"ပုဂ္ဂလိကလက်သို့ ရောက်ရှိနေသည့် အသုံးမချရသေးသော မြေကွက်များ အပေါ် ဝေဖန် သုံးသပ်ထားသည့် သတင်းများ"

"ပုဂ္ဂလိကလက်သို့ ရောက်ရှိနေသည့် အသုံးမချရသေးသော
မြေကွက်များ အပေါ် ဝေဖန် သုံးသပ်ထားသည့်
သတင်းများ"
၁။ "အိမ်ခြံမြေ ဈေးကစားသူများကြောင့် မြေဈေးနှုန်းများ
မြင့်တက်လာ"

မြေကွက်များကို အမှန်တကယ်နေထိုင် အလုပ်လုပ်ကိုင်သူများ
ထက် မြေကွက် ၀ယ်ရောင်းများ၊အာဏာပိုင်များနှင့်ပတ်သက်သူ
များသာ ကြိုတင်ရယူထားခြင်းဖြစ်ရာ ပါမစ်၊ ဂရန်တွင် ပါရှိသည့်
စည်းကမ်းချက်များ ပြဋ္ဌာန်း ချက်များအတိုင်း
ခေတ်အဆက်ဆက်တွင် အရေးယူမှုမရှိခဲ့ခြင်းကြောင့်
မြေဈေးနှုန်းများ ကြီးမြင့်နေရခြင်းဖြစ်သည်ဟု မြန်မာနိုင်ငံ
ဆောက်လုပ်ရေးဆိုင်ရာ လုပ်ငန်းရှင်များအသင်း
ဒုတိယဥက္ကဋ္ဌ ဦးကိုကိုထွေးက ပြောသည်။

"အလုပ်မလုပ်တဲ့သူတွေကို အခွင့်အရေး ပေးထားသလို
ဖြစ်နေတယ်။ မြေ၀ယ်ရောင်း မလုပ်ရဘူးလို့မဆိုလိုချင်ပေမယ့်
ဥပဒေ အတိုင်းလုပ်ရမယ်။ စက်မှုဇုန်မြေ၀ယ်ရင် စက်မှုမြေမှာ
စက်ရုံဆောက်ရမယ်။မဆောက် ရင် ပြန်သိမ်းမယ်။
တကယ် သိမ်းပြလိုက်ရင် မြေက ဈေးကျမှာပဲ၊
အခုနောက်ပိုင်းမှာလယ်မြေတွေထိပါ လိုက်ဝယ်ဈေးကစားကြ
လို့ အရောင်းအ၀ယ် မဖြစ်တဲ့အချိန်မှာတောင်
တချို့လယ်မြေတွေက သိန်း ၃,၀၀၀ လောက် အထိ ဈေးခေါ်
လာတယ်။ စက်မှုဇုန်တွေ ချပေးတုန်းကဆို တစ်ကွက်ကို
သိန်း ၉၀ လောက်ပဲ ပေးသွင်းရတဲ့ အကွက်တွေက အချင်းချင်း
လှည့်ပတ်ရောင်းလိုက်၊ ဈေးကစားလိုက်နဲ့ တချို့
နေရာကောင်းတဲ့ အကွက်တွေဆို သိန်း ၉,၀၀၀လောက်ထိ
ဖြစ်လာပြီ။ မြေယာ မူဝါဒအရလည်း မြေကိုချပေးပြီးလို့
ခြောက်လ အတွင်းတကယ်လုပ်ရမယ်။ မလုပ်ရင် ပြန်သိမ်းလို့
ရတယ်လို့ ဆိုပေမယ့် တကယ် အရေးမယူခဲ့တဲ့အတွက်
စက်မှုဇုန်တွေ မြို့သစ် တွေမှာ အခုထက်ထိမြေကွက်လွတ်တွေ
ရှိသေးတာ တွေ့ရမယ်။ အဲဒါတွေပြန် ကြပ်မတ်မှ မြေဈေးတွေ
ပြန်ကျမှာ ဖြစ်တယ် " ဟု ၎င်းကပြောသည်။

