် ဈေးနှုန်းများဖြင့် အရောင်းအ၀ယ်
ပြုလုပ်နိုင်ခြင်း ရှိမရှိ စောင့်ကြည့်ရမည်ဖြစ်ကြောင်း
အိမ်ခြံမြေ အကျိုးဆောင်များက ပြောကြားသည်။

(နီလာ)

*****

၂။ "ပြည်တွင်း၌ အိမ်၊ ခြံ၊ မြေဈေးကွက် အေးနေသော်လည်း
စင်ကာပူရောက် မြန်မာများ ကွန်ဒိုနှင့် တိုက်ခန်း ၀ယ်ယူရန်
စိတ်ဝင်စားမှု များနေပြီး အိမ်၊ ခြံ၊ မြေ အရောင်းပြပွဲ
နှစ်ရက်အတွင်း ကျပ်သိန်း ၇၀၀၀၀ ကျော်ဖိုး ရောင်းချနိုင်ခဲ့
ဟုဆို "

ပြည်တွင်း၌ အိမ်၊ ခြံ၊ မြေ ဈေးကွက် အေးနေသော်လည်း
စင်ကာပူရောက် မြန်မာများ ကွန်ဒိုနှင့် တိုက်ခန်း ၀ယ်ယူရန်
စိတ်ဝင်စားမှု များပြားပြီး အိမ်၊ ခြံ၊ မြေ အရောင်းပြပွဲ
နှစ်ရက်အတွင်း ကျပ်သိန်း ၇၀၀၀၀ ကျော်ဖိုး
ရောင်းချနိုင်ခဲ့ကြောင်း iMyanmr House com မှ
မန်နေဂျင်း ဒါရိုက်တာ ဦးနေမင်းသူက ပြောကြားသည်။

အွန်လိုင်း အိမ်ခြံမြေ ရောင်းဝယ်ငှား ၀က်ဘ်ဆိုက်ဖြစ်သော
iMyanmr House com မှ ကြီးမှူး၍
၂၀၁၅ ခုနှစ် အောက်တိုဘာ၂၄ ရက်နှင့် ၂၅ ရက်များတွင်
စင်ကာပူနိုင်ငံ မြန်မာရပ်ကွက် Peninsula Plaza အနီးရှိ
Grand Park City Hall Hotel တွင် စင်ကာပူနိုင်ငံရှိ
မြန်မာ့အကြီးဆုံး အိမ်ခြံမြေ အရောင်းပြပွဲတွင်
ရောင်းချနိုင်ခဲ့ခြင်းဖြစ်ကြောင်း သိရသည်။

“စင်ကာပူမှာရှိတဲ့ မြန်မာရပ်ကွက်နားမှာပေါ့နော်။
ကျွန်တော်တို့ အိမ်၊ ခြံ၊ မြေ အရောင်းပြပွဲ သွားလုပ်တယ်။
စုစုပေါင်း ဆောက်လုပ်ရေး ကုမ္ပဏီ ၁၂ ခုကျော် ပါဝင်
ပြသပါတယ်။ ဒီပြပွဲမှာ တိုက်ခန်းနဲ့ ကွန်ဒို စုစုပေါင်း
မြန်မာကျပ်ငွေ သိန်းပေါင်း ခုနစ်သောင်းကျော်ဖိုး
ရောင်းချခဲ့ရပါတယ်။ စင်ကာပူ ရောက်နေတဲ့ မြန်မာတွေက
ဝယ်ကြတာပါ။ စင်ကာပူ လူမျိုးတွေလည်း လာတော့
ကြည့်ပါတယ်။ သူတို့ကတော့ ၀ယ်ခွင့် မရှိတဲ့အတွက်
ဝယ်လို့တော့ မရဘူးပေါ့” ဟု ဦးနေမင်းသူက ဆိုသည်။

အဆိုပါ ပြပွဲသို့ Golden City ၊ Star City ၊ Living Square ၊
Tritone ၊ စွယ်တော် စီးတီး၊ iGreen ၊ စမ်းချောင်းဂါးဒင်း စသည့်
ကွန်ဒိုနှင့် အဆင့်မြင့် တိုက်ခန်း ဆောက်လုပ်ရေး ကုမ္ပဏီများ
ဝင်ရောက်ပြသခဲ့ပြီး တိုက်ခန်းနှင့် အဆင့်မြင့် ကွန်ဒိုများကို
အထူးဈေးနှုန်းများ၊ အရစ်ကျ စနစ်များဖြင့် ရောင်းချခဲ့သည်။

ပြည်တွင်း အိမ်၊ ခြံ၊ မြေ ဈေးကွက် အနေဖြင့်
၂၀၁၄ ခုနှစ် အစောပိုင်း ကတည်း အရောင်းအ၀ယ်မှာ
အေးစက်နေခဲ့ပြီး ရွေးကောက်ပွဲ အလွန်တွင် ဖြစ်ပေါ်လာနိုင်ဖွယ်
ရှိသည့် အပြောင်းအလဲများကုို စောင့်ကြည့်နေခြင်ကြောင့်လည်း
ဈေးကွက်မှာ ပိုမိုအေးစက် နေကြောင်းလည်း သိရသည်။

ပြည်တွင်း အိမ်၊ ခြံ၊ မြေ ဈေးမှာ ၂၀၁၂ ခုနှစ် နောက်ပိုင်းတွင်
တစ်ဟုန်ထိုး မြင့်တက်လာခဲ့ပြီး လာဘ်ပေးလာဘ်ယူမှု၊
ကျောက်မျက်နှင့် ဘိန်းလုပ်ငန်းများမှ ငွေမည်းကို ငွေဖြူ 
ပြောင်းလဲရာ နေရာအဖြစ် ပြောင်းလဲ သွားခဲ့ကြောင်းသိရပြီး
ရန်ကုန် အိမ်၊ ခြံ၊ မြေ နှင့် တိုက်ခန်း ဈေးနှုန်းများမှာ
ဖွံ့ဖြိုးပြီး နိုင်ငံများ၏ ကမ္ဘာ့အဆင့်မီ မြို့ကြီးများ၏ ဈေးနှုန်းသို့
ရောက်ရှိသွားခဲ့ကာ
လက်ရှိ အချိန်တွင်လည်း အရောင်းအ၀ယ် အေးနေသည့်တိုင်
ဈေးနှုန်းမှာ သိသိသာသာ ကျဆင်းလာခြင်း မရှိသေးဘဲ
အိမ်၊ ခြံ၊ မြေ ဈေးကွက်မှာ အရောင်းအ၀ယ် ဖောင်းပွမှု၊
ဈေးနှုန်း ဖောင်းပွမှုများဖြင့် ဆက်လက် ရှိနေသေးသည်။

လူတန်းစားများ ၀ယ်ယူနိုင်သည့် ဈေးနှုန်း မဖြစ်မချင်း
အိမ်၊ ခြံ၊ မြေ ဈေးကွက် တည်ငြိမ်မှု ရရှိမည် မဟုတ်ကြောင်း
“၂၀၁၅ မြန်မာနိုင်ငံ အိမ်၊ ခြံ၊ မြေ ဈေးကွက် အခြေအနေနှင့်
အနာဂတ် အလားအလာ” ဟောပြောပွဲတွင်
ရွှေမင်းသား အိမ်၊ ခြံ၊ မြေ လုပ်ငန်းမှ
မန်နေးဂျင်း ဒါရိုက်တာ ဦးမြတ်သူဝင်းက ဆိုသည်။

credit - Eleven Media Group