“ငွေကြေးဖောင်းပွမှု၊ ရင်းနှီးမြှုပ်နှံမှုနှင့် ဗဟိုဘဏ်တို့ အပေါ် စီးပွားရေးပညာရှင်များ၏ ဝေဖန်ထောက်ပြမှုများ”

“ငွေကြေးဖောင်းပွမှု၊ ရင်းနှီးမြှုပ်နှံမှုနှင့် ဗဟိုဘဏ်တို့ အပေါ်
စီးပွားရေးပညာရှင်များ၏ ဝေဖန်ထောက်ပြမှုများ”

၁။ "ငွေကြေးဖောင်းပွမှုနှုန်း ဆက်လက် မြင့်တက်ပါက
ရင်းနှီးမြှုပ်နှံမှုများ နည်းပါးသွားနိုင်ကြောင်း ကမ္ဘာ့ဘဏ်၏
မြန်မာနိုင်ငံဆိုင်ရာ စီးပွားရေးပညာရှင် ပြောကြား"

ငွေကြေးဖောင်းပွမှုနှုန်း ဆက်လက်မြင့်တက်ပါက ရင်းနှီး
မြှုပ်နှံမှုများနည်းပါးသွားနိုင်ကြောင်း အောက်တိုဘာ ၅ရက်က
ရန်ကုန်မြို့ရှိ ကမ္ဘာ့ဘဏ်ရုံးတွင် ပြုလုပ်သည့် အရှေ့အာရှနှင့်
ပစိဖိတ်ဒေသ နောက်ဆုံးရ စီးပွားရေး အခြေအနေ
အစီရင်ခံစာ ထုတ်ပြန်ပွဲတွင် ကမ္ဘာ့ဘဏ်၏ မြန်မာနိုင်ငံ
ဆိုင်ရာ အကြီးတန်း စီးပွားရေးပညာရှင် Habib Rab က
သတင်းထောက်များ၏ မေးမြန်းမှုကို ပြန်လည်
ဖြေကြားရာတွင် ပြောကြားခဲ့ခြင်းဖြစ်သည်။

“ငွေကြေးဖောင်းပွမှုရဲ့ သက်ရောက်မှုက နှစ်ခုဖြစ်ပါတယ်။
ရင်းနှီးမြှုပ်နှံမှုကို ကြည့်တဲ့အခါမှာ ရင်းနှီးမြှုပ်နှံသူတွေက
ငွေကြေးဖောင်းပွမှုက ဆက်တက်ဖို့ရှိသလား၊ ရှိရင်တော့
ရင်းနှီးမြှုပ်နှံမှုတွေ နည်းသွားမယ်။ အနုတ်လက္ခဏာ
ဆောင်တဲ့ သဘောဖြစ်နိုင်တယ်။
ရင်းနှီးမြှုပ်နှံသူတွေက ဒီလိုငွေကြေး ဖောင်းပွတာ
ခဏလေးပါ။ နိုင်ငံပြောင်းလဲနေတဲ့ အချိန်မှာ ဖြစ်တာပါ။
နောက်ရှေ့ဆက်သွားရင် ကျသွားမယ့် အနေအထား
ရှိရင်ကတော့ အဲဒါကို ဂရုမစိုက်ဘဲ သိသိကြီးနဲ့
မျှော်လင့်ချက်က ကောင်းတဲ့အတွက်ကြောင့် ဆက်လုပ်
ရင်တော့ စီးပွားရေး ဖွံ့ဖြိုးတိုးတက်မှုကို ထိခိုက်ဖို့
မရှိပါဘူး” Habib Rab က ပြောကြားသည်။

လက်ရှိ ၂၀၁၆-၂၀၁၇ ဘဏ္ဍာနှစ်တွင် မြန်မာနိုင်ငံ၏
ငွေကြေးဖောင်းပွမှုနှုန်းမှာ ၁၁ ဒသမ ၆၈ ရာခိုင်နှုန်းခန့်
ရှိနိုင်မည် ဖြစ်ကြောင်း ၂၀၁၆-၂၀၁၇ ဘဏ္ဍာရေးနှစ်
ပြည်ထောင်စု၏ ဘဏ္ဍာငွေ အရအသုံး ခန့်မှန်းခြေ အဆိုပြု
တင်ပြချက် အနှစ်ချုပ်တွင် ဖော်ပြထားချက်အရ သိရသည်။

