“စင်ကာပူနိုင်ငံ၏မြေယာသိမ်းဥပဒေနှင့် အနာဂတ်ရန်ကုန်”

“စင်ကာပူနိုင်ငံ၏မြေယာသိမ်းဥပဒေနှင့် အနာဂတ်ရန်ကုန်”
   
၁။ "စင်ကာပူနိုင်ငံ၏ မြေယာသိမ်းဥပဒေ"

မြန်မာနိုင်ငံတွင် တောင်သူလယ်သမားတို့၏ လယ်တွေယာတွေ
အတင်းအဓမ္မ အသိမ်းခံနေရတဲ့ သတင်းတွေ ကြားနေရတော့
မိမိရောက်ရှိနေသော စင်ကာပူနိုင်ငံတွင် ကျင့်သုံးနေသော
အစိုးရ၏ မြေယာသိမ်း ဥပဒေကို လေ့လာကြည့်မိသည်။

၁၉၆၅ ခုနှစ်တွင် စင်ကာပူ လွတ်လပ်ရေးရပြီးနောက် အစိုးရ၏
စီမံကိန်းများ၊ ကားလမ်း၊ ရထားလမ်း၊ တံတား၊ ကျောင်း၊ ဆေးရုံ၊
စက်မှုဇုန်စသည်တို့ စတင် အကောင်အထည်ဖော်ရန်အတွက်
မြေယာများ လိုအပ်ချက် ရှိလာခဲ့သည်။

ထို့ကြောင့် ၁၉၆၆ ခုနှစ် စင်ကာပူအစိုးရ၏
ပထမဆုံး လွှတ်တော်တွင် မြေယာသိမ်း ဥပဒေသစ်
(Land Acquisition Act) ကို အဆိုပြု တင်သွင်းခဲ့သည်။

ထိုဥပဒေတွင် နိုင်ငံတော်အစိုးရသည် အများပြည်သူနှင့်ဆိုင်သော
အဆောက်အအုံ ကျောင်း၊ ဆေးရုံ၊ ဘူတာ၊ ကားလမ်း၊
ရထားလမ်း၊ စက်မှုဇုန် စသည်တို့အတွက် မြေနေရာ
လိုအပ်လာပါက မည်သည့်မြေနေရာမဆို မြေပိုင်ရှင်အား
လျော်ကြေးငွေ ပေးအပ်ကာ သိမ်းယူနိုင်သည်။

ထို့နောက် ၁၉၆၇ ခုနှစ် ဇူလိုင် ၁၇ ရက်မှစတင်၍ ဥပဒေကို
အတည်ပြု ပြဋ္ဌာန်းခဲ့သည်။ လျော်ကြေးငွေ သတ်မှတ်ချက်နှင့်
ပတ်သက်၍ အစိုးရနှင့်မြေပိုင်ရှင် အငြင်းပွားပါက ကြားခံ
ဖြေရှင်းနိုင်ရန်လည်း ကြားခံအဖွဲ့အစည်းတစ်ခုထား၍
ဖြေရှင်းစေခဲ့သည်။

မြေပိုင်ရှင်များ ပိုမိုကျေနပ်မှုရှိနိုင်ရန်နှင့် တရားမျှတမှု ရှိစေရန်
အတွက် ၁၉၇၃ ခုနှစ်တွင် လျော်ကြေးငွေကို မြေကွက်နှင့်
ဖြိုဖျက်မည့် အဆောက်အအုံ၏ ကာလတန်ဖိုးဖြင့်
တွက်ချက်ရမည်ဟု ဥပဒေကို ပြင်ဆင်ခဲ့သည်။

ထိုဥပဒေသည် စင်ကာပူအစိုးရ၏ မြေယာပိုင်ဆိုင်မှု များပြားစေပြီး
နိုင်ငံ့ဖွံ့ဖြိုးတိုးတက်မှုကို များစွာအထောက် အကူဖြစ်စေခဲ့သည်။
၁၉၈၅ ခုနှစ်တွင် စင်ကာပူအစိုးရသည် နိုင်ငံ၏မြေယာ ၇၅
ရာခိုင်နှုန်းကို ပိုင်ဆိုင်ထားပြီးဖြစ်သည်။