ခြံမြေကွက်များ၊ စက်မှုဇုန်မြေကွက်များ ကို အစိုးရက
မြေနေရာချထားပေးရာတွင် ပါရှိသည့် သတ်မှတ်ချက်များ
ဖြစ်သည့် မြေ နေရာချထားပေးသည့်နေ့မှ တစ်နှစ်အတွင်း
အမြန်ဆုံး နေအိမ် အဆောက်အအုံများ ဆောက်လုပ်ရန်နှင့်
လိုက်နာရန် ပျက်ကွက်ပါက မြေကွက်များကို ပြန်လည်
သိမ်းဆည်း နိုင်သည်ဆိုသည့် ညွှန်ကြားချက်များဖြင့်
မြေချပါမစ်များ၊ မြေငှားစာချုပ်များဖြင့် မြေ နေရာ ချထားပေး
ခဲ့ခြင်းဖြစ်သော်လည်း ခေတ်အဆက်ဆက်တွင် အရေးယူမှု
အားနည်းခဲ့ သည့်အတွက် နှစ်ပေါင်း ၂၀ ကျော်သက်တမ်း
ကြာမြင့်လာသည့် စက်မှုဇုန်များ၊ မြို့သစ်များ တွင်
မြေကွက်လွတ်များ အများအပြား ကျန်ရှိ နေဆဲ ဖြစ်သည်။

မြေကွက်များ၊ စက်မှုဇုန်မြေကွက်များကို ရင်းနှီးမြှုပ်နှံမှု
လုပ်ငန်းတစ်ခုအသွင် လည်ပတ် လုပ်ကိုင်ရောင်းဝယ်နေသည့်
အတွက် မြေဈေးနှုန်းများ တဖြည်းဖြည်း မြင့်မား လာခြင်း
ဖြစ်သလိုယင်းမြေများကို ၀ယ်ယူခြင်း သို့မဟုတ် ယင်းမြေများကို
ငှားရမ်းလုပ်ကိုင် ရသည့် လုပ်ငန်းရှင်များဘက်ကလည်း
မြင့်မားသည့် ရင်းနှီးမြှုပ်နှံသည့် ကုန်ကျစရိတ်များ
ပြန်လည်ကာမိစေရန် ထုတ်လုပ်သည့် ကုန်စည်များ အပေါ်တွင်
ပြန်လည် အမြတ်တင် ရောင်းချရသည့်အတွက် အခြေခံ
ကုန်စည်ဈေးနှုန်းများပါ လိုက်ပါမြင့်တက်ရခြင်းဖြစ် ကြောင်း
ဦးကိုကိုထွေးက ပြောသည်။

မြေချပါမစ်များ၊ မြေငှားစာချုပ် ( ဂရန်များ ) ကို သက်ဆိုင်ရာ
အဖွဲ့အစည်းများက စတင် ထုတ်ပေးစဉ်ကာလကပင်
ပြန်လည်လွှဲပြောင်း ရောင်းချခြင်းကို တားမြစ်ထားသည့် အပြင်
နေရာဒေသ အခြေအနေပေါ်မူတည်ကာ ခြောက်လအတွင်း
သို့မဟုတ် တစ်နှစ်အတွင်း နေအိမ်၊အဆောက်အအုံများ
အမြန်ဆုံး ဆောက်လုပ်ရန် တစ်ပါတည်း ညွှန်ကြားထား ပြီး
လိုက်နာမှုမရှိပါက မြေကွက်များကို ပြန်လည်သိမ်းယူမည်
ဖြစ်ကြောင်း ထည့်သွင်း ဖော်ပြထားသော်လည်း
နှစ်ပေါင်းများစွာ ကြာမြင့်သည့် တိုင်အောင်
ယင်းပြဋ္ဌာန်းချက်များနှင့် ကိုက်ညီစွာ သက်ဆိုင်ရာ
အဖွဲ့အစည်း များက အကောင်အထည်ဖော်ခြင်းမရှိသဖြင့်
မြေကွက်လွတ်များ ယခုကဲ့သို့ အများအပြားကျန်ရှိနေဆဲ
ဖြစ်သလို၊ အမှန်တကယ်နေထိုင် လုပ်ကိုင်ရန်ထက်
အမြတ်တင် ပြန်ရောင်းရန်ဟူသည့်ရည်ရွယ်ချက်ဖြင့်
ဝယ်ယူထားသူများ က ကြိုတင်နေရာဦး ၀ယ်ယူထားကြသည့်
အတွက် ယခုကဲ့သို့အိမ်ခြံမြေဈေးနှုန်းများ အဆမတန်
မြင့်တက်လာရခြင်းဖြစ်ကြောင်း မြန်မာနိုင်ငံ အိမ်ခြံမြေ
ဝန်ဆောင်မှုအသင်း ဒုတိယဥက္ကဋ္ဌ ဦးသန်းဦးက ပြောသည်။

"ပါမစ်ချပေးကတည်းကိုက သတ်မှတ် ချက်တွေပါပြီးသား၊
အလုပ်မလုပ်ရင် ပြန်သိမ်း မယ်ဆိုတာပါပေမယ့် ဘာကြောင့်
ပြန်မသိမ်း တာကတော့ သူတို့ပဲ သိနိုင်တယ်။ တကယ် သာ
အလုပ်မလုပ်တဲ့မြေကွက်တွေကို စည်းကမ်းချက်နဲ့အညီ
ပြန်သိမ်းပြလိုက်ရင် အိမ်ခြံမြေဈေးတွေ ထိုးကျသွားမှာ
အသေ အချာပဲ" ဟု ၎င်းကပြောသည်။

ရန်ကုန်တိုင်းဒေသကြီး အတွင်းရှိ စက်မှုဇုန်ပေါင်း ၂၈ဇုန်တွင်
အဆောက်အအုံ ဆောက်လုပ်ရန်အတွက် မြေကွက်လွတ်များ
အများအပြား ကျန်ရှိနေသေးသလို မြို့သစ် များတွင်လည်း
မြေကွက်လွတ်များ အများ အပြား ကျန်ရှိနေဆဲဖြစ်သည်။

မြေကွတ်လွတ်အများအပြားမှာ အမှန်တကယ် နေထိုင်သူ
များထက် မြေကွက်ဝယ်ရောင်းများ၊ ငွေပို ငွေလျှံရှိသဖြင့်
ဝယ်ယူထားသူများ၏ လက် ၀ယ်တွင် ရှိနေကြောင်း အိမ်ခြံမြေ
အကျိုး ဆောင်များကဆိုသည်။

"ခုချိန်ထိတော့ ဘယ်မြေကွက်ကိုမှ အိမ် မဆောက်လို့
ပြန်သိမ်းတာ မကြားဖူးပါဘူး။ ပါမစ် စည်းကမ်းတွေထဲမှာတော့
ရေးထားတာ တွေ့ပါတယ်။ တကယ်လို့သာ စည်းကမ်း အတိုင်း
ပြန်သိမ်းလိုက်ရင် မြေဈေးတွေ ထိုးကျ မှာ သေချာပါတယ်"ဟု
အေးရိပ်စံ အိမ်ခြံမြေ အကျိုးဆောင်လုပ်ငန်းက
ဦးဝင်းထိန် က ပြောသည်။

၂၀၁၄ ခုနှစ် နှစ်ကုန်ပိုင်းက စတင်၍ ဒုတိယသမ္မတဦးဉာဏ်ထွန်း
ဦးဆောင်သည့် အဖွဲ့ကရန်ကုန်တိုင်းဒေသကြီးအတွင်းရှိ
စက်မှုဇုန်များတွင် မြေကွက်ရယူထားသော် လည်း လုပ်ငန်းများ
လုပ်ကိုင်ခြင်းမရှိသည့် မြေကွက်ပိုင်ရှင်များကို အမြန်ဆုံး
လုပ်ငန်း များ လုပ်ကိုင်ရန်နှင့် လုပ်ငန်းများလုပ်ကိုင်ခြင်း မရှိပါက
မြေကွက်များကို ပြန်လည်သိမ်း ယူသွားမည်ဖြစ်ကြောင်း
မြေကွက်ပိုင်ရှင်များသို့ အကြောင်းကြားခဲ့ပြီးဖြစ်သော်လည်း
ယနေ့ အချိန်အထိ လက်တွေ့အကောင် အထည်ဖော်နိုင်မှု
မရှိသေးကြောင်း စက်မှုဇုန် စီမံခန့်ခွဲရေးကော်မတီက
သတင်းရရှိသည်။

"လူတွေက ငွေပိုနေလို့ အိမ်ခြံမြေဘက်ကို လုပ်ကြတယ်။
အမြတ်ကြီးတာလည်း ပါတယ်။စက်မှုသမားတွေက ထပ်မရင်းချင်
ကြတော့ ဘူး။ ဦးနှောက်လည်း ခြောက်တယ်၊
မြေအရောင်းအ၀ယ်လုပ်တာက ဆယ်ဆမြတ်ပေ မယ့်
အလုပ်လုပ်တာက နှစ်ဆမမြတ်ဘူး။ ဇုန်ထဲက
မြေကွက်လွတ်တွေကို ဆောက်ဖို့ ဆော်ဩထားပြီးပါပြီ။
သိမ်းမသိမ်းကတော့သူတို့သဘောပါပဲ" ဟု လှိုင်သာယာစက်မှုဇုန်
စီမံခန့်ခွဲရေး ကော်မတီဥက္ကဋ္ဌ ဦးမြတ်သင်းအောင်က
ပြောသည်။

(ဇေယျာလင်း)

***

၂။ "ရန်ကုန်မြို့တွင် အိမ်ရာဖော်ထုတ်ရန် အစိုးရပိုင်မြေ
နည်းပါးနေသော်လည်း မြို့နယ်အချို့၌
အဆင့်ဆင့်ဝယ်ယူထားရာမှ ပုဂ္ဂလိကလက်သို့ ရောက်ရှိနေကာ
အသုံးမချရသေးသည့် မြေကွက်အများအပြား ရှိနေဟုဆို"

ရန်ကုန်မြို့၏ အိမ်ရာလိုအပ်ချက်အတွက် အိမ်ရာများ
ဖော်ထုတ်ရန် အစိုးရပိုင်မြေ နည်းပါးနေသော်လည်း
မြို့နယ်အချို့တွင်မူ အကြောင်းအမျိုးမျိုးကြောင့် အဆင့်ဆင့်
ဝယ်ယူထားရာမှာ ပုဂ္ဂလိကလက်သို့ ရောက်ရှိနေကာ
အသုံးမချရသေးသည့် မြေကွက်များ အများအပြားရှိနေကြောင်း 
ဇန်န၀ါရီ  ၈ ရက်က  မြန်မာနိုင်ငံအင်ဂျင်နီယာအသင်းတွင်
ကျင်းပသည့် (၁၀) ကြိမ်မြောက် နှစ်ပတ်လည်အသင်းသား
စုံညီညီလာခံ၊ အင်ဂျင်နီယာဘာသာရပ်ဆိုင်ရာ
စာတမ်းဖတ်ပွဲအခမ်းအနားမှ သိရသည်။

ရန်ကုန်မြို့တွင် မြင့်တက်နေသည့် အိမ်ရာလိုအပ်ချက်အတွက်
အဆိုပါပုဂ္ဂလိကပိုင်မြေများပေါ်တွင် အစိုးရနှင့် ပုဂ္ဂလိက
ကဏ္ဍပူးပေါင်းကာ အိမ်ရာများဖော်ဆောင်ပေးသင့်ကြောင်းနှင့်
ယင်းအတွက်လည်း လိုအပ်သည့် စည်းမျဉ်းစည်းကမ်းများကို
အစိုးရဘက်မှ လုပ်ဆောင်ပေးသင့်ကြောင်း အိမ်ခြံမြေရေးရာ
ကျွမ်းကျင်သူများက ဆိုသည်။

“ရန်ကုန်မြို့မှာ အစိုးရပိုင်မြေနဲ့ ပုဂ္ဂလိကပိုင်မြေဆိုရင်
ပုဂ္ဂလိကပိုင်မြေတွေက ပိုများတာပေါ့။
ဒါပေမဲ့ ဒါကပုဂ္ဂလိကရဲ့ Right ပဲလေ။
ဒါကိုသွားပြီးတော့ ဘာလုပ်ရမယ် ညာလုပ်ရမယ်ဆိုတာမျိုး၊
ပုဂ္ဂလိကကို Right ပေးထားပြီးရင် အဲဒီလို လိုက်လုပ်ဖို့တော့
ခက်တယ်။ 
သို့သော်လည်း ဒီဖွံ့ဖြိုးရေးအတွက် ပုဂ္ဂလိကဟာ ဒီမြေကို
အရင်းထည့်၊ အစိုးရဟာ ဒီစီမံကိန်းတစ်ခုကို အကောင်အထည်
ဖော်ပေးမယ်။
ပုဂ္ဂလိက ကဏ္ဍကလည်း Invest လုပ်ရမယ်။ ဒီနယ်မြေတစ်ခုကို
သတ်မှတ်လိုက်မယ်။
ဥပမာအားဖြင့် လူတွေတော့ ၄၀x၆၀အကွက်တွေ ချထားတယ်။
ဘာမှလည်း ဖြစ်မလာဘူးဆိုတဲ့ နှစ်ပေါင်းကြာနေတဲ့
ဟာမျိုးကိုတော့ ဖြစ်မြောက်အောင် အစိုးရက Guide
လုပ်ပေးလို့ရတယ်”ဟု ဆောက်လုပ်ရေးဝန်ကြီးဌာန မှ
ညွှန်ကြားရေးမှူး ဒေါ်အေးအေးမြင့်က ပြောကြားသည်။

ရန်ကုန်မြို့၌ မြို့သစ်မြို့နယ်အချို့တွင်
လူနေထူထပ်လာသော်လည်း တောင်ဒဂုံ၊ ဒဂုံအရှေ့ စသည့်
မြို့နယ်များတွင် လူနေကျဲပါးနေကာ မြေကွက်လွတ်များစွာ
ရှိနေကြောင်း သိရသည်။

“ဒဂုံဆိပ်ကမ်း၊ ရွှေပြည်သာတို့ လှိုင်သာယာတို့ စသဖြင့်ပေါ့။
လှိုင်သာယာဆိုတာတောင် လူတော်တော်နေနေပြီ။
ဒဂုံတောင်တို့ ဒဂုံအရှေ့တို့ဆို လူသိပ်မနေသေးဘူး။ ကျဲတယ်။
အကွက်တွေကတော့ Individual  ပိုင်နေတယ်။
အဆင့်ဆင့် ၀ယ်ထားတာပဲ ဖြစ်ဖြစ်ပေါ့။
သို့သော် အဲဒါတွေကို နယ်မြေသတ်မှတ်လိုက်ရမယ်ပေါ့”ဟု
၎င်းက ဆိုသည်။

အိမ်ရာများ ဖော်ဆောင်ရာတွင်လည်း   ရေ၊ မီး စသည့်
အခြေခံအဆောက်အအုံလို အပ်ချက်များကို ဖြည့်ဆည်းပေးရန်
လိုအပ်မှုများရှိနေသေးကြောင်း၊ အခြေခံအဆောက်အအုံ
လိုအပ်ချက်အတွက်လည်း အစိုးရဘက်မှ ဖြည့်ဆည်းပေးရန်
လိုအပ်ကာရေရှည်အတွက် မဟာဗျူဟာစီမံကိန်းများ
ချမှတ်ဆောင်ရွက်သင့်ကြောင်း သုံးသပ်မှုများ ရှိနေသည်။

“အိမ်ရာတွေဖော်ဖို့အတွက် Individual တစ်ကွက်စီမှာဆိုရင်
အဲဒီတစ်ကွက်စီမှာ တစ်အိမ်စီ ဆောက်တယ်ဆိုလည်း
Infrastructure က မလိုက်နိုင်ဘူးလေ။ မီးမရှိဘူး။
ရေမရောက်သေးဘူး။ ၂၀၁၈ ကျမှ ရေရောက်မယ်။
အဲဒီတော့ ရေမရှိသေးလို့ လူမနေနိုင်သေးဘူး။
မီးမရှိသေးလို့ လူမနေနိုင်သေးဘူး ဆိုတာတွေကလည်း
အများကြီးပဲလေ။ အဲဒါကြောင့်မို့လို့ ကျွန်မတို့က ဒီတစ်နေရာကို
ဖွံ့ဖြိုးအောင်လုပ်မယ်ဆိုရင် သေချာလုပ်။ ခုနကပြောတဲ့
အခြေခံအဆောက်အအုံတွေလည်း သေချာလိုက်။
Master Plan နဲ့ သွားရမယ်။ ဒါတွေကို အစိုးရ တစ်ခုတည်းချည်း
ထလုပ်လို့မရဘူး။ အစိုးရနဲ့ ပုဂ္ဂလိကပေါင်း လုပ်ရမယ်။
အစိုးရဟာ သူ့လည်းလိုက်ပြီး Invest မလုပ်နိုင်ဘူး။
သူက Sector တွေအများကြီးပဲ။
Housing တစ်ခုတည်း ဦးစားပေးမဟုတ်ဘူး။ မီးရဖို့လုပ်ရမယ်။
စက်မှုဇုန်လုပ်ရမယ်စသဖြင့် အစိုးရမှာ လုပ်စရာတွေ က
အများကြီးပဲ။ နယ်မြေဒေသတွေကလည်း အများကြီးပဲ။
ဒါကြောင့်Housing Sector ရဲ့ Investment ကိုတော့
ခေါ်ရတာပဲ။ ဒါပေမဲ့ နည်းမှန်လမ်းမှန်အတိုင်းဖြစ်ဖို့တော့
Plan အတိုင်း လုပ်ရမယ်”ဟု ရန်ကုန် မြို့၏
အိမ်ခြံမြေရေးရာကဏ္ဍ စောင့်ကြည့်လေ့လာနေသူတစ်ဦးက
ဆိုသည်။
   
(နီလာ)

credit - The Myanmar Times & Eleven Media Group