- ငွေကြေး ဖောင်းပွမှုကြောင့် စားသုံးသူများ လက်ရှိကြုံတွေ့
နေရကြောင်း၊
- ၎င်းတို့ လူသုံးကုန်များ၊ စားသောက်ကုန်များကို ယခင်က
ကဲ့သို့ ၀ယ်ယူနိုင်ခြင်း၊ စားသောက်နိုင်ခြင်း မရှိတော့ကြောင်း၊
- ပစ္စည်းများ ပိုပိုလိုလို မ၀ယ်နိုင်သည့် အတွက်ကြောင့်
ဂျီဒီပီ ဖွံ့ဖြိုးမှုကို ထိခိုက်နိုင်ကြောင်း ကမ္ဘာ့ဘဏ်၏ 
မြန်မာနိုင်ငံဆိုင်ရာ အကြီးတန်း စီးပွားရေးပညာရှင်
Habib Rab က ဆက်လက် ပြောကြားသည်။

ထို့ပြင် ၎င်းကဆက်လက်ပြီး
“ဗဟိုဘဏ်ကနေပိုက်ဆံချေးတာက အစိုးရက ဘတ်ဂျက်
လိုငွေကို ဖြည့်တဲ့အခါမှာ ဗဟိုဘဏ်က အစိုးရရဲ့ ငွေတိုက်
စာချုပ် ၀ယ်တာပေါ့။ များသောအားဖြင့် ငွေကြေး ရိုက်ထုတ်
တာ ဖြစ်တဲ့အတွက်ကြောင့် ပြည်တွင်းမှာ မြန်မာကျပ်ငွေ
ပိုပြီးများလာတယ်။
ငွေကြေးထောက်ပံ့မှုက စီးပွားရေး ထုတ်လုပ်
နေတဲ့ နှုန်းထက်များနေရင် ငွေကြေးဖောင်းပွမှုက ပိုပြီး
များသွားတာ ဖြစ်နိုင်ပါတယ်။ အစိုးရ အနေနဲ့ ဒါကို အဓိက
ဦးစားပေးနေပါတယ်။ စက်တင်ဘာမှ ငွေတိုက်စာချုပ်တွေကို
လေလံတင်တာတွေ စလုပ်လာပါတယ်။ ပြီးခဲ့တဲ့ နှစ်ကလည်း
ငွေတိုက်လက်မှတ် လေလံတွေကို စလုပ်လာပါတယ်။
ငွေကြေးဖောင်းပွမှုကို ကြည့်တဲ့အခါမှာ ဘာတွေ့ရလဲ
ဆိုတော့ ငွေကြေးဖောင်းပွမှု Dynamic ကိုကြည့်ပါတယ်။
တက်လာတာက ဘာနဲ့သက်ဆိုင်လဲဆိုတော့ အစိုးရရန်ပုံငွေ
တက်လာတဲ့နှုန်းနဲ့ ဆိုင်ပါတယ်။ ဗဟိုဘဏ်က အစိုးရရဲ့
ဘတ်ဂျက်လိုငွေကို ဖြည့်တဲ့အခါမှာ ငွေကြေးဖောင်းပွမှုကို
သက်ရောက်မှု ရှိပါတယ်” ပြောကြားသည်။

မြန်မာနိုင်ငံ၏ တစ်နှစ်ပျမ်းမျှ ငွေကြေးဖောင်းပွမှုနှုန်းသည်
၂၀၀၆ ခုနှစ် အခြေခံနှစ်အရ
- ၂၀၁၁-၂၀၁၂  ဘဏ္ဍာနှစ်တွင် ၂ ဒသမ ၈၂ ရာခိုင်နှုန်း၊
- ၂၀၁၂-၂၀၁၃ ဘဏ္ဍာနှစ်တွင် ၂ ဒသမ ၈၅ ရာခိုင်နှုန်း၊
- ၂၀၁၃-၂၀၁၄ ဘဏ္ဍာနှစ်တွင် ၅ ဒသမ ၇၂ ရာခိုင်နှုန်း၊
- ၂၀၁၄-၂၀၁၅ ဘဏ္ဍာနှစ်တွင် ၅ ဒသမ ၉၀ ရာခိုင်နှုန်း
အသီးသီး ဖြစ်ပေါ်ခဲ့ပြီး
- ၂၀၁၅-၂၀၁၆ ဘဏ္ဍာနှစ် ဇွန်၊ ဇူလိုင်၊ သြဂုတ်လများတွင်
ဖြစ်ပေါ်ခဲ့သည့် ရေကြီးရေလျှံမှုများကြောင့် အစားအစာ
ဈေးနှုန်းများ တက်ခဲ့ကာ ၂၀၁၅-၂၀၁၆ ဘဏ္ဍာနှစ်
စက်တင်ဘာတွင် ၈ ဒသမ ၆၇ ရာခိုင်နှုန်းအထိ မြင့်တက်ခဲ့
ကြောင်း ဒုတိယကာလတို ငါးနှစ်စီမံကိန်းတွင်
ဖော်ပြထားချက်အရ သိရသည်။

သို့သော် အရှေ့အာရှနှင့် ပစိဖိတ်ဒေသ နောက်ဆုံးရ
စီးပွားရေး အခြေအနေ အစီရင်ခံစာတွင် မြန်မာနိုင်ငံ
အပါအ၀င် ဖွံ့ဖြိုးဆဲ အရှေ့အာရှပစိဖိတ် ဒေသ၏ စီးပွားရေး
တိုးတက်မှုနှုန်းသည် လာမည့် သုံးနှစ်အတွင်း ကြံ့ကြံ့
ခံနိုင်သည့် အခြေအနေမျိုးတွင် ဆက်ရှိနေမည်ဟု
ဖော်ပြထားသည်။

(ဆန်းထူးအောင်၊ ထက်ရှိုင်း)

****

၂။ "NLD စီးပွားရေး ကော်မတီဝင် ဦးရဲမင်းဦးနှင့် တွေ့ဆုံခြင်း"

(ဒေါ်လာငွေလဲနှုန်း မြင့်တက်မှု၊ ငွေကြေးဖောင်းပွမှုနှင့်
တိုင်းပြည်စီးပွားရေးတွင်အဓိကကျသော ငွေရေးကြေးရေးကဏ္ဍ
တည်ငြိမ်ရေး တာဝန်ရှိသော ဗဟိုဘဏ်၏ အခန်းကဏ္ဍနှင့်
လုပ်ဆောင်ချက်များအပေါ် စီးပွားရေးနှင့် ဘဏ်လုပ်ငန်း
အကြံပေး၊ အမျိုးသားဒီမိုကရေစီအဖွဲ့ချုပ်ပါတီ၏ စီးပွားရေး
ကော်မတီအဖွဲ့ဝင် ဦးရဲမင်းဦးကို မေးမြန်းထားခြင်း ဖြစ်သည်။)

Voice : ဆရာ့အနေနဲ့ လက်ရှိငွေဖောင်းပွမှုနဲ့ ငွေလဲနှုန်း
မြင့်တက်မှုအပေါ် ဗဟိုဘဏ်ရဲ့ လုပ်ဆောင်ချက်တွေကို
ဘယ်လိုမြင်မိလဲ။

UYMO : အခုက ငွေကြေးဖောင်းပွတာ မဟုတ်ဘူးဗျ။
ငွေကြေးဖောင်းပွတာက ပုံမှန်အတိုင်းပဲ သူ့ဟာသူ
ရှိနေတာပေါ့။

မြန်မာကျပ်ငွေ အရမ်းကြီးဖောင်းပွလို့ ငွေလဲနှုန်း ဒီလို
ဖြစ်လာတာ မဟုတ်ဘူး။ တကယ်ဖြစ်တာက ဒေါ်လာ
လိုအပ်ချက်ကို မဖြည့်နိုင်လို့၊ ဒေါ်လာဝယ်ချင်တဲ့သူတွေ
ပိုများလာတာ။ ဝယ်လိုအား တက်လာတဲ့အတွက် ဒေါ်လာဈေး
လိုက်တက်လာတဲ့ သဘောပဲ။ ဒေါ်လာလိုအပ်ချက် တက်တာ
လူတိုင်းပြောနေကျ ကုန်သွယ်မှုလိုငွေ ပြနေလို့ ပို့ကုန်နည်းပြီး
သွင်းကုန်များတဲ့အတွက် ဖြစ်နေတာ တစ်ကြောင်းပေါ့။

နောက်တစ်ခုက ဈေးနည်းနည်းလန့်ရင် ပေးရန်၊ ရရန်ရှိသူ
တွေက လန့်ဖျပ်ပြီးတော့ ဒေါ်လာဝယ်ထားမှပဲ ဆိုပြီး
ဝယ်ကြတာလည်း ပါတယ်။ အဲဒါနှစ်ခု ဆုံသွားတာပေါ့။

နောက်တစ်ခါ နိုင်ငံတကာမှာလည်း ဒေါ်လာဈေးက
နည်းနည်းတက်တာကိုး။ ဒေါ်လာကို ဝယ်သိမ်းထား
ရမယ်ဆိုတဲ့ စိတ်မျိုး လူတော်တော်များများ စိတ်ထဲ
ဖြစ်လာတော့ ဒေါ်လာလိုအပ်ချက် တက်လာတာပေါ့။

ဒီအချိန်မှာ ဗဟိုဘဏ်က ဘာလုပ်နေသလဲဆိုတော့၊
ကျွန်တော်တို့ တွေ့ရသလောက် ဗဟိုဘဏ်က ချက်ချင်းကို
တုံ့ပြန်တာမျိုး နည်းနည်းလေးနှေးတယ်။

ကမ္ဘာ့ဒေါ်လာဈေး တက်တော့မယ် ဘာညာဆို
ကြိုသိတာပဲလေ၊ ကမ္ဘာပေါ်မှာရှိတဲ့ စီးပွားရေး
အချက်အလက်တွေက ကြိုကြေညာကြတာပဲ၊ ခန့်မှန်းခြေ
တွေလည်း ပြောကြတာပဲ။ မီဒီယာတွေ၊ ဆွေးနွေးမှုတွေ
မှာလည်း ပါနေတာပဲ။

ဒါပေမဲ့ ဗဟိုဘဏ်က Proactive (ကြိုပြီးတော့ လုပ်တာ)
နည်းတယ်။ သူက အမြဲတမ်း Reactive ဖြစ်ပြီးတော့မှ
လိုက်ဖြေရှင်းတယ်။ တုံ့ပြန်တာ နောက်ကျတော့ တချို့ဟာ
တွေက အလွန်အကျွံတွေ ဖြစ်ကုန်တာပေါ့။

ခုလည်း အဲဒီလိုပဲ အစောကြီးကတည်းက တုံ့ပြန်လိုက်ရင်
ဒီထက်ပိုပြီး စောစောစီးစီး ဈေးငြိမ်မယ့် ကိစ္စကို တုံ့ပြန်တာ
နောက်ကျတော့ ဒေါ်လာဈေးက မလိုလားအပ်တဲ့
ဈေးအထိ တက်သွားတာပေါ့။ သူတို့ အခုအစည်းအဝေးတွေ
လုပ်တယ်။ မီဒီယာနဲ့တွေ့ပြီး ပြောဆိုတာမျိုးလုပ်တော့
ဒေါ်လာဈေးက ကျရိပ်ပြန်ပြလာတယ်။

နောက်ထပ် Action တွေ ဆက်လုပ်ရင်တော့ ဒေါ်လာဈေးက
ပြန်ကျလာပါလိမ့်မယ်။ ကျွန်တော် သတိထားမိသလောက်
ဗဟိုဘဏ် ၁၂၃၀၊ အပြင်ဈေး ၁၂၄၅ လောက် ဖြစ်တဲ့အချိန်
ဈေးကွက်ထဲမှာ ဝယ်လိုအားက နည်းနည်းလျော့သွားပြီ။

ပြောချင်တာ အဲဒီအချိန်မှာ ဈေးကျမှာပေါ့ဗျာ။ ဒါပေမဲ့
နောက်နေ့မှာ ဗဟိုဘဏ်က ၁၂၃၅ ကောက်လုပ်လိုက်တော့
အပြင်ဈေးက ၁၂၅၀ ကျော်သွားရော။ ဈေးကွက်ထဲ
ဘာဖြစ်တယ်ဆိုတာ ပြင်ပထက် ချက်ချင်းသိတာ အမြဲတမ်း
နောက်ကျတယ်။ ဘာလို့နောက်ကျလဲ ဆိုတာတော့
ကျွန်တော်တို့လည်း မသိဘူး။ ဒါသိပ်ခက်တဲ့ ကိစ္စတော့
မဟုတ်ဘူး။ ဖုန်းလေး နှစ် Call လောက် ဆက်လိုက်ရင်
တောင် သိနိုင်တဲ့ ကိစ္စပဲ။ အဲဒီလိုမျိုး နောက်ကျတဲ့
အခါကျတော့ သူတို့ ဖမ်းထိန်းနိုင်တဲ့ အခြေအနေမျိုးမှာ
မထိန်းနိုင်တော့ဘူး။

၁၂၈၀ ကို ကျော်ထွက်သွားတာပေါ့။ ဟိုအရင်ကတည်းက
၁၂၈၀ ကိုထိပြီဆိုရင် လူတွေက ၁၃၀၀ ကို ထိတော့မယ်လို့
မျှော်မှန်းချက် ရှိကြတယ်။ အခု ၁၂၈၀ ကျော်လာတော့
၁၃၀၀ ရောက်တော့မယ်ဆိုပြီး ဝယ်တဲ့သူတွေက ထပ်တိုး
လာပြန်ရော။ အဲဒီအချိန် ဗဟိုဘဏ် ဘယ်မှာရပ်တည်မလဲ
ဆိုတာ မူတည်တာပေါ့။ ရပ်မှာလား၊ လိုက်တက်မှာလားပေါ့။

ဒီတစ်ခေါက်မှာ လိုက်တက်မယ့်ဟာကို သူက ရွေးထား
တာကိုး။ သူ လိုက်တက်လေ အပြင်ကလည်း လိုက်တက်
လေပဲ။

ဒါ ပြီးခဲ့တဲ့ နှစ်ပတ်လောက် ကတည်းက ပြေလည်ရမယ့်
ကိစ္စ၊ အခုတော့ စီးပွားရေးမှာ အများကြီး ထိတာပေါ့။

နောက်တစ်ခါ ကုန်သွယ်မှု လိုငွေပြတယ် ဆိုတာ
သွင်းကုန်များနေလို့ သွင်းကုန်က ဒေါ်လာနဲ့ ပေးနေရတာ။
အဲဒီမှာ ပစ္စည်းတွေ ဈေးတက်ကုန်တာပေါ့။ ဒီတော့
စားသုံးသူတွေ ဒုက္ခရောက်တာပေါ့ဗျာ။ နောက်ဆုံးထိတာ
ပြည်သူပဲ ထိတာ။

နောက်ဒါမျိုးမဖြစ်အောင် ဘယ်လိုလုပ်ကြမလဲ ပြောရင်
ဗဟိုဘဏ်သည် ဖြစ်လာမယ့် ကိစ္စကို ကြိုတင်မှန်းဆပြီးတော့
ကြိုတင်ကာကွယ်တာ လုပ်သင့်တယ်။ လုပ်ဖို့အခွင့်အလမ်း
လည်း သူ့မှာ ရှိတယ်။ လုပ်နိုင်တဲ့ Capacity လည်း ရှိရက်နဲ့
မလုပ်မိတာတွေဘဲ။ မလုပ်မိတာ ဘာလို့ဖြစ်လဲ ဆိုတာတော့
ကျွန်တော်တို့လည်း မသိဘူး။ ခွင့်မပြုထားတာလား၊
အမိန့်မပေးထားတာလား၊ နောက် လုပ်ရင်လုပ်တဲ့သူကို
ခေါ်ဆူနေတာလား၊ ဒါက အပေါ်က အုပ်ချုပ်နေသူတွေနဲ့
တာဝန်ယူထားသူ နှစ်ယောက်ကြားပဲ သိမယ့်ကိစ္စပဲ။

Voice : အခုတလော ဘဏ်အတိုးနှုန်း လျှော့သင့်တယ်၊
မလျှော့သင့်သေးဘူး ပြောလာတာတွေ ရှိတယ်။
ငွေဖောင်းပွမှုနှုန်း မြင့်နေချိန်မှာ ဘဏ်တိုးနှုန်း လျှော့နိုင်
မလား။

UYMO : ဘဏ်တိုးတွေက တင်ချင်တိုင်း တင်လို့မရသလို၊
ချချင်တိုင်းလည်း ချလို့မရဘူး။ အဲဒီလိုတင်ဖို့၊ ချဖို့ဆို
ငွေကြေးဖောင်းပွမှုနဲ့ တိုက်ကြည့်ပြီး ပြောမှပဲ ရမယ်။

ငွေဖောင်းပွမှု မချဘူးဆိုရင် ဘယ်လိုလုပ် ဘဏ်တိုးကို ချမလဲ။
ငွေဖောင်းပွမှုနှုန်းက ဂဏန်းနှစ်လုံး(၁၂ ဒသမ ၁၂ ရာခိုင်နှုန်း)
ရှိနေချိန်မှာ ဘဏ်တိုးကို အဲဒီနှုန်းအောက် ရောက်အောင်
ဘယ်လိုမှ ချလို့မရတော့ဘူး။

အဲဒီလိုလုပ်လိုက်ရင် ဘဏ်မှာ ဘယ်သူမှ ပိုက်ဆံလာစုမှာ
မဟုတ်ဘူး။ ဘဏ်မှာ စုဆောင်းငွေ မရှိရင် ဘဏ်တွေက
ငွေဘယ်လိုထုတ်ချေးမလဲ။

နောက် တချို့တွေပြောတာ ချေးငွေအတိုးနှုန်း ၁၃ ရာခိုင်နှုန်း
က များတယ်ပေါ့။ တကယ်က ငွေဖောင်းပွမှု ရှိနေတဲ့အတွက်
စုဆောင်းငွေအပေါ် ၈ ရာခိုင်နှုန်း ပေးထားလို့ ချေးငွေမှာ
၁၃ ရာခိုင်နှုန်း ဖြစ်နေတာ။ စုဆောင်းငွေ အတိုးနှုန်းကို ချနိုင်မှ
ချေးငွေအတိုးကိုလည်း ချလို့ရမယ်။

တကယ်တော့ အတိုးနှုန်းက အလွယ်တကူ ချလို့တော့မရဘူး။
ဒီတစ်နှစ်၊ နှစ်နှစ်အတွင်းမှာ ဘာဖြစ်ခဲ့လဲဆိုတော့
ဘဏ်တွေမှာ စုငွေရတာ နည်းတယ်။ စုဆောင်းငွေနည်းတော့
ဘဏ်တွေက အပြိုင်အဆိုင်လုပ်ရင်း Deposit လုတာ၊
စုငွေများများတက်အောင် လုပ်တာ။ ဘယ်လိုလုပ်လဲ
ဆိုတော့ Call Deposit တို့ ဘာတို့အသစ်တွေ ထွင်တာပေါ့။
အဲဒီမှာ Call Deposit ကို ၈ ဒသမ ၂၅ အထိ ပေးတာမျိုး။
အလုအယက် ကိုယ့်ဘဏ်မှာ ငွေများရေးကို လုပ်ကြတာပေါ့။
ကိုယ့်ဆီမှာ ငွေများများလာအပ်ဖို့ အတိုးကို ပေးရမယ့်
ပမာဏထက် ပိုပေးတာပေါ့။ အဲဒီတုန်းကတော့ အပြိုင်အဆိုင်
တွေ လုပ်ကြတာပေါ့။

ဒါပေမဲ့ အခုလိုမျိုး ခက်ခဲ၊ ကျပ်တည်းလာတဲ့ ကာလ
ရောက်တော့ အဲဒါတွေက မကိုက်တော့ဘူး။ ဒါကြောင့်
ပြန်လျှော့ဖို့ ကြိုးစားတာပေါ့။ အခုလျှော့တာတော့
ဘဏ်အသေးလေးတွေက လျှော့ကြတာ၊ ဘဏ်ကြီးတွေက
ခုထိမလျှော့သေးဘဲနဲ့ ဆက်ပေးနေတုန်းပဲ။ အဲဒီလိုမျိုး
Call Deposit အတိုးနှုန်း လျှော့ရုံလောက်နဲ့တော့ ငွေတွေက
အပြင်ကို ပြန်ထွက်မလာဘူး။

Voice : အစိုးရသစ် လက်ထက်မှာ ဗဟိုဘဏ်ကို သီးခြား
လွတ်လပ်တဲ့အဖွဲ့အဖြစ် ပြောတာ မကြားမိဘူး။ စီမံကိန်းနဲ့
ဘဏ္ဍာရေး ဝန်ကြီးဌာနအောက်ကို  ပြန်ရောက်သွားတာလား။
ဗဟိုဘဏ်ရဲ့ ရပ်တည်မှုက တကယ်လွတ်လပ်နေတယ်လို့
မြင်ပါသလား။

UYMO : ဗဟိုဘဏ်က သီးခြားလွတ်လပ်တဲ့ အဖွဲ့အစည်း
ဖြစ်တာ ပြီးခဲ့တဲ့ အစိုးရလက်ထက် ကတည်းကပဲ။ သမ္မတကိုပဲ
တိုက်ရိုက်သတင်းပို့ပြီး သမ္မတကပဲ တိုက်ရိုက်ညွှန်ကြားတယ်။

ပြီးခဲ့တဲ့ အစိုးရခေတ်မှာ သမ္မတက မအားတဲ့ အခါမျိုးတွေမှာ
သမ္မတရုံး ဝန်ကြီးတွေက တစ်ဆင့် ဗဟိုဘဏ်က
Report (အစီရင်ခံစာ) တင်ရတာ၊ ဗဟိုဘဏ်ကို ဆက်သွယ်
တာတွေ ရှိခဲ့တယ်။ ဆိုတော့ ဗဟိုဘဏ် ဥက္ကဋ္ဌသည် ဝန်ကြီး
အဆင့် ဆိုပေမယ့် သမ္မတရုံး ဝန်ကြီးအောက်ကို
ရောက်သွားတယ်။

သမ္မတရုံး ဝန်ကြီးက ဘဏ်လုပ်ငန်း လိုင်စင်ပေးဆိုရင် ပေးရတဲ့
အခြေအနေ ရောက်သွားတယ်။ ဒါပြီးခဲ့တဲ့ ငါးနှစ်မှာ ကြုံခဲ့ရတဲ့
အခြေအနေပေါ့။

အခု ဒီဘက်ကိုရောက်တဲ့ အချိန်ကျတော့
သမ္မတကို တိုက်ရိုက်အစီရင်ခံတဲ့ အချိန်မှာ သူက
မလွတ်လပ်တာ မဟုတ်ဘူး၊ လွတ်လပ်လွန်နေတာ။ သူ့ကို
အုပ်ချုပ်မယ့်သူလည်း မရှိဘူး၊ ထိန်းသိမ်းမယ့်သူလည်း မရှိဘူး။

ဘာလို့ဆို သူ့ရဲ့ အစီရင်ခံစာကို သမ္မတဆီ ဘယ်လမ်းကြောင်းက
ပို့နေပြီး သမ္မတက ဘာတွေညွှန်ကြားနေတယ် ဆိုတာ
ထင်ထင်ရှားရှား ဘာမှမတွေ့ရဘူး။ ကျွန်တော်တို့ စိတ်ထဲမှာ
ထင်တာက သူက ဘယ်သူကမှ မအုပ်ချုပ်ဘဲနဲ့ သူ့ကိုယ်သူ
အုပ်ချုပ်နေရတယ်လို့တောင် ထင်တယ်။ တော်တော်ကြီး
လွတ်လပ်သွားတာပါ။ အရင်ထက်တောင်
ပိုလွတ်လပ်သွားတာ။

အရင်ကမှ သမ္မတရုံးဝန်ကြီးက သူ့ကို လာကြည့်နေသေးတယ်။
အခု သမ္မတရုံးဝန်ကြီးက သူ့ဟာသူ မအားတဲ့ အခါကျတော့
သူ့မကြည့်နိုင်ဘူးလေ။ ပိုပြီးတော့တောင် လွတ်လပ်ရေး ရနေ
သေးတယ်။ အခုလို ရုတ်ရုတ်ဖြစ်ချိန်မှာ သူ့ကို ချက်ချင်း
ညွှန်ကြားချက်ပေးတဲ့သူ မရှိဘူး၊ သူ့ဘာသာ ဆုံးဖြတ်ရတာပေါ့။
ကိုယ့်ဘာသာ ဆုံးဖြတ်ဖို့ကို နှောင့်နှေးနေတာ။ မြန်မြန်ဆုံးဖြတ်
နိုင်ရင် တချို့ပြဿနာက မြန်မြန်ပြေလည်မယ်။

အခု သမ္မတရုံးဝန်ကြီးက ဒေါ်အောင်ဆန်းစုကြည် ဖြစ်နေတဲ့
အခါကျတော့ ဒီဘက်ကို လှည့်မကြည့်နိုင်တော့ ပိုပြီးတောင်
လွတ်လပ်ရေး ရနေသေးတယ်။ အခုမှ တကယ်
လွတ်လပ်သွားတယ်လို့တောင် ပြောလို့ရသေးတယ်။

Voice : ဗဟိုဘဏ် လူကြီးပိုင်းတွေ ပြောင်းလဲဖို့ လိုတယ်လို့
ထင်ပါသလား။

UYMO : ဗဟိုဘဏ်ရဲ့လက်ရှိအပေါ်က လူတွေကို မေးစေ
ချင်တယ်။ သူတို့ကိုယ် သူတို့ သိရမှာပေါ့။ လက်ရှိခေတ်စနစ်နဲ့
ကိုက်ညီမှု ရှိသေးရဲ့လား၊ လက်ရှိပြောင်းလဲသွားတဲ့
ခေတ်စနစ်နဲ့ အမီလိုက်ဖို့ အသင့်ဖြစ်ပြီလား။

တကယ်လို့ အသင့်မဖြစ်ဘူး၊ ပြောင်းလဲသွားတဲ့ ခေတ်စနစ်နဲ့
လိုက်မလုပ်ချင်ဘူး ဆိုရင် ကိုယ့်သဘောနဲ့ကိုယ် ပြောင်းလဲဖို့
လုပ်ပေါ့လေ။ ပြောင်းသွားတဲ့စနစ်ကို ကိုယ်မလိုက်ချင်တော့ဘူး
ဆိုရင်တော့ ကိုယ့်သဘောနဲ့ကိုယ် နုတ်ထွက်ပေါ့ ဒါပဲရှိတာပဲ။
ကျွန်တော်တို့က အဲဒီလိုပဲမြင်တယ်။ သူတို့အသိဆုံး ဖြစ်မှာပါ။

လက်ရှိအစိုးရရဲ့ စီးပွားရေးမူဝါဒနဲ့ ဗဟိုဘဏ်ရဲ့ ဆောင်ရွက်မှု
တွေက လိုက်လျောညီထွေ ရှိရဲ့လား၊ ဗဟိုဘဏ်ရဲ့
ဆောင်ရွက်မှုတွေက တိုင်းပြည်ရဲ့ စီးပွားရေး ဖွံ့ဖြိုးတိုးတက်မှု
အတွက်ကို အကျိုးပြုရဲ့လား၊ ဗဟိုဘဏ်ရဲ့ ထိန်းချုပ်နိုင်မှုက
ပုဂ္ဂလိကဘဏ်တွေ အပေါ်မှာ သြဇာသက်ရောက်မှု
တကယ်ရှိရဲ့လား။ ဒါကို ဗဟိုဘဏ်က လူတွေကပဲ သုံးသပ်
ရမှာပေါ့။

သုံးသပ်ပြီးသွားရင် ပြတ်ပြတ်သားသား အားမနာတမ်း
မညှာတမ်း ကိုယ့်ကိုယ်ကိုယ် ဝေဖန်ပြီး ကိုယ့်ကိုယ်ကိုယ်
ဆုံးဖြတ်ကြရမှာပေါ့။ လက်ရှိအစိုးရကတော့ သူတို့ရဲ့
Contract (သက်တမ်း) ရှိနေတဲ့ အတွက် သူတို့ သက်တမ်း
ပြည့်တဲ့အထိ စောင့်နေတဲ့ သဘောတော့ ရှိတယ်။

(စစ်ငြိမ်းသူ)

credit - Eleven Media Group & The Voice

မှတ်ချက်
----------

အိမ်ခြံမြေ အကြောင်းအရာများနှင့် 
တိုက်ရိုက်မသက်ဆိုင်သော်လည်း
သွယ်ဝိုက်ပတ်သက်မှု့ ရှိသည့် စီးပွါးရေးဆိုင်ရာ  
ဆောင်းပါး/သတင်းများ ဖြစ်နေပါသဖြင့်
မိတ်ဆွေများ လေ့လာနိူင်ရန် တင်ခဲ့ခြင်းဖြစ်ပါသည်။

“အိမ်ခြံမြေ လမ်းဆုံ”