ထို့နောက် သိမ်းယူရရှိထားသော မြေများကို စီမံထိန်းချုပ်ရန်
မြို့ပြ တည်ဆောက်ရေး အဖွဲ့(Urban Redevelopment Authority)
ကို ဖွဲ့စည်းပြီး စက်မှုဇုန်နယ်မြေ၊ စီးပွားရေးနယ်မြေ၊ လူနေရပ်ကွက်၊
ကျောင်း၊ ကစားကွင်းနှင့် ပန်းခြံများ စသည်တို့ကို သတ်မှတ်၍
စီမံကိန်းများ စတင်အကောင်အထည် ဖော်ခဲ့သည်။

စက်မှုဇုန်များ သတ်မှတ်ကာ လုပ်ငန်းရှင်များ လုပ်ငန်းလုပ်ကိုင်
နိုင်ရန် အနှစ် ၃၀ ဂရမ်၊ အနှစ် ၅၀ ဂရမ် စသည်ဖြင့် ဈေးနှုန်း
ချိုသာစွာ ပြန်လည် ငှားရမ်းခဲ့သည်။ ပုဂ္ဂလိကပိုင် လုပ်ငန်းများ
ဖွံ့ဖြိုးလာပြီး ကုန်ထုတ်လုပ်ငန်းများ တိုးပွားလာခဲ့သည်။
လုပ်ငန်းဖွံ့ဖြိုးမှုကို လိုက်၍လည်း မြေဂရမ်သက်တမ်း တိုးရန်
ခွင့်ပြုခဲ့သည်။

မြန်မာနိုင်ငံတွင်မူ အာဏာရှင်လူတန်းစားနှင့် ၎င်းတို့နှင့်
ဆက်နွှယ်သူများကသာ မြို့သစ်၊ ကွက်သစ်စသည်များကို
သိမ်းယူကာ ခွဲဝေပိုင်ဆိုင်ကြသဖြင့် အခြားအသေးစားနှင့်
အလတ်စား လုပ်ငန်းများအတွက် လုပ်ငန်းမြေနေရာများရရန်
ခက်ခဲလျက် ရှိသည်။

ဦးသိန်းစိန် ဦးဆောင်သော အစိုးရ၏ ငါးနှစ်တာ ကာလအတွင်း
ပြည်သူလူထု စိုက်ပျိုးမြေများစွာ သိမ်းဆည်းခြင်း
ခံလိုက်ရသော်လည်း လျော်ကြေးမရ၊ တိုင်တန်း၍မရ
ဖြစ်ခဲ့ကြရသည်။
မည်သည့်စီမံကိန်းအတွက် သိမ်းသည်ကိုမသိရ။
ရာထူးရှိပုဂ္ဂိုလ်များ၏ အမည်များတပ်ကာ သိမ်းဆည်းခံလိုက်
ကြရသည်။

ယခုအစိုးရသစ် တက်လာသော ကာလတွင် ပြည်တွင်းပြည်ပ
ရင်းနှီးမြှုပ်နှံလိုသူ၊ စက်ရုံ၊ အလုပ်ရုံများ တည်ဆောက်လုပ်ကိုင်
လိုသူ များပြားလာသော်လည်း မြေနေရာတန်ဖိုး မြင့်မားခြင်းနှင့်
အစိုးရမှ ဖြည့်ဆည်းပေးရမည့် အခြေခံ အဆောက်အအုံ
ဖြစ်သော ရေ၊ လျှပ်စစ်၊ လမ်းတံတားစသည့် မပြည့်စုံခြင်းကြောင့်
လုပ်ငန်းစတင်ရန် ခက်ခဲနေကြသည်။

ယခုတက်လာမည့် အစိုးရသစ်အနေဖြင့် လုပ်ငန်း လည်ပတ်ခြင်း
အဆောက်အအုံ တည်ဆောက်ခြင်းမရှိဘဲ မြေလွတ်ဖြစ်နေသော
စက်မှုဇုန်နယ်မြေများကို ပြန်လည်သိမ်းယူကာ
လုပ်ငန်းလုပ်ကိုင်လိုသော အခြားအသေးစား၊ အလတ်စား
ပုဂ္ဂလိက လုပ်ငန်းရှင်များသို့ နှစ် ၃၀၊ နှစ် ၅၀ စသည့်
မြေဂရမ်များ ပြန်လည်ရောင်းချခြင်းဖြင့် နိုင်ငံဘဏ္ဍာတိုးသည့်
အပြင် နိုင်ငံထုတ်ကုန် တိုးမြင့်ကာ ပြည်ပသွင်းကုန်များလည်း
လျော့နည်းလာမည် ဖြစ်သည်။

စင်ကာပူအစိုးရသည် ပုဂ္ဂလိက ရှယ်ယာရှင်များ ဖိတ်ခေါ်၍
အစိုးရနှင့်ပူးပေါင်းကာ ပြည်သူလူထု နေထိုင်မှု အဆင်ပြေ
စေရေးအတွက် HDB (Housing Development Board)အဖွဲ့ကို
ဖွဲ့စည်းကာ သိမ်းယူရရှိသည့် မြေများပေါ်တွင် အထပ်မြင့် လူနေ
တိုက်ခန်းများ တည်ဆောက်စေခဲ့သည်။

၁၉၈၅ ခုနှစ်တွင် အိမ်ခန်းပေါင်း ငါးသိန်းကျော် တည်ဆောက်ခဲ့ပြီး
ဖြစ်သည်။ ၂၀၁၀ ပြည့်နှစ်တွင် လူနေတိုက်ခန်းပေါင်း
တစ်သန်းကျော် တည်ဆောက်ပြီးခဲ့၍ အရစ်ကျ ငွေပေးခြေစနစ်ဖြင့်
ပြည်သူလူထုသို့ ရောင်းချခဲ့ပြီး လစဉ်ဝင်ငွေ၏ ၂၅ ရာခိုင်နှုန်းခန့်
ပေးရုံဖြင့် နိုင်ငံသားတိုင်းကို အိမ်ခန်းပိုင်ဆိုင်ခွင့် ရစေခဲ့သည်။

နိုင်ငံ၏ လူဦးရေ ငါးသန်းအတွက် အိမ်ခန်းတစ်သန်း
တည်ဆောက်ထားသည်ဖြစ်ရာ တစ်အိမ်ထောင်လျှင် ပျမ်းမျှ
ငါးဦးနှုန်းဖြင့် နေထိုင်နိုင်ပြီး ပြည်သူလူထုနေထိုင်မှု အဆင်
ပြေစေခဲ့သည်။

မြေယာပိုင်ဆိုင်မှုသည် အစိုးရလက်တွင်းသာ ရှိ၍ မြို့ပြများ
သတ်မှတ် ဖော်ထုတ်ရာတွင် လွယ်ကူစေခဲ့ပြီး ရေရှည်
စနစ်ကျသော လူနေရပ်ကွက်များ၊ စီးပွားရေးဇုန်များ၊
စက်မှုဇုန်များ ပေါ်ပေါက်စေခဲ့သည်။

မြန်မာနိုင်ငံတွင် စစ်အစိုးရ အဆက်ဆက် အုပ်ချုပ်ခဲ့မှုကြောင့်
စီးပွားရေး၊ လူမှုရေး၊ ပညာရေး အစစအရာရာ နိမ့်ကျခဲ့ရသည်။

ပြည်သူလူထုအတွက် လမ်းပန်းဆက်သွယ်မှု၊ နေထိုင်မှု
စသည်တို့အတွက် ပညာရှင်များနှင့် ညှိနှိုင်းတိုင်ပင်ကာ
စီစဉ်ဆောင်ရွက်မှု မရှိခဲ့သဖြင့် လူဦးရေ တိုးတက်လာမှုတို့ကြောင့်
ရန်ကုန်နှင့် အခြားမြို့ကြီးများမှာ အခြေခံ အဆောက်အအုံ
ပြည့်စုံစွာမရှိဘဲ ပရမ်းပတာ ကြီးထွားလာခဲ့ပြီး ပြည်သူလူထု
သွားလာမှု အဆင်မပြေ ဖြစ်နေကြရသည်။

စက်မှုဇုန်နှင့် လူနေရပ်ကွက် စသည်တို့မှာ ခွဲခြားထားရမည့်အစား
တွဲလျက်ထားရှိခြင်း၊ လူနေရပ်ကွက်များအတွင်း လုပ်ကိုင်နေသော
စက်မှုလုပ်ငန်းများကြောင့် အချို့သောနေရာများတွင် ပတ်ဝန်းကျင်
ဆူညံခြင်း၊ လေထုညစ်ညမ်းခြင်း၊ ရေဆိုးရေညစ်များ
ရေတွင်းရေကန်များအတွင်း ၀င်ရောက်ခြင်းတို့ကြောင့်
ပြည်သူလူထု အဆင်မပြေမှုများ ကြုံတွေ့နေကြရသည်။
လွန်ခဲ့သော လအနည်းငယ်ခန့်က မန္တလေး တောင်သမန်အင်း
အတွင်း ငါးများသေဆုံးမှုသည် စက်မှုဇုန်များမှ ဓာတုပစ္စည်းများ
ပါဝင်သော စွန်ပစ်ရေဆိုးရေညစ်များကြောင့် ဖြစ်သည်ကို
အားလုံးသိရှိကြပြီး ဖြစ်သည်။

စက်မှုဇုန်များအတွင်း လုပ်ငန်းလိုင်စင်များ ခွင့်ပြုချမှတ်ရာတွင်
လုပ်ငန်းအလိုက် စွန့်ပစ်မည့် ပစ္စည်းအမျိုး အစား၊
စွန့်ပစ်ပစ္စည်းပမာဏ၊ စွန့်ပစ်မည့်နည်းလမ်း စသည်တို့ကြောင့်
ရေထု၊လေထု ညစ်ညမ်းမှုရှိ၊ မရှိ သေချာစွာ စိစစ်လေ့လာပြီးမှ
လုပ်ငန်း ခွင့်ပြုသင့်သည်။ ရေဆိုးများစွန့် ထုတ်ရာတွင်လည်း
မြစ်ချောင်းများ ဓာတုအဆိပ်သင့်ခြင်းမှ ကာကွယ်ရန်
မြစ်ချောင်းအတွင်း ထုတ်လွှတ်မည့် ရေဆိုးများကို သန့်စင်ပြီးမှ
ထုတ်လွှတ်ရန် စည်းကမ်းများ ချမှတ်ထားသင့်သည်။

စင်ကာပူအစိုးရသည် ၁၉၆၆ လွတ်လပ်ရေးရပြီး ပထမဆုံး
လွှတ်တော်တွင် နိုင်ငံ၏ တိုးပွားလာမည့် လူဦးရေနှင့် စီးပွားရေး
လုပ်ငန်းများအတွက် လမ်းပန်းဆက်သွယ်ရေးနှင့် ရထားလမ်းများ
လိူအပ်ချက်ကို စကားရည်လုပွဲများ ကျင်းပကာ အဖြေရှာ
စည်းဝေးတိုင်ပင်ခဲ့သည်။

ကွယ်လွန်သွားပြီးဖြစ်သော ၀န်ကြီးချုပ်ဟောင်း လီကွမ်ယု၏
ဦးဆောင်မှုဖြင့် ယခု MRT လူအများသိထားသော
မြေအောက်ရထားလမ်းများကို စီမံကိန်းများ စတင်ရေးဆွဲကာ
အကောင်အထည် ဖော်ခဲ့သည်။
၁၉၈၈ ခုနှစ် မြန်မာနိုင်ငံတွင် စစ်အစိုးရကို တော်လှန်သော
လူထု အုံကြွမှုများ ဖြစ်နေချိန်တွင် စင်ကာပူနိုင်ငံ၏ ပထမဆုံး
မြေအောက်ရထားလမ်းပိုင်းကို ဘူတာ ၂၀ တည်ဆောက်ပြီးချိန်
ဝန်ကြီးချုပ် လီကွမ်းယုမှ တရားဝင် ဖွင့်လှစ်ပေးခဲ့သည်။

ပညာဥာဏ် အမြှော်အမြင်နှင့် ပြည့်စုံသော
ခေါင်းဆောင်အောက်တွင် တိုင်းပြည် ဖွံ့ဖြိုးတိုးတက်ခဲ့သည့်
အထင်ရှားဆုံး ဥပမာပင်ဖြစ်သည်။

ထို့ကြောင့် စင်ကာပူနိုင်ငံ၏ မြို့ပြ ဖွဲ့စည်းပုံတို့မှာ စနစ်ကျ
လှသည်။ အပန်းဖြေနားနေရန် ပန်းခြံများ၊ ဈေးဝယ်စင်တာများမှာ
မြို့နယ်အလိုက် အပြည့်အစုံ ရှိသည်။

ဤသည်ကိုပင် အချို့သော မြန်မာများက ကြံဖန်ပြီး ဂုဏ်ယူ
ကြသေးသည်။ စင်ကာပူ လွတ်လပ်ရေးရတော့ ရန်ကုန်ကိုလာပြီး
လေ့လာတယ်။ ပြီးမှ စင်ကာပူကို တည်ထောင်တယ်ဟု
ပြောလေ့ရှိသည်။

စင်ကာပူကို လာရောက် လည်ပတ်ဖူးသော မြန်မာ လူမျိုးများ
အားလုံး သိကြပါလိမ့်မည်။ စင်ကာပူနိုင်ငံမှာ ရန်ကုန်နှင့်
တူသောနေရာ တစ်ခုမှမရှိပါ။ ဘယ်ကိုပဲ ကြည့်ကြည့် သန့်ရှင်း
သာယာနေသည်ကိုပဲ မြင်ရမည်။

မြန်မာနိုင်ငံမှ လာသောသူများ ပထမဦးဆုံး ပြောသောစကားမှာ
လမ်းကြီးတွေက အကျယ်ကြီးတွေဟူသော စကားဖြစ်သည်။
တကယ်တော့ လမ်းတင်မဟုတ် ပန်းခြံတွေ၊ ဥယျာဉ်တွေလည်း
ကျယ်သည်။ ကျောင်းတွေလည်း ကျယ်သည်။ ကစားကွင်းတွေ
လည်း ကျယ်သည်။ ရှော့ပင်းမောဟု ဆိုနေသော ကုန်တိုက်ကြီး
တွေကလည်း ကျယ်သည်။ ရုပ်ရှင်ရုံတွေကအစ ကျယ်သည်။

စာရေးသူသည် မကြာခဏ စဉ်းစားမိသည်။ ရန်ကုန်ကို လာပြီး
အတုခိုးရင် ရန်ကုန်နှင့် တူတာရှိရမည်ဟု မကြာခဏ
စဉ်းစားမိသည်။ တကယ်တော့ စင်ကာပူ ခေါင်းဆောင်များသည်
ရန်ကုန်ကိုလာပြီး လေ့လာခဲ့တာတော့ ဖြစ်နိုင်သည်။ သို့သော်
ရန်ကုန်ကို အတုယူတာမဟုတ်။ ရန်ကုန်၏ အမှားများကို
သင်ခန်းစာယူသွားတာပဲ ဖြစ်ရမည်။

ထိုအချိန်က ၁၉၆၅ ခုနှစ်က ရန်ကုန်ဆိုသည်မှာ ယခု ရန်ကုန်
မြို့တွင်း ခြောက်မြို့နယ်သာ ရှိသေးသည်။ သူတို့ လေ့လာခဲ့
သည်က ကျောက်တံတားနှင့် လသာမြို့နယ် စသည်တို့သာ
ဖြစ်ခဲ့လိမ့်မည်။

လမ်း ၃၀ မှာ လမ်းကျဉ်းလေးတွေကို တွေ့လိမ့်မည်။
စင်ကာပူတွင် ယာဉ်ကြော မပိတ်အောင် လမ်းမကျယ်ကြီးတွေ
ဖောက်ဖို့ စီစဉ်ခဲ့ကြလိမ့်မည်။ ရထားလမ်းများသည်
မြေပြင်ပေါ်တွင် ရှိသဖြင့် ကားလမ်းနှင့် တစ်လှည့်စီ
သွားနေရသည်။ ထို့ကြောင့် လန်ဒန်မြို့လို မြေအောက်
ရထားလမ်းများသာ ဖောက်မည်ဟု စီစဉ်ခဲ့ကြလိမ့်မည်ဟု
တွေးနေမိသည်။

ထိုအချိန်က စင်ကာပူ ခေါင်းဆောင်တို့သည် ရန်ကုန်ကိုသာ
လေ့လာသည်မဟုတ် လန်ဒန်နှင့် အခြားမြို့ကြီးများကိုလည်း
လေ့လာခဲ့လိမ့်မည်။ ယနေ့ ကမ္ဘာတွင် ပေါ်ထွန်းနေသော
ခေတ်မီ သိပ္ပံနှင့် နည်းပညာများကို စင်ကာပူနိုင်ငံသည်
မျက်ခြည်မပြတ် လေ့လာ အသုံးချနေသည်ကို ကြည့်ခြင်း
အားဖြင့် သိနိုင်သည်။

စင်ကာပူနိုင်ငံသည် မြန်မာနိုင်ငံထက် ၁၇ နှစ် နောက်ကျပြီးမှ
ကိုယ်ပိုင်အစိုးရဖွဲ့ပြီး နိုင်ငံ တည်ထောင်ခွင့် ရခဲ့သော်လည်း
အနှစ် ၅၀ အတွင်း ကမ္ဘာ့ထိပ်သီးနိုင်ငံ ဖြစ်လာအောင်
ကြိုးပမ်းနိုင်ခဲ့သည်။

မြန်မာနိုင်ငံသည် အနှစ် ၅၀ အတွင်း အာရှထိပ်သီးနိုင်ငံမှ
အဆင်းရဲဆုံး နိုင်ငံအဆင့်သို့ ကျရောက်သွားရသည်မှာ အစိုးရ
အဆက်ဆက်၏ စီမံခန့်ခွဲမှု ညံ့ဖျင်းခြင်းကြောင့်ဟူ၍သာ
သုံးသပ်မိ ပါတော့သည်။

(ခိုင်မြဲ)

*****

(အထက်ပါဆောင်းပါးနှင့် အတူ တလောကဖတ်ခဲ့မိသည့်
ဆက်စပ်မှုရှိသော အောက်ပါသတင်းအား
တွဲ၍တင်ပေးလိုက်ပါသည်။)

၂။ "မြို့ပြစီမံကိန်း ကြိုတင်ရေးဆွဲခြင်း မရှိပါက အနာဂတ်တွင်
ရန်ကုန်မြို့သည် ရှုပ်ထွေးကျပ်ညပ်ခြင်း၊ ပတ်ဝန်းကျင်
ညစ်ညမ်းခြင်းနှင့် ကိုယ်ပိုင်သွင်ပြင် မရှိသောမြို့သို့
ဦးတည်နိုင်ကြောင်း YHT ဆို"

လက်ရှိတွင် မြို့ပြစီမံကိန်း ကြိုတင်ရေးဆွဲခြင်း မရှိပါက
အနာဂတ်တွင် ရန်ကုန်မြို့သည် ရှုပ်ထွေးကျပ်ညပ်ခြင်း၊
ပတ်ဝန်းကျင် ညစ်ညမ်းခြင်းနှင့် ကိုယ်ပိုင်သွင်ပြင် မရှိသောမြို့သို့
ဦးတည်နိုင်ကြောင်း ရန်ကုန်မြို့ပြ အမွေအနှစ် ထိန်းသိမ်း
စောင့်ရှောက်ရေး အဖွဲ့ (YHT) က အောက်တိုဘာ ၂၆ ရက်က
ထုတ်ပြန်ခဲ့သည်။

ယခုလက်ရှိတွင် နိုင်ငံ၏ စီးပွားရေး အချက်အခြာကျသည့်
ရန်ကုန်မြို့သည် အပြောင်းအလဲကာလကို တွေ့ကြုံနေရပြီ
ဖြစ်ကြောင်း၊ စီးပွားရေးနှင့် မြို့ပြဖွံ့ဖြိုးတိုးတက်မှုများ
ပေါ်ထွန်းလာသည်နှင့်အမျှ လာမည့် ၁၀ နှစ်မှ ၁၅ နှစ်အတွင်း
ရန်ကုန်မြို့၏ လူဦးရေသည် တိုးပွားလာမည် ဖြစ်ကြောင်း
YHT ၏ ထုတ်ပြန်ချက်တွင် ဖော်ပြထားသည်။

သို့သော် ယခုချက်ချင်း စတင်ဆောင်ရွက်မည် ဆိုပါက
ရန်ကုန်သည် အာရှတစ်ဝန်းတွင် ဆွဲဆောင်မှု အရှိဆုံးနှင့်
နေချင့်စဖွယ် အကောင်းဆုံးမြို့ တစ်မြို့၊ ဘာသာတရား၊
ယဉ်ကျေးမှုနှင့် ဗိသုကာဆိုင်ရာ အဖိုးမဖြတ်နိုင်သည့်
တန်ဖိုးများကို သင့်တင့်လျောက်ပတ်စွာ အသုံးချနိုင်သည့်
စိမ်းလန်းသောမြို့၊ ရှိပြီးသော အမွေအနှစ်နှင့် အသစ်များအား
အကောင်းဆုံးယှဉ်တွဲထားသည့် ဆိပ်ကမ်းမြို့ တစ်မြို့၊
ဒေသတွင်း အခြားသော မြို့ကြီးများနှင့်မတူ တစ်မူကွဲပြားသည့်
ဆန်းသစ်တီထွင်မှုများနှင့် ရေရှည်တည်တံ့သော စီးပွားရေး
ဖွံ့ဖြိုးတိုးတက်မှုများ၏ ဗဟိုချက်မြို့တစ်မြို့အဖြစ်
ပေါ်ထွန်းလာစေနိုင်မည်ဟု YHT က ဆိုသည်။

ယခုလာမည့် နှစ်ပိုင်းအတွင်း ချမှတ်မည့် ဆုံးဖြတ်ချက်များသည်
၂၁ ရာစု၏ ကျန်ရှိသည့် ကာလအတွင်း ဖြစ်ပေါ်လာမည့်
ရန်ကုန်မြို့ကို ပုံဖော်လိမ့်မည်ဖြစ်ကြောင်း၊
- ရန်ကုန်မြို့ကို စီမံခန့်ခွဲမှုကောင်းသော လက္ခဏာရပ်များ
ဖြစ်သည့် မြို့၏ သူမတူ ထူးခြားသော သမိုင်းဝင်ဗိသုကာ
အမွေအနှစ်များအား တန်ဖိုးထား ထိန်းသိမ်းစောင့်ရှောက်ရန်၊
- အများပြည်သူ အပန်းဖြေ အနားယူနိုင်သော သဘာဝစိမ်းလန်း
မြေ ကွက်လပ်များအား ထိန်းသိမ်းစောင့်ရှောက်ရန်၊
- အသစ်ဆောက်လုပ်သော အဆောက်အအုံများသည်
တည်ရှိပြီးဖြစ်သော သမိုင်းဝင်မြို့လယ်နှင့် လိုက်လျောညီထွေမှု
ရှိစေရန်၊
- လူသွားလမ်းများမှာ လမ်းလျှောက်ရလွယ်ကူ ဘေးကင်းပြီး
အများပြည်သူများ အတွက် ရည်ရွယ်သော လှပသည့်
ဒီဇိုင်းများဖြစ်ရန်၊
- ဘတ်စ်ကားများ၊ ကုတို့များ၊ မီးရထားနှင့် စက်ဘီးအစရှိသည့်
လွယ်ကူသက်သာ ကောင်းမွန်သော အများပြည်သူသုံး
ပို့ဆောင်ရေးစနစ် ဖော်ဆောင်ရန်၊
- မြို့နေပြည်သူများ၏ ဘာသာရေး၊ ယဉ်ကျေးမှု၊ နိုင်ငံရေးနှင့်
သမိုင်းဆိုင်ရာ တန်ဖိုးထားသည့် ပြယုဂ်ဖြစ်သော
အမွေအနှစ်များကို ထိန်းသိမ်းစောင့်ရှောက်ရန်၊
- လုပ်ငန်းအမျိုးမျိုးဖြင့် စိုလွင်တက်ကြွသော မြို့၏စီးပွားရေးကို
ဖွံ့ဖြိုးတိုးတက်စေရန်၊
- သန့်ရှင်းသော ပတ်ဝန်းကျင်၊ လေကောင်းလေသန့်နှင့်
ရေကောင်း ရေသန့်များဖြင့် မြို့နေလူထု၏ ကျန်းမာသော
လူနေမှုဘ၀များကို အထောက်အကူပြုရန်တို့အား
အလေးထား အားပေးဆောင်ရွက်ရန် YHT က တိုက်တွန်း
ထားသည်။

(ထက်ရှိုင်း)

credit - Eleven Media